പണിയ നൃത്തം, മങ്ങലംകളി, ഇരുളനൃത്തം, പളിയ നൃത്തം, മലപ്പുലയാട്ടം എന്നീ ഗോത്രകലകളാണ് കലോത്സവ ദിനങ്ങളില് അരങ്ങേറിയത്. എല്ലാ മത്സരത്തിനും നിറഞ്ഞ സദസ്സായിരുന്നു. കാടിറങ്ങി വന്ന കലകള് കലോത്സവത്തെ തന്നെ കീഴടക്കുന്ന കാഴ്ചയായിരുന്നു വേദി മൂന്ന് നീലക്കുറിഞ്ഞിയില്.
പണിയ നൃത്തം, മങ്ങലംകളി, ഇരുളനൃത്തം, പളിയ നൃത്തം, മലപ്പുലയാട്ടം എന്നിവ കലോത്സവത്തിന്റെ ഭാഗമായിട്ട് ഇത് രണ്ടാം വര്ഷമാണ്. ജെന്സി പിള്ളേരുള്പ്പെടെ എല്ലാ പ്രായക്കാരും ഗോത്രപ്പെരുമയുടെ വൈബ് ആസ്വദിക്കുകയാണിപ്പോള്. സംസ്ഥാന സ്കൂള് കലോത്സവം ആദ്യദിനത്തില് പണിയനൃത്തം ആസ്വദിക്കാന് നീലക്കുറിഞ്ഞി നിറഞ്ഞിരുന്നു. രണ്ടാം ദിനത്തില് മംഗലംകളി കാണാനും അതേ വേദിയില് തിരക്ക്. മൂന്നാംദിനം മലപ്പുലയാട്ടം, ശനിയാഴ്ച രാവിലെ മുതല് ആരംഭിച്ച ഹയര്സെക്കന്ഡറി വിഭാഗം ഇരുളനൃത്തത്തിനും നിറഞ്ഞ സദസ്സ്, പളിയ നൃത്തത്തിനും കാഴ്ചക്കാരേറെ. കഴിഞ്ഞവര്ഷത്തെ അപേക്ഷിച്ച് ഗോത്രകലയ്ക്ക് പങ്കാളിത്തം കൂടുകയാണ് ഈ വര്ഷം.
പണിയ നൃത്തം വയനാട് ജില്ലയിലെ പണിയ വിഭാഗക്കാരുടെ കലാരൂപം. വട്ടക്കളി, കമ്പളക്കളി എന്നീ പേരുകളിലും ഈ കലാരൂപം അറിയപ്പെടുന്നു. വൃത്താകൃതിയില് നിന്നുകൊണ്ടാണ് ചുവടുവെയ്ക്കുന്നത്.
മാവിലന്, വേട്ടുവ ആദിവാസി സമൂഹങ്ങളുടെ വിവാഹാഘോഷങ്ങളിലെ കലാരൂപം. തുടിതാളത്തിനൊപ്പം തുളു ഭാഷയിലെ വരികളാണ് മംഗലം കളിയുടെ പ്രത്യേകത.
അട്ടപ്പാടി പ്രദേശത്തെ ഇരുള സമുദായക്കാര് അവതരിപ്പിക്കുന്ന കലാരൂപമാണ് ഇരുളനൃത്തം. നൃത്തത്തിനും സംഗീതത്തിനും തുല്യ പ്രാധാന്യം. പ്രാദേശിക ദൈവമായ മല്ലീശ്വരനെ ഉണര്ത്താനാണ് ഇരുളര് നൃത്തം ചെയ്യുന്നത്. ഇടുക്കി കുമളിയില് താമസിക്കുന്ന പളിയര് ജനവിഭാഗത്തിന്റെ പാരമ്പര്യ നൃത്തരൂപമാണ് പളിയനൃത്തം. മഴ പെയ്യുന്നതിനും രോഗശമനത്തിനും വേണ്ടിയാണ് ഈ നൃത്തം അവതരിപ്പിച്ചിരുന്നത്.
ഇടുക്കിയിലെ മലപ്പുലയന് വിഭാഗത്തില്പെട്ടവരുടെ തനത് കലാരൂപമാണ് മലപ്പുലയാട്ടം. മാരിയമ്മന്, കാളിയമ്മന്, മധുരമീനാക്ഷി എന്നീദേവതകളെ ആരാധിക്കുന്നതിന്റെ ഭാഗമായാണ് ഈ നൃത്തം അവതരിപ്പിക്കുന്നത്.
