കൊച്ചി: ശബരിമല സ്വര്ണക്കൊള്ള കേസില് ദേവസ്വം മുന് മന്ത്രിയും സി പി എം നേതാവുമായ കടകംപളളി സുരേന്ദ്രനെ ചോദ്യം ചെയ്യാനൊരുങ്ങി എന്ഫോഴ്സ്മെന്റ് ഡയറക്ടറേറ്റ്(ഇഡി). കടകംപള്ളി അടക്കം 12 പേര്ക്ക് നോട്ടീസ് അയയ്ക്കാന് നിയമോപദേശം ലഭിച്ചതിന് പിന്നാലെയാണ് കേസില് വിശദമായ ചോദ്യം ചെയ്യലിന് ഇഡി ഒരുങ്ങുന്നത്.
ഉണ്ണികൃഷ്ണന് പോറ്റി, കര്ണാടകയിലെ ജ്വല്ലറി ഉടമ ഗോവര്ധന്, ചെന്നൈ സ്മാര്ട്ട് ക്രിയേഷന്സ് ഉടമ പങ്കജ് ഭണ്ഡാരി, തിരുവിതാംകൂര് ദേവസ്വം ബോര്ഡ് മുന് അഡ്മിനിസ്ട്രേറ്റീവ് ഓഫീസര് മുരാരി ബാബു എന്നിവരെയാകും ആദ്യഘട്ടത്തില് ചോദ്യംചെയ്യുക.
പ്രതികളുടെ ചോദ്യംചെയ്യല് പൂര്ത്തിയാകുന്നതോടെ കടകംപള്ളി സുരേന്ദ്രനെയും വിളിച്ചുവരുത്താനാണ് ഇഡി ഒരുങ്ങുന്നത്. എന്നാല്, ചോദ്യം ചെയ്യാനുള്ളവരുടെ പട്ടികയില് തന്ത്രി കണ്ഠര് രാജീവരെ ഇതുവരെ ഉള്പ്പെടുത്തിയിട്ടില്ലെന്നാണ് വിവരം.
അതിനിടെ, കേസില് വിവിധയിടങ്ങളില് ഇഡി നടത്തിയ പരിശോധനയില് പിടിച്ചെടുത്ത രേഖകളില് വ്യക്തത തേടി പ്രതികള്ക്കും സ്ഥാപനങ്ങള്ക്കും ഇഡി നോട്ടീസ് അയച്ചു.ഉണ്ണികൃഷ്ണന് പോറ്റി, മുരാരി ബാബു, ചെന്നൈയിലെ സ്മാര്ട്ട് ക്രിയേഷന്സ് എന്നിവര്ക്കാണ് നോട്ടീസ് അയച്ചത്.നേരിട്ടോ അഭിഭാഷകന് മുഖേനയോ വിവരങ്ങള് അറിയിക്കാനാണ് ആവശ്യപ്പെട്ടിട്ടുളളത്.
