ഡ്രൈ ഫ്രൂട്സും നട്സും പോഷകങ്ങളുടെ കലവറയാണ്. ആരോഗ്യകരമായ കൊഴുപ്പുകൾ, ഫൈബർ, വിറ്റാമിനുകൾ, ധാതുക്കൾ എന്നിവ ഇവയിൽ ധാരാളമുണ്ട്.
രിയായ സമയത്ത്, ശരിയായ അളവിൽ കഴിച്ചാൽ മാത്രമേ ഡ്രൈ ഫ്രൂട്സിന്റെയും നട്സിന്റെയും ഗുണങ്ങൾ പൂർണ്ണമായി ശരീരത്തിന് ലഭിക്കൂ. ഇത് തടി കുറയ്ക്കാൻ മാത്രമല്ല, ഊർജ്ജം കൂട്ടാനും, ദഹന പ്രശ്നങ്ങൾ കുറയ്ക്കാനും, നല്ല ഉറക്കം കിട്ടാനുമെല്ലാം സഹായിക്കും. ഡ്രൈ ഫ്രൂട്സും നട്സും എപ്പോൾ, എങ്ങനെ കഴിക്കണം എന്നതിനെക്കുറിച്ച് കൂടുതൽ കാര്യങ്ങൾ നോക്കാം
ദിവസത്തിന്റെ തുടക്കത്തിൽ ഇവ കഴിക്കുന്നത് പോഷകങ്ങൾ നന്നായി ആഗിരണം ചെയ്യാൻ സഹായിക്കും. വ്യായാമത്തിന് മുൻപ് ഈന്തപ്പഴവും നട്സും കഴിക്കുന്നത് മികച്ച ഊർജ്ജം നൽകും. അതുപോലെ, വൈകുന്നേരങ്ങളിൽ മഗ്നീഷ്യo അടങ്ങിയ ബദാം പോലെയുള്ള നട്സ് കഴിക്കുന്നത് നല്ല ഉറക്കത്തിന് സഹായിക്കുന്നു.
രാവിലെ ഒഴിഞ്ഞ വയറ്റിൽ ഡ്രൈ ഫ്രൂട്സും നട്സും കഴിക്കുന്നത് ദഹനപ്രവർത്തനങ്ങൾ മെച്ചപ്പെടുത്താൻ സഹായിക്കും. ഇത് മെറ്റബോളിസം കൂട്ടാനും ദിവസം മുഴുവൻ ഊർജ്ജസ്വലരായിരിക്കാനും ഉപകരിക്കും. ബദാം, വാൾനട്ട്, ഉണക്കമുന്തിരി, അത്തിപ്പഴം എന്നിവ രാത്രി മുഴുവൻ വെള്ളത്തിൽ കുതിർത്തതിന് ശേഷം രാവിലെ കഴിക്കുന്നത് വളരെ നല്ലതാണ്.
ഭക്ഷണങ്ങൾക്കിടയിൽ വിശപ്പ് തോന്നുമ്പോൾ ഒരുപിടി നട്സോ ഡ്രൈ ഫ്രൂട്സോ കഴിക്കുന്നത് ഏറെ നല്ലതാണ്. ഇത് പെട്ടെന്ന് വിശപ്പ് മാറ്റാൻ സഹായിക്കും. അതുപോലെ, ഉച്ചയ്ക്ക് ശേഷമുള്ള ക്ഷീണവും മന്ദതയും ഒഴിവാക്കി ദിവസം മുഴുവൻ ഉന്മേഷത്തോടെയിരിക്കാനും ഇത് സഹായിക്കും.
ശരീരഭാരം നിയന്ത്രിക്കാനാണ് ഉദ്ദേശിക്കുന്നതെങ്കില് ബദാം, വാൾനട്ട് തുടങ്ങിയ നട്സ് ദിവസത്തിന്റെ ആദ്യ പകുതിയിൽ കഴിക്കുന്നതാണ് നല്ലത്. ഇത് ശരീരത്തിലെ കൊഴുപ്പ് എളുപ്പത്തിൽ കത്തിച്ചുകളയാന് സഹായിക്കും. എന്നാല് ഇങ്ങനെയുള്ളപ്പോള് രാത്രിയിൽ നട്സ് കഴിക്കുന്നത് ഒഴിവാക്കുക, കാരണം ഇത് കൊഴുപ്പടിയാൻ കാരണമായേക്കാം.
പ്രൂൺസ്, അത്തിപ്പഴം, ഉണക്കമുന്തിരി എന്നിവയിൽ നാരുകൾ ധാരാളമുണ്ട്. ഇത് മലവിസർജ്ജനം സുഗമമാക്കാൻ സഹായിക്കും. രാവിലെ ഇവ കഴിക്കുന്നത് ദഹനത്തിന് വളരെ നല്ലതാണ്. വൈകുന്നേരം കുതിർത്ത ആപ്രിക്കോട്ട്, വാൾനട്ട് എന്നിവ കഴിക്കുന്നത് ഉറക്കത്തിന് മുൻപ് വയറ്റിൽ ഭാരം തോന്നിക്കാതെ ദഹനം സുഗമമാക്കും.
ബദാം, വാൾനട്ട്, പിസ്ത തുടങ്ങിയ നട്സിൽ ഉറക്കത്തെ സഹായിക്കുന്ന മഗ്നീഷ്യവും മെലറ്റോണിനും അടങ്ങിയിട്ടുണ്ട്. രാത്രിയിൽ ഇവ ചെറിയ അളവിൽ കഴിക്കുന്നത് സ്വാഭാവികമായ നല്ല ഉറക്കം ലഭിക്കാൻ സഹായിക്കും.
വാൾനട്ട് ഏത് സമയത്ത് കഴിക്കുന്നു എന്നതിനനുസരിച്ച് വ്യത്യസ്ത ഗുണങ്ങൾ നൽകുന്നു. രാവിലെ കഴിക്കുന്നത് തലച്ചോറിന്റെ പ്രവർത്തനങ്ങൾ, രക്തത്തിലെ പഞ്ചസാരയുടെ നിയന്ത്രണം, ഹൃദയാരോഗ്യം എന്നിവയ്ക്ക് നല്ലതാണ്. രാത്രിയിൽ വാൾനട്ട് കഴിക്കുന്നത് ഉറക്കമില്ലായ്മ, മാനസിക സമ്മർദ്ദം എന്നിവ കുറയ്ക്കാൻ സഹായിക്കും.
