നാരീശക്തിയുടെ പ്രതീകമായി നാവികസേനയുടെ ടാബ്ലോയില് കോഴിക്കോട് പറമ്പില് ബസാര് സ്വദേശിനി ലഫ്. കമാന്ഡര് കെ. ദില്ന അണിനിരക്കും. നാവികസാഗര് പരിക്രമ രണ്ടിന്റെ ഭാഗമായി ഐഎന്എസ്വി തരിണിയില് ലോകസഞ്ചാരം വിജയകരമായി പൂര്ത്തിയാക്കിയ ആളാണ് ദില്ന.
യാത്രയില് ഒപ്പമുണ്ടായിരുന്ന പോണ്ടിച്ചേരി സ്വദേശി ലഫ്. കമാന്ഡര് സി.ആര്. രൂപയും ടാബ്ലോയുടെ ഭാഗമാകും. ഭാരതത്തിലെ ആദ്യ തദ്ദേശീയ വിമാനവാഹിനിക്കപ്പലായ ഐഎന്എസ് വിക്രാന്തിന്റെ മാതൃകയും പായ്കപ്പലായ ഐഎന്എസ്വി കൗണ്ടിനിയയുടെ മാതൃകയുമാണ് നാവികസേന അവതരിപ്പിക്കുന്നത്. ബാബു ശങ്കരന്റെ നേതൃത്വത്തില് കേരളത്തില് നിന്നുള്ള സംഘമാണ് ടാബ്ലോ നിര്മിച്ചത്. വ്യോമസേനയുടെ ബാന്ഡ് സംഘത്തെ നയിക്കുന്നത് മലയാളി ഉദ്യോഗസ്ഥരായ വൈപ്പിന് സ്വദേശി പി.എസ്. ആകാശ്, പി.ബി. സുമിത്ത് എന്നിവരാണ്. മലയാളികളായ മൂന്ന് അഗ്നിവീര് വനിതകളും സംഘത്തിലുണ്ട്.
