കോഴിക്കോട് : സമൂഹ മാധ്യമങ്ങളിലൂടെ ദൃശ്യം പ്രചരിച്ചതിനു പിന്നാലെ അപമാന ഭീതി ഭയന്ന് ജീവനൊടുക്കിയ ദീപക്കിന്റെ വീട്ടിലെത്തി സന്തോഷ് പണ്ഡിറ്റ് . അദ്ദേഹം തന്നെയാണ് ഇതിന്റെ ദൃശ്യങ്ങൾ ഫേസ്ബുക്കിൽ പങ്ക് വച്ചത്.
‘ കഴിഞ്ഞ ദിവസം ആത്മഹത്യ ചെയ്ത ദീപക് ജിയുടെ വീട്ടിൽ ചെന്നിരുന്നു. അദ്ദേഹത്തിന്റെ അച്ഛനെയും, അമ്മയെയും ആശ്വസിപ്പിച്ചു. ഏക മകനെ നഷ്ടപ്പെട്ട അവർ വളരെ വേദനയിൽ ആണ്. ‘ എന്നും അദ്ദേഹം ഫേസ്ബുക്ക് പോസ്റ്റിൽ കുറിച്ചു.
കഴിഞ്ഞ ദിവസവും സന്തോഷ് പണ്ഡിറ്റ് ഇതിനെ കുറിച്ച് ഫേസ്ബുക്ക് കുറിപ്പ് പങ്ക് വച്ചിരുന്നു. ‘ ആണുങ്ങൾക്ക് ഈ സംഭവമൊക്കെ വലിയ പാഠമാണ്.. സ്ത്രീകളെ കാണുമ്പോൾ പരമാവധി വിട്ട് നടന്നാൽ അവനവനു കൊള്ളാം. ഏതെങ്കിലും പെണ്ണ് എന്തെങ്കിലും പറഞ്ഞു വിഡിയോ ഉണ്ടാക്കി വൈറൽ ആക്കിയാൽ കോടതിയോ മാധ്യമങ്ങളോ പൊലീസോ ആരും നിങ്ങളുടെ കൂടെ ഉണ്ടാകില്ല. ഓർത്തോ. സ്ത്രീകൾക്ക് മാത്രമല്ലല്ലോ, പുരുഷനും അന്തസ്സ് ഉണ്ട്.
ഒരു ലക്ഷം ആളുകൾ ഇത്തരം വിഡിയോസ് കാണുമ്പോൾ മിനിമം 1000 പേരെങ്കിലും നിങ്ങൾ ഞരമ്പൻ ആണെന്ന് വിശ്വസിക്കും..ഇദ്ദേഹം നിരപരാധി ആണെന്ന് വിശ്വസിക്കുന്നു എങ്കിൽ ഈ അവസ്ഥയെ ധൈര്യപൂർവം നേരിടണമായിരുന്നു.. നിരപരാധിത്വവും സമൂഹത്തിന്റെ മുന്നിൽ തെളിയിക്കണം ആയിരുന്നു. ആത്മഹത്യ ഒന്നിനും പരിഹാരമല്ല. ‘ എന്നും അദ്ദേഹം പറഞ്ഞിരുന്നു.
