തവനൂര്: മാഘമക മഹോത്സവത്തിന്റെ ഭാഗമായി തവനൂര് മഹാദേവ ഘട്ടില് നടന്ന അഘോരി പൂജ അത്യപൂര്വ്വ കാഴ്ചയായി. സര്വ്വ ചരാചരങ്ങളിലും ഈശ്വരനെ ദര്ശിക്കുന്ന ഭയരഹിതമായ അവസ്ഥയാണ് അഘോരി പൂ ജ. നിളാ തീരത്ത് പ്രത്യേകം തയാറാക്കിയ സ്ഥലത്ത് ഹോമകുണ്ഡമൊരുക്കി അര്ദ്ധരാത്രി തുടങ്ങിയ പൂജ പുലര്ച്ചയോടെയാണ് അവസാനിച്ചത്.
കാശിയിലെ മണികര്ണിക , താരാപീഢ്, കാമാഘ്യ എന്നീ ശ്മശാനങ്ങളില് നടക്കുന്ന അഘോരി പൂജ ദക്ഷിണ ഭാരതത്തില് എവിടെയും നടക്കാറില്ല. മണികര്ണിക ഘട്ടില് ആഘോര തന്ത്ര സാധന അനുഷ്ഠിക്കുന്ന മഹാമണ്ഡലേശ്വര് ആചാര്യ മണികണ്ഠ അഘോരി നേതൃത്വം നല്കി. മഹാമാകമഹോത്സവത്തിന്റെ ഭാഗമായി മാതാ അമൃതാനന്ദമയീ മഠത്തിലെ സംന്യാസിനികളും ബ്രഹ്മചാരിണിമാരും നടത്തിയ മഹാ സുദര്ശന ഹോമം ശ്രദ്ധേയമായി. സ്ത്രീകളെ പൂജകളും ഹോമങ്ങളും പഠിപ്പിച്ച് അവരിലൂടെ സമൂഹത്തില് പരിവര്ത്തനം നടത്തുക എന്നതാണ് ഇതിലൂടെ മാതാ അമൃതാനന്ദമയീ ദേവി ലക്ഷ്യമാക്കുന്നത്.
മഹാമാഘ മഹോത്സവത്തിന്റെ ഭാഗമായി, ഇന്ന് ദ്വാദശി തിഥി (വിശ്വകര്മ്മ ദിനം), പ്രദോഷവ്രതം, തിരുവാതിര നക്ഷത്രം എന്നീ പുണ്യയോഗത്തില് വിശ്വകര്മ്മ പൂജ നടത്തും. ആചാര്യത്വം വഹിക്കുന്നത് മുതുകൃഷ്ണന് ആചാരിയാണ്. വൈകിട്ട് ദേവി പൂജയും നൃത്താരാധനയും. ആചാര്യത്വം വഹിക്കുന്നത് കാട്ടുനായ്ക്കര് സമുദായത്തില്പ്പെട്ട വെള്ളഗ അമ്മയാണ്. പാരമ്പര്യമായി കൈമാറി വന്ന ആരാധനാവിധാനങ്ങളോടെയാണ് ചടങ്ങ് നടത്തുന്നത്.
