തിരുനാവായ: തലമുറകളായി പിതൃകര്മങ്ങള്ക്കും പുണ്യസ്നാനങ്ങള്ക്കും സാക്ഷ്യം വഹിച്ച തിരുനാവായയിലെ ഭാരതപ്പുഴയോരത്ത് ഇന്ന് മുതല് നിളാ ആരതി. ശംഖധ്വനികളും മന്ത്രോച്ചാരണങ്ങളും ഒത്തുചേരുന്ന ഏകോപിത ദീപനൃത്തങ്ങളിലൂടെ, കാശിയിലെ ഗംഗാ ആരതിയുടെ ശാസ്ത്രീയ ശൈലി ശാന്തമായി ഒഴുകുന്ന ഭാരതപ്പുഴയിലും പ്രതിഫലിക്കും.
കാശിയിലെ ദാശാശ്വമേധ ഘാട്ടിലെ ഗംഗാ ആരതി നിര്വഹിക്കുന്ന പണ്ഡിറ്റുകള് തന്നെയാണ് ഈ നദീപൂജയ്ക്ക് നേതൃത്വം നല്കുന്നത്. ഉത്തരേന്ത്യയിലെ ഏറ്റവും പ്രശസ്തമായ നദീപൂജാരീതികള് കേരളത്തിലെ ഏറ്റവും പുണ്യനദിയായ ഭാരതപ്പുഴയ്ക്ക് സമര്പ്പിക്കുന്ന ചരിത്ര നിമിഷമാവും. അതേസമയം കേരളത്തിന്റെ ആത്മീയസൗന്ദര്യബോധം കാത്തുസൂക്ഷിക്കുന്ന തരത്തില്, പ്രാദേശിക ആരാധനാശൈലികളോട് യോജിച്ച രീതിയിലാണ് ചടങ്ങുകള് ക്രമീകരിച്ചിരിക്കുന്നത്. ഇന്ന് മുതല് മഹാമാഘം അവസാനിക്കുന്ന ഫെബ്രുവരി മൂന്ന് വരെ എല്ലാ ദിവസവും സന്ധ്യാ സമയത്തായിരിക്കും ആരതി. അതേസമയം, ഉയര്ന്നു നില്ക്കുന്ന ജ്വാലകള്, നദിയില് പ്രതിഫലിക്കുന്ന ദീപപ്രകാശം, പുരോഹിതരുടെ ഏകോപിത ചലനങ്ങള് തുടങ്ങിയവ ചേര്ന്ന്, ബ്ലോഗര്മാര്ക്കും ഫോട്ടോഗ്രാഫര്മാര്ക്കും സോഷ്യല് മീഡിയ റീല് നിര്മാതാക്കള്ക്കും അപൂര്വ ദൃശ്യവിരുന്നാവും ആരതി ഒരുക്കുന്നത്.
നദികളെ പ്രകൃതി വിഭവങ്ങളായി കാണാതെ, ജീവന്റെ ദൈവിക സ്രോതസുകളായി ആദരിക്കേണ്ടതിന്റെ ഓര്മപ്പെടുത്തലാണ് ചടങ്ങെന്ന് മഹാമാഘ സഭാപതി മഹാമണ്ഡലേശ്വര് സ്വാമി ആനന്ദവനം ഭാരതി പറഞ്ഞു.
ഭാരതപ്പുഴ ഇന്ന് നേരിടുന്ന പാരിസ്ഥിതി വെല്ലുവിളികളുടെ പശ്ചാത്തലത്തില്, നിളാ ആരതിക്ക് ആത്മീയതയോടൊപ്പം ശക്തമായ സാമൂഹിക സന്ദേശവും പകരുന്നു. നദിയെ ആരാധിക്കുന്നതിലൂടെ, നദിയെ സംരക്ഷിക്കേണ്ടത് ഒരു ആത്മീയ ബാധ്യത കൂടിയാണെന്ന ബോധം സമൂഹത്തില് വളര്ത്തുകയാണ് ലക്ഷ്യമെന്നും സ്വാമി വ്യക്തമാക്കി.
സുരക്ഷയ്ക്ക് റവന്യൂ വകുപ്പും പോലീസും
തിരുനാവായ: റവന്യു വകുപ്പും പോലീസും വന് സുരക്ഷാ സംവിധാനങ്ങളൊരുക്കുന്നുണ്ട്. സുരക്ഷാ സംവിധാനങ്ങള് ഏകോപിപ്പിക്കാന് ഒമ്പത് തഹസില്ദാര്മാരെ എക്സിക്യൂട്ടീവ് മജിസ്ട്രേറ്റുമാരായി ഇവിടേക്ക് നിയമിച്ചു. 300 പോലീസ് സേനാംഗങ്ങള് ഇവിടെയെത്തും. 150 പേര് വീതം അടങ്ങുന്ന രണ്ട് ബാച്ചുകളായി തിരിഞ്ഞാണ് സേവനം. തിരക്കു കൂടുന്ന ദിവസം കൂടുതല് സേനാംഗങ്ങളെ എത്തിക്കും. ബോംബ് സ്ക്വാഡ്, ഡോഗ് സ്ക്വാഡ് എന്നിവയുണ്ടാകും.
ദേഹപരിശോധന നടത്തിയാണ് യജ്ഞശാലയിലേക്കും ക്ഷേത്ര പരിസരത്തേക്കും ആളുകളെ കടത്തിവിടുക. മൂന്ന് ഡീപ് സേര്ച് മെറ്റല് ഡിറ്റക്ടറും സ്ഥാപിക്കും. ഇതിലൂടെ മാത്രമേ പ്രവേശിക്കാന് അനുവദിക്കൂ. പുഴയിലും കരയിലും ബോംബ് സ്ക്വാഡ് ഡിറ്റക്ടര് ഉപയോഗിച്ച് സദാസമയം പരിശോധന നടത്തും. ഡിവൈഎസ്പി ഇന്സ്പെകടര്മാര് എന്നിവര് സുരക്ഷാ കാര്യത്തില് മേല്നോട്ടം വഹിക്കും. സുരക്ഷ ഏകോപിപ്പിക്കാനാണ് എക്സിക്യൂട്ടീവ് മജിസ്ട്രേറ്റുമാരെ നിയമിച്ചിട്ടുള്ളത്.
