മുംബൈ: 28 വര്ഷക്കാലം ധൂര്ത്ത ജീവിതം നയിക്കാന് സഹായിച്ച 75000 കോടി രൂപയുടെ വാര്ഷികബജറ്റുള്ള സമ്പന്നമായ മുംബൈ മുനിസിപ്പല് കോര്പറേഷന് കൈവിടാന് മടിച്ച് ഉദ്ധവ് താക്കറെയും രാജ് താക്കറെയും. ഇരുവരും ചേര്ന്ന് ഏക് നാഥ് ഷിന്ഡേ പക്ഷത്തെ ഏതാനും മുനിസിപ്പല് കൗണ്സിലര്മാരെ കുതിരക്കച്ചവടത്തിലൂടെയോ ഭീഷണിയിലൂടെയോ ചാക്കിട്ടുപിടിത്തത്തിലൂടെയോ സ്വന്തം പക്ഷത്ത് നിര്ത്താന് ഗൂഢപദ്ധതിയിട്ടതായി വിവരം.ഇതേ തുടര്ന്ന് ഷിന്ഡേ പക്ഷം അവരുടെ കൗണ്സിലര്മാരെ താജ് ഹോട്ടലിലേക്ക് മാറ്റി.
ഇതിന് ഉദ്ധവ് നല്കുന്ന വിശദീകരണം അദ്ദേഹത്തിന്റെ രാഷ്ട്രീയ കുബുദ്ധിയ്ക്ക് തെളിവാണ്. “ബിജെപിയെ പേടിച്ച് ഷിന്ഡേ പക്ഷം കൗണ്സിലര്മാരെ ഹോട്ടലിലേക്ക് മാറ്റിയിരിക്കുകയാണ്. 2022ല് പിളര്ന്നതാണ് ശിവസേന. ഒരിയ്ക്കല് പിളര്ന്നാല് വീണ്ടും പിളരുമെന്ന് ഷിന്ഡേ ഭയക്കുന്നു.” 2022ല് ഉദ്ധവ് താക്കറെയുടെ ഭരണത്തെ അട്ടിമറിച്ച് ഒരു വിഭാഗം ശിവസേന എംഎല്എമാരെ ബിജെപിയ്ക്കൊപ്പം ചേര്ത്തത് ഷിന്ഡേയുടെ നേതൃത്വത്തിലാണ്. പക്ഷെ അന്ന് ശരത് പവാറിന്റെയും കോണ്ഗ്രസിന്റെയും കൈകളിലെ കളിപ്പാവയായി മാറിയ ഉദ്ധവ് താക്കറെയ്ക്കെതിരെ സത്യസന്ധമായ ഒരു സമരം തന്നെയാണ് ഏക് നാഥ് ഷിന്ഡേ നടത്തിയത്.
വന്തുകയും സ്ഥാനമാനങ്ങളും വാഗ്ദാനം ചെയ്താണ് ഷിന്ഡേ പക്ഷത്തെ കൗണ്സിലര്മാരെ സ്വന്തംപക്ഷത്തേക്ക് കൊണ്ടുവരാനുള്ള നാണം കെട്ട കളി ഉദ്ധവ്-രാജ് താക്കറെ പക്ഷം നടത്തുന്നത്. 227 അംഗങ്ങളുള്ള മുംബൈ മുനിസിപ്പല് കോര്പറേഷനില് കേവല ഭൂരിപക്ഷത്തിന് 114 സീറ്റുകള് വേണം. ബിജെപിയാണ് ഇപ്പോള് ഏറ്റവും വലിയ ഒറ്റകക്ഷി. ബിജെപി 89 സീറ്റുകളില് വിജയിച്ചിട്ടുണ്ട്. പക്ഷെ 114 എന്ന കേവലഭൂരിപക്ഷമാകാന് ഷിന്ഡേ പക്ഷത്തിന്റെ പിന്തുണ ആവശ്യമാണ്. ഷിന്ഡേ ശിവസേനയുടെ 29 കൗണ്സിലര്മാരാണ് വിജയിച്ചിരിക്കുന്നത്. പക്ഷെ ഇവരില് കുറച്ചുപേരെ കുതിരക്കച്ചവടത്തിലൂടെയോ ചാക്കിട്ടുപിടിത്തത്തിലൂടെയോ സ്വന്തമാക്കാനാണ് താക്കറെ സഹോദരന്മാര് ശ്രമിക്കുന്നത്. ഗുണ്ടായിസത്തിന് പേര് കേട്ട നേതാവാണ് രാജ് താക്കറെ.
ഉദ്ധവ് താക്കറെ ശിവസേനയും രാജ് താക്കറെയുടെ മഹാനവനിര്മ്മാണ് സമിതിയും ചേര്ന്ന് 71 സീറ്റുകളില് വിജയിച്ചിട്ടുണ്ട്. 43 കൗണ്സിലര്മാരുടെ കൂടി പിന്തുണ ലഭിച്ചാല് ഇവര്ക്ക് ഭരിയ്ക്കാം. കോണ്ഗ്രസിന്റെ 24 കൗണ്സിലര്മാര് വിജയിച്ചിട്ടുണ്ട്. ഇവരെ കൂടെക്കൂട്ടിയാല് 95 ആയി. അസദുദ്ദീന് ഒവൈസിയുടെ എഐഎംഐഎം എട്ട് വാര്ഡുകളില് വിജയിച്ചു. ഈ പിന്തുണ കൂടി ലഭിച്ചാല് 99 ആയി. സമാജ് വാദി പാര്ട്ടിക്ക് രണ്ട് സീറ്റുകളും എന്സിപി ശരത് പവാറിന് ഒരു സീറ്റും ഉണ്ട്. ഇവരുടെയെല്ലാം പിന്തുണ ഉദ്ധവ് താക്കറെയ്ക്ക് ലഭിച്ചേക്കും. അപ്പോള് 102 സീറ്റ് ആയി. ബാക്കി 12 കൗണ്സിലര്മാരുടെ പിന്തുണ കൂടി നേടിയാല് ഭരിയ്ക്കാം എന്നതാണ് താക്കറെ സഹോദരന്മാരുടെ കണക്കുകൂട്ടല്. അതിനാണ് ഇവര് ഷിന്ഡേ ശിവസേനയിലെ കൗണ്സിലര്മാരുടെ പിന്തുണ തേടുന്നത്. പക്ഷെ ഇത് മുന്കൂട്ടി മണത്തറിഞ്ഞാണ് ഷിന്ഡേ 29 കൗണ്സിലര്മാരെയും താജ് ഹോട്ടലില് താമസിപ്പിക്കുന്നത്. ഒരു ശിവസേനക്കാരന് മുംബൈ മുനിസിപ്പല് കോര്പറേഷന് മേയര് ആകണമെന്നതാണ് തന്റെ ആഗ്രഹമെന്ന് ഉദ്ധവ് താക്കറെ ശനിയാഴ്ച പ്രസ്താവിച്ചത് ഷിന്ഡേ പക്ഷത്തെ കൗണ്സിലര്മാരെ പ്രലോഭിപ്പിക്കാനാണ്. ദൈവനിശ്ചയം ഉണ്ടെങ്കില് തന്റെ ആഗ്രഹം നടക്കുമെന്നും ഉദ്ധവ് പ്രതികരിച്ചിരുന്നു. പക്ഷെ ഉദ്ധവ് താക്കറെയുടെ ഉള്ളിലിരിപ്പ് നന്നായി അറിയാവുന്നതുകൊണ്ടാണ് ഷിന്ഡേ തന്റെ കൗണ്സിലര്മാരെ താജ് ഹോട്ടലിലേക്ക് മാറ്റിയത്.
അതേ സമയം ബിജെപിയും ഷിന്ഡേ പക്ഷവും ചേര്ന്നാല് 118 സീറ്റുകള് ഉണ്ട്. ഇത് 114 എന്ന കേവലഭൂരിപക്ഷത്തേക്കാള് നാല് സീറ്റുകള് അധികമാണ്. ഇനി എന്സിപി അജിത് പവാറിന്റെ ഭാഗത്തുള്ള മൂന്ന് കൗണ്സിലര്മാര് കൂടിച്ചേര്ന്നാല് 121 സീറ്റുകള് ആവും. രണ്ടാഴ്ച കഴിഞ്ഞ ഷിന്ഡേ പക്ഷവുമായി ചേര്ന്ന് സംയുക്തയോഗം നടത്തുമെന്നാണ് ഫഡ് നാവിസ് പ്രസ്താവിച്ചത്. മുംബൈ മുനിസിപ്പല് കോര്പറേഷന്റെ മേയര് ബിജെപി കൗണ്സിലര് ആയിരിക്കുമെന്ന് ദേവേന്ദ്ര ഫഡ് നാവിസ് കഴിഞ്ഞ ദിവസം പ്രഖ്യാപിച്ചുകഴിഞ്ഞു. രണ്ടര വര്ഷം വിതം മേയര് സ്ഥാനം കൈമാറാമെന്ന നിര്ദേശത്തിന് ബിജെപി വഴങ്ങാനിടയില്ല.
