കിഷ്ത്വാര്: ജമ്മുകശ്മീരിലെ കിഷ്ത്വാറില് ജെയ്ഷെ മുഹമ്മദ് ഭീകരസംഘടനയുടെ ഒൡത്താവളം സേന തകര്ത്തു. കഴിഞ്ഞ ദിവസം സേനയും ഭീകരരും തമ്മിലുണ്ടായ വെടിവെപ്പില് ഒരു ഹവില്ദാര് വീരമൃത്യു വരിക്കുകയും എട്ട് ജവാന്മാര്ക്ക് പരിക്കേല്ക്കുകയും ചെയ്തിരുന്നു. തുടര്ന്ന് വെടിവപ്പ് നടന്ന സ്ഥലത്തിന് സമീപം നടത്തിയ തെരച്ചിലിലാണ് ഒളിത്താവളം കണ്ടെത്തിയത്. ഭക്ഷ്യവസ്തുക്കള്, പാത്രങ്ങള്, ഗ്യാസ് സിലിണ്ടര്, സ്റ്റൗ എന്നിവയുള്പ്പെടെ വിവിധ വസ്തുക്കളാണ് ഒളിത്താവളത്തില് നിന്ന് കണ്ടെത്തിയത്.
ഒന്നിലധികം ആളുകള്ക്ക് താമസിക്കാനാകുന്ന തരത്തില് ഏറ്റുമുട്ടലുകളെയും പ്രതികൂല കാലാവസ്ഥയെയും നേരിടാനാകുന്ന രീതിയില് കല്ലുകൊണ്ട് രൂപകല്പന ചെയ്തതായിരുന്നു ഒളിത്താവളം. മാസങ്ങളോളം താമസിക്കാനാകുന്ന തരത്തില് 50 ഓളം ന്യൂഡില്സ് പാക്കറ്റുകള് 20 കിലോയോളം അരി, ധാന്യങ്ങള്, ഉണങ്ങിയ വിറക്, പച്ചക്കറി, 15 ഓളം ഇനം സുഗന്ധവ്യഞ്ജനങ്ങള് എന്നിവ ഒളിത്താവളത്തിലുണ്ടായിരുന്നു. ജെയ്ഷെ മുഹമ്മദ് കമാന്ഡര് സൈഫുള്ളയും ഡെ. കമാന്ഡര് ആദിലുമാണ് ഒളിത്താവളത്തിലുണ്ടായിരുന്നത് എന്നാണ് റിപ്പോര്ട്ട്. ഇതുമായി ബന്ധപ്പെട്ട് നാല് പ്രദേശവാസികളെയും കസ്റ്റഡിയിലെടുത്തിട്ടുണ്ട്. പ്രദേശവാസികളുടെ സഹായമില്ലാതെ ഒളിത്താവള നിര്മാണം സാധ്യമല്ലെന്നും കൂടാതെ ഇത്രയധികം ഭക്ഷണവസ്തുക്കള് കൊണ്ടുപോകുന്നതിനും സഹായം ലഭിച്ചിരിക്കാം എന്ന സുരക്ഷാ ഏജന്സികളുടെ കണ്ടെത്തലിനെത്തുടര്ന്നാണ് ഇവരെ കസ്റ്റഡിയിലെടുത്തിട്ടുള്ളത്. പ്രദേശത്ത് തെരച്ചില് തുടരുകയാണ്.
