ന്യൂദല്ഹി: ബിജെപിയുടെ പുതിയ ദേശീയ അധ്യക്ഷനെ ഇന്ന് പ്രഖ്യാപിക്കും. ഇന്നലെ നാമനിര്ദേശപത്രികാ സമര്പ്പണവും പത്രികകളുടെ സൂക്ഷ്മ പരിശോധനയും പൂര്ത്തിയായി. ആകെ 37 സെറ്റ് പത്രികകളാണ് സമര്പ്പിക്കപ്പെട്ടത്. നിലവിലെ വര്ക്കിങ് പ്രസിഡന്റ് നിതിന് നബിന്റെ പേര് പ്രസിഡന്റ് സ്ഥാനത്തേക്ക് നിര്ദേശിച്ചുള്ളതാണ് സമര്പ്പിക്കപ്പെട്ട മുഴുവന് പത്രികകളും. പ്രസിഡന്റ് സ്ഥാനത്തേക്ക് നിതിന് നബിന്റെ പേര് മാത്രമാണ് നിര്ദേശിക്കപ്പെട്ടതെന്ന് റിട്ടേണിങ് ഓഫീസര് കെ. ലക്ഷ്മണ് വാര്ത്താക്കുറിപ്പില് അറിയിച്ചു. സമര്പ്പിക്കപ്പെട്ട മുഴുവന് പത്രികകളും സാധുവാണെന്നും എല്ലാ പത്രികകളും സ്വീകരിച്ചതായും അദ്ദേഹം അറിയിച്ചു. ഇന്ന് ഔദ്യോഗിക പ്രഖ്യാപനം നടക്കും.
നിലവിലെ ദേശീയ അധ്യക്ഷന് ജെ.പി. നഡ്ഡയുടെ നേതൃത്വത്തില് പാര്ലമെന്ററി പാര്ട്ടി അംഗങ്ങളെ പ്രതിനിധീകരിച്ചാണ് ആദ്യ സെറ്റ് പത്രിക സമര്പ്പിച്ചത്. തുടര്ന്ന് വിവിധ സംസ്ഥാനഘടകങ്ങള് ഓരോ സെറ്റ് പത്രിക വീതം സമര്പ്പിച്ചു. മുന് ദേശീയ അദ്ധ്യക്ഷന്മാരായ രാജ് നാഥ് സിങ്, അമിത്ഷാ, നിതിന് ഗഡ്കരി, കേന്ദ്ര മന്ത്രിമാരായ നിര്മ്മലാ സീതാരാമന്, പിയൂഷ് ഗോയല്, കിരണ് റിജിജു, ധര്മ്മേന്ദ്ര പ്രധാന്, ഹര്ദീപ്സിങ് പുരി, ഭൂപേന്ദ്ര യാദവ് തുടങ്ങിയവരാണ് ജെ.പി.നഡ്ഡക്കൊപ്പം പത്രിക സമര്പ്പിക്കാന് എത്തിയത്. ബിജെപി ഭരിക്കുന്ന വിവിധ സംസ്ഥാനങ്ങളില് നിന്നുള്ള മുഖ്യമന്ത്രിമാരും സംസ്ഥാന അധ്യക്ഷന്മാരും ചേര്ന്നാണ് സംസ്ഥാനങ്ങളെ പ്രതിനിധീകരിച്ച് നാമനിര്ദേശ പത്രിക സമര്പ്പിച്ചത്. കേരളത്തില് നിന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖറിന്റെ നേതൃത്വത്തിലാണ് പത്രിക സമര്പ്പിച്ചത്.
ദീന്ദയാല് ഉപാധ്യായ മാര്ഗിലെ പാര്ട്ടി ദേശീയ ആസ്ഥാനത്ത് ഇന്നലെ ഉച്ചക്ക് രണ്ടോടെയാണ് തെരഞ്ഞെടുപ്പ് നടപടിക്രമങ്ങള് ആരംഭിച്ചത്. ആദ്യം പത്രികാ സമര്പ്പണവും തുടര്ന്ന് സൂക്ഷ്മപരിശോധനയും നടന്നു. ആകെയുള്ള 36ല് 30 സംസ്ഥാനങ്ങളിലും പ്രസിഡന്റ് തെരഞ്ഞെടുപ്പ് പൂര്ത്തിയാക്കിയാണ് ദേശീയ പ്രസിഡന്റിനെ തെരഞ്ഞെടുക്കുന്നതിനുള്ള നടപടിക്രമങ്ങള് ആരംഭിച്ചത്. വോട്ടവകാശമുള്ള ഇലക്ടറല് കോളേജിലെ അംഗങ്ങളുടെ പട്ടിക കഴിഞ്ഞ ദിവസം പ്രസിദ്ധീകരിച്ചിരുന്നു.
ജന്മഭൂമി ഓണ്ലൈന്