തിരുവനന്തപുരം:ബിജെപി തിരുവനന്തപുരം ജില്ലാ പ്രസിഡന്റിന് ബിജെപി ഭരണത്തിലുളള കോര്പറേഷന് പിഴ ഇട്ടത് സ്വാഭാവിക നടപടിയാണെന്ന് മേയര് വി വി രാജേഷ്. അനധികൃത ഫ്ളക്സുകള് മാറ്റുന്ന നടപടികളെ കുറിച്ച് ഹൈക്കോടതിയെ അറിയിക്കേണ്ട ബാധ്യത കോര്പ്പറേഷന് ഉണ്ട്. താന് പാര്ട്ടി അധ്യക്ഷന് ആയിരുിക്കുമ്പോഴും ഇത്തരത്തില് കോര്പ്പറേഷന് നോട്ടീസ് നല്കിയിട്ടുണ്ട്. ഇത് വിവാദം ആക്കേണ്ട കാര്യമില്ലെന്നും വിവി രാജേഷ് പറഞ്ഞു.
പ്രധാനമന്ത്രിയെ വിമാനത്താവളത്തില് സ്വീകരിക്കാന് പോകാത്ത സംഭവത്തില് മന്ത്രി വി ശിവന്കുട്ടിയുടെ പരാമര്ശങ്ങള്ക്ക് മറുപടി പറയുന്നില്ല. ശിവന്കുട്ടി പറയുന്നതൊക്കെ താന് ആസ്വദിക്കുകയാണെന്നും വിവി രാജേഷ് പറഞ്ഞു. വിമാനത്താവളത്തില് പോയിരുന്നെങ്കില് 40 വാഹനങ്ങളുടെ പിന്നിലായിരിക്കും തന്റെ വാഹനം. പ്രധാനമന്ത്രി തമ്പാനൂരില് എത്തുമ്പോള് താന് പിഎംജിയില് ആകും. പിന്നീട് ഒരു വാഹനവും ആ വഴി കടത്തിവിടില്ല.
പ്രധാനമന്ത്രി വേദിയില് കയറിയാല് പിന്നീട് ആരെയും വേദിയിലേക്ക് കയറ്റില്ല. പ്രോട്ടോകോളിനെ കുറിച്ച് ശിവന്കുട്ടി ഒന്നും പറയേണ്ടതില്ല. ശിവന്കുട്ടി നിയമസഭയില് നടത്തിയ പ്രോട്ടോകോള് ഒക്കെ നമ്മള് കണ്ടതാണെന്നും മേയര് വിവി രാജേഷ് പരിഹസിച്ചു.
