ഇംഫാല്(മണിപ്പൂര്): ഓരോ നിമിഷവും രാഷ്ട്രത്തിനായി ജീവിക്കുകയും രാഷ്ട്രസേവനത്തിനായി സ്വയം സമര്പ്പിക്കുകയും വേണമെന്ന് ആര്എസ്എസ് സഹസര്കാര്യവാഹ് അരുണ്കുമാര്. ഇറോയിസെംബയിലെ കാര്ഷിക കോളേജ് ഓഡിറ്റോറിയത്തില് സംഘം: സേവനത്തിന്റെ 100 വര്ഷങ്ങള്” എന്ന വിഷയത്തില് സംഘടിപ്പിച്ച യുവസംവാദത്തില് സംസാരിക്കുകയായിരുന്നു അദ്ദേഹം.
ഭാരതം ജീവനുള്ള നാഗരികതയാണ്. ഇടമുറിയാത്ത സാംസ്കാരികത്തുടര്ച്ചകൊണ്ട് സമാനതകളില്ലാത്തതാണ് അതിന്റെ പാരമ്പര്യം. ആയിരക്കണക്കിന് വര്ഷത്തെ ഈ സാംസ്കാരിക യാത്രയിലൂടെ ആഴത്തില് വേരോടിയ സാമൂഹികബോധമാണ് നമ്മുടെ ഭരണഘടനയുടെ അടിവേരെന്ന് അരുണ്കുമാര് പറഞ്ഞു.
രാഷ്ട്ര നിര്മ്മാണത്തിന്റെ അടിത്തറയാണ് വ്യക്തി നിര്മ്മാണമെന്ന കാഴ്ചപ്പാടിലാണ് സംഘം അതിന്റെ പ്രവര്ത്തനം രൂപപ്പെടുത്തിയിട്ടുള്ളത്. മഹത്തുക്കള് മഹത്തായ രാഷ്ട്രങ്ങളെ സൃഷ്ടിക്കുന്നു. രാഷ്ട്രീയ സ്വാതന്ത്ര്യം കൈവന്നതുകൊണ്ടുമാത്രം രാഷ്ട്രത്തിന്റെ ഭാവി സുരക്ഷിതമാകില്ല. അതിന് പൗരന്മാര്ക്കിടയില് ധാര്മ്മിക ശക്തി, അച്ചടക്കം, സാമൂഹിക ഉത്തരവാദിത്തം എന്നിവ ഉണ്ടാകണം.
വ്യക്തിപരവും സാമൂഹികവുമായ പരിവര്ത്തനത്തിലൂടെ ജനങ്ങളെയും രാഷ്ട്രത്തെയും ഒന്നിപ്പിക്കുകയാണ് സംഘം ചെയ്യുന്നത്. ദേശീയ പുനരുജ്ജീവനത്തിലേക്കുള്ള പാതയില് അഞ്ച് കാര്യങ്ങളില് ശ്രദ്ധ പതിയേണ്ടതുണ്ട്. നമ്മുടെ തനിമയെ മനസിലാക്കുക, രാഷ്ട്രത്തെ ഒന്നാമതെത്തിക്കുക, ഐക്യവും അച്ചടക്കവും നിലനിര്ത്തുക, വെല്ലുവിളികള്ക്കെതിരെ ജാഗ്രത പാലിക്കുക, ഇനിയും ബാക്കിനില്ക്കുന്ന കൊളോണിയല് ചിന്താഗതികള് ഇല്ലാതാക്കുക എന്നിവയാണ് ആ അഞ്ച് കാര്യങ്ങള്.
പൈതൃകത്തിലുള്ള വിശ്വാസം നഷ്ടപ്പെടുന്നത് സമൂഹത്തെ ദുര്ബലപ്പെടുത്തുമെന്നും തനിമ തിരിച്ചറിഞ്ഞ് ഒരുമിച്ചാല് അത് നമ്മളെ ശക്തിപ്പെടുത്തുമെന്നും അരുണ്കുമാര് പറഞ്ഞു.
യുവസമൂഹം ജീവിതത്തെ ലക്ഷ്യബോധമുള്ളതാക്കണം. ഓരോ ജീവിതത്തിനും നിര്വഹിക്കാന് ഒരു ദൗത്യമുണ്ടെന്ന് തിരിച്ചറിയണം. ഒരു പ്രധാന സാമൂഹിക വെല്ലുവിളിയെങ്കിലും പരിഹരിക്കാന് പ്രതിജ്ഞാബദ്ധരാകണം, അദ്ദേഹം പറഞ്ഞു.സിഎയു വൈസ് ചാന്സലര് പ്രൊഫ. അനുപം മിശ്ര അധ്യക്ഷത വഹിച്ചു.
