ഹരാരെ: അണ്ടര് 19 ക്രിക്കറ്റ് ലോകകപ്പ് കിരീടം ഇന്ത്യക്ക്.ഫൈനലില് ഇംഗ്ലണ്ടിനെ 100 റണ്സിനാണ് തകര്ത്തത്.
ടോസ് നേടി ബാറ്റ് ചെയ്ത ഇന്ത്യ നിശ്ചിത ഓവറില് ഒമ്പത് വിക്കറ്റ് നഷ്ടത്തില് 411 റണ്സെടുത്തു. വൈഭവ് സൂര്യവംഷിയുടെ (80 പന്തില് 175) മിന്നും പ്രകടനമാണ് കൂറ്റന് സ്കോറിലേക്ക് നയിച്ചത്.
മറുപടി ബാറ്റിംഗില് ഇംഗ്ലണ്ട് 40.2 ഓവറില് 311 റണ്സിന് എല്ലാവരും പുറത്തായി.കലേബ് ഫാല്കോണറാണ് (115 റണ്സ്) ഇംഗ്ലണ്ടിന്റെ ടോപ് സ്കോറര്. ബെന് ഡോക്കിന്സ് 66 റണ്സ് നേടി.ഇന്ത്യക്ക് വേണ്ടി ആര് എസ് ആംബ്രിഷ് മൂന്ന് വിക്കറ്റ് വീഴ്ത്തി. ദീപേഷ് ദേവേന്ദ്രന് രണ്ട് വിക്കറ്റ് എടുത്തു.
ഇംഗ്ലണ്ടിന് തുടക്കത്തില് തന്നെ ജോസഫ് മൂര്സിന്റെ (17) വിക്കറ്റ് നഷ്ടമായി. ആംബ്രിഷിന്റെ പന്തില് ബൗള്ഡായി. തുടര്ന്ന് ഡോക്കിന്സ് – ബെന് മയേസ് (45) സഖ്യം 74 റണ്സ് എടുത്തു. എന്നാല് ഖിലന് പട്ടേല് മയേസിനെ പുറത്താക്കി ഇന്ത്യക്ക് ബ്രേക്ക് നല്കി. തുടര്ന്ന് ഡോക്കിന്സ് – തോമസ് റ്യൂ (31) സഖ്യം 49 റണ്സ് കൂട്ടിച്ചേര്ത്തപ്പോഴേക്കും റ്യൂവിനെ പുറത്താക്കി കനിഷ്ക് ചൗഹാന് ഇന്ത്യന് പ്രതീക്ഷകള്ക്ക് ജീവനേകി.
ഡോക്കിന്സിനെ ആയുഷ് മാത്രെ പുറത്താക്കി.റാല്ഫി ആല്ബെര്ട്ട് (0), ഫര്ഹാന് അഹമ്മദ് (1), സെബാസ്റ്റ്യന് മോര്ഗന് (0) എന്നിവര് പെട്ടെന്ന് മടങ്ങി. ജെയിംസ് മിന്റോയ്ക്കൊപ്പം (28) ചേര്ന്ന് ഫാല്കോണര് 92 റണ്സ് കൂട്ടിച്ചേര്ത്തപ്പോഴേക്കും മിന്റോയെ പുറത്താക്കി ആംബ്രിഷ് ഇന്ത്യയെ മത്സരത്തിലേക്ക് മടക്കി എത്തിച്ചു. മാന്നി ലുംസ്ഡെന് (3) പെട്ടെന്ന് തന്നെ മടങ്ങി.ഫാല്കോണര് സെഞ്ച്വറി നേടിയ ശേഷവും തകര്ത്തടിച്ചെങ്കിലും 41-ാം ഓവറില് വീണു. 67 പന്തുകള് നേരിട്ട താരം ഏഴ് സിക്സും ഒമ്പത് ഫോറും നേടി. അലക്സ് ഗ്രീന് (0) പുറത്താവാത നിന്നു.
നേരത്തെ, വൈഭവ് സൂര്യവംശിക്ക് പുറമെ ആയുഷ് മാത്രെ (53) മികച്ച ബാറ്റിംഗ് കാഴ്ച വച്ചു. ഇന്ത്യക്ക് നാലാം ഓവറില് തന്നെ തിരിച്ചടിയേറ്റു. സെമിയില് അഫ്ഗാനിസ്ഥാനെതിരെ സെഞ്ച്വറി നേടിയ മലയാളി താരം ആരോണ് ജോര്ജ് 11 പന്തില് 9 റണ്സെടുത്ത് അലക്സ് ഗ്രീനിന്റെ പന്തില് ബെന് മയെസിന് ക്യാച്ച് നല്കി. തുടര്ന്ന് വൈഭവും ആയുഷ് മാത്രെയും തകര്ത്തടിച്ചതോടെ എട്ടാം ഓവറില് ഇന്ത്യ 50 കടന്നു. ഇരുവരും 142 റണ്സ് കൂട്ടിച്ചേര്ത്തു. മാത്രെ അലക്സ് ഗ്രീനിന്റെ പന്തില് മയേസ് ക്യാച്ചെടുത്ത് പുറത്തായി.
വൈഭവ് സൂര്യവംശി വേദാന്ത് ത്രിവേദിക്കൊപ്പം 89 റണ്സ് ചേര്ത്ത ശേഷമാണ് ഗ്രീനിന്റെ പന്തില് മടങ്ങിയത്. 15 വീതം സിക്സും ഫോറും ഉള്പ്പെടുന്നതായിരുന്നു വൈഭവിന്റെ ഇന്നിംഗ്സ്. വേദാന്ത് (32), വിഹാല് മല്ഹോത്ര (30), അഭിഗ്യാന് കുണ്ടു (40) എന്നിവരെല്ലാം ഭേദപ്പെട്ട പ്രകടനം പുറത്തെടുത്തു.കനിഷ് ചൗഹാന് 20 പന്തില് പുറത്താവാതെ 37 റണ്സ് നേടി. ദീപേഷ് ദേവേന്ദ്രന് (0) പുറത്താവാതെ നിന്നു.
ആര്എസ് ആംബ്രിഷ് (18), ഖിലന് പട്ടേല് (3), ഹെനില് പട്ടേല് (5) എന്നിവരാണ് പുറത്തായ മറ്റുതാരങ്ങള്. ജെയിംസ് മിന്റോ ഇംഗ്ലണ്ടിന് വേണ്ടി മൂന്ന് വിക്കറ്റ് വീഴ്ത്തി. സെബാസ്റ്റ്യയന് മോര്ഗന്, അലക്സ് ഗ്രീന് എന്നിവര് രണ്ട് വിക്കറ്റ് വീതമെടുത്തു.
അണ്ടര് 19 ക്രിക്കറ്റിലെ ഇന്ത്യയുടെ ആറാം ലോകകിരീടമാണിത്. നേരത്തേ 2000, 2008, 2012, 2018, 2022 എന്നീ വര്ഷങ്ങളില് ഇന്ത്യ കിരീടം നേടിയിട്ടുണ്ട്.
