തിരുനാവായ: ദക്ഷിണേന്ത്യയിലെ പ്രധാന ആത്മീയ സംഗമങ്ങളിലൊന്നായ മഹാമാഘ മഹോത്സവത്തിന് തിരുനാവായയില്‍ വിശേഷാല്‍ പൂജകളോടെ തുടക്കം. മഹാമാഘ സഭാപതി മഹാമണ്ഡലേശ്വര്‍ സ്വാമി ആനന്ദവനം ഭാരതിയുടെയും സ്വാമി സത്യാനന്ദ സരസ്വതി ഫൗണ്ടേഷന്റെ മാനേജിങ് ട്രസ്റ്റിയും ശ്രീരാമദാസ മിഷന്‍ യൂണിവേഴ്സല് സൊസൈറ്റിയുടെ ദേശീയ ജനറല്‍ സെക്രട്ടറിയുമായ ശ്രീശക്തി ശാന്താനന്ദ മഹര്‍ഷിയുടെയും സാന്നിധ്യത്തിലാണ് ആദ്യദിനത്തിലെ ചടങ്ങുകള്‍ നടന്നത്.
സ്വാമി അഭിനവ ബാലാനന്ദ ഭൈരവയുടെ മാര്‍ഗനിര്‍ദേശത്തിലും കാര്‍മികത്വത്തിലും നടന്ന ചടങ്ങുകളില്‍ ഭക്തര്‍ ആചാരാനുഷ്ഠാനങ്ങള്‍ക്കനുസരിച്ച് ദേവതാവന്ദനങ്ങളും പിതൃകര്‍മങ്ങളും നിര്‍വഹിച്ചു.
രാവിലെ ആറ് മുതല്‍ ത്രയോദശി തിഥി, പ്രദോഷം, മൂലം നക്ഷത്രം എന്നീ പുണ്യയോഗത്തില്‍മഹാമണ്ഡലേശ്വര്‍ സ്വാമി ആനന്ദവനം ആയിനിപ്പുള്ളി വൈശാഖിന്റെ നേതൃത്വത്തില്‍ പിതൃയാനത്തിലെ വീരസാധന ക്രിയ നടന്നു.
അഞ്ച് കാലഘട്ടങ്ങളിലായി നടത്തിയ ഈ കര്‍മം, പിതൃ ആത്മാക്കള്‍ക്ക് ശാന്തിയും തൃപ്തിയും ലഭിക്കുമ്പോള്‍ സന്തതികളുടെ ജീവിതത്തിലെ കര്‍മതടസങ്ങള്‍ അകന്നു സമൃദ്ധി കൈവരുമെന്ന വിശ്വാസത്തിലാണ് അനുഷ്ഠിച്ചത്.
ഇന്ന് രാവിലെ ആറ് മുതല്‍ ചതുര്‍ദശി തിഥിയിലും മൂലം, പൂരാടം നക്ഷത്രയോഗത്തിലുമായി ചെറുമുക്ക് വൈദികന്‍ വല്ലഭന്‍ അക്കിത്തിരിപ്പാടിന്റെ ആചാര്യത്വത്തില്‍ വേദശ്രാദ്ധ കര്‍മം നടക്കും. പിതൃ ആത്മാക്കളെ ശുദ്ധീകരിച്ച് ദൈവിക നിലയിലേക്കുയര്‍ത്തുകയും സന്തതികള്‍ക്ക് സംരക്ഷകശക്തിയായി അനുഗ്രഹം ലഭ്യമാക്കുകയും ചെയ്യുന്നതാണ് ഈ കര്‍മത്തിന്റെ ആത്മാര്‍ത്ഥ ലക്ഷ്യം.
മാഘ ഗുപ്ത നവരാത്രിയുടെ ആദ്യദിനമായ 19ന് ധര്‍മധ്വജാരോഹണവും മഹാമേരു രഥയാത്രക്കും തുടക്കമാവും. മഹാമാഘ മഹോത്സവത്തിന്റെ ഔദ്യോഗിക ഉദ്ഘാടനം 19ന് രാവിലെ 11 ന് ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍ ധര്‍മധ്വജാരോഹണം നടത്തി നിര്‍വഹിക്കും. അതേ ദിവസം തന്നെ തമിഴ്നാട്ടില്‍ നിന്ന് തിരുനാവായയിലെ ത്രിമൂര്‍ത്തി സംഗമത്തിലേക്ക് മഹാമേരു രഥയാത്രക്കും ആരംഭം കുറിക്കും. തമിഴ്നാട്ടിലെ ആധീനങ്ങളുടെ പങ്കാളിത്തത്തോടെയുള്ള രഥയാത്രയ്‌ക്ക് ഭാരതീയ ധര്‍മ്മ പ്രചാര സഭയുടെ ആചാര്യന്‍ യതീശാനന്ദനാഥന്‍ ഡോ. ശ്രീനാഥ് കാരയാട്ട് നേതൃത്വം നല്‍കും. 22ന് വൈകുന്നേരം യാത്ര തിരുനാവായയില്‍ എത്തിച്ചേരും.
