ഇന്ത്യൻ സൈന്യത്തിന്റെ റോക്കറ്റ് ആയുധശേഖരത്തിന്റെ വ്യാപ്തി നൂതന റാംജെറ്റ് സാങ്കേതികവിദ്യ ഉപയോഗിച്ച് വർദ്ധിപ്പിക്കാൻ ഒരുങ്ങി ഐഐടി-മദ്രാസ് . ഇൻസ്റ്റിറ്റ്യൂട്ടിലെ പ്രൊപ്പൽഷൻ ഡിവിഷനിലെ ഗവേഷകർ നിലവിലുള്ള മൾട്ടിപ്പിൾ ലോഞ്ച് റോക്കറ്റ് സിസ്റ്റങ്ങളുമായി, പ്രത്യേകിച്ച് തദ്ദേശീയമായി നിർമ്മിച്ച പിനാകയിലേക്കും റാംജെറ്റ് എഞ്ചിനുകൾ സംയോജിപ്പിക്കും.
ഇത് ഇന്ത്യയുടെ അഭിമാന ആയുധങ്ങളില് ഒന്നായ പിനാക റോക്കറ്റ് സിസ്റ്റത്തിന്റെ കരുത്ത് വർധിപ്പിക്കും . ഇന്ത്യൻ സൈന്യം വ്യാപകമായി ഉപയോഗിക്കുന്ന സോവിയറ്റ് കാലഘട്ടത്തിലെ മൾട്ടിപ്പിൾ റോക്കറ്റ് ലോഞ്ചറായ ബിഎം-21 ഗ്രാഡിന് നിലവിൽ റോക്കറ്റ് വേരിയന്റിനെ ആശ്രയിച്ച് പരമാവധി 20 മുതൽ 40 കിലോമീറ്റർ വരെ ദൂരം സഞ്ചരിക്കാൻ കഴിയും.
റാംജെറ്റ് പ്രൊപ്പൽഷൻ ഉൾപ്പെടുത്തുന്നതിലൂടെ, ഇത് 80 കിലോമീറ്ററിലധികം വർധിപ്പിക്കാനാകും. അതിവേഗ വായുസഞ്ചാരത്തിലൂടെ ജ്വലനം നിലനിർത്തുന്ന റാംജെറ്റുകൾ, പരമ്പരാഗത ഖര-ഇന്ധന റോക്കറ്റുകളെ അപേക്ഷിച്ച് മികച്ച ഇന്ധനക്ഷമതയും സൂപ്പർസോണിക് വേഗതയും നൽകുന്നു.
ഇന്ത്യയുടെ ആയുധപ്പുരയിലെ സുപ്രധാനമായ ആയുധമാണ് പിനാക എന്ന റോക്കറ്റ് സംവിധാനം. ശത്രുമുന്നേറ്റങ്ങളെയും സംവിധാനങ്ങളെയും കിറുകൃത്യമായി ആക്രമിക്കാൻ ഉപയോഗിക്കുന്ന പിനാക റോക്കറ്റുകള് വിക്ഷേപിക്കുന്നത് വാഹനങ്ങളില് ഘടിപ്പിച്ച റോക്കറ്റ് ലോഞ്ചറില്നിന്നാണ്. തന്ത്രപ്രധാനമായ ആയുധമായ പിനാക ഇന്ന് പല രാജ്യങ്ങളിലേക്കും ഇന്ത്യ കയറ്റുമതി ചെയ്യുന്നുണ്ട്.
