തൃശൂര്: കേരളത്തിന്റെ തനത് താറാവിനമായ കുട്ടനാടന് താറാവിന് ഇന്ത്യന് കൗണ്സില് ഓഫ് അഗ്രികള്ച്ചറല് റിസര്ച്ച് അംഗീകൃതമായ മൃഗഇനങ്ങള്ക്കുള്ള രജിസ്ട്രേഷന് സര്ട്ടിഫിക്കറ്റ് ലഭിച്ചു.
കേരള വെറ്ററിനറി ആന്ഡ് ആനിമല് സയന്സസ് യൂണിവേഴ്സിറ്റിയുടെ നേതൃത്വത്തില് സമര്പ്പിച്ച അപേക്ഷയുടെ അടിസ്ഥാനത്തിലാണ് കുട്ടനാടന് താറാവിന് ഈ രജിസ്ട്രേഷന് ലഭിച്ചത്. കേരളത്തിലെ തനത് ഇനങ്ങളായ വെച്ചൂര് പശു, മലബാറി ആട്, അട്ടപ്പാടി ബ്ലാക്ക് ആട്, തലശ്ശേരി കോഴി എന്നിവയ്ക്കാണ് മുമ്പ് ഈ ദേശീയ അംഗീകാരം ലഭിച്ചിട്ടുള്ളത്. ഈ രജിസ്ട്രേഷന് കുട്ടനാട് താറാവിന്റെ ജനിതക സവിശേഷത ഔദ്യോഗികമായി രേഖപ്പെടുത്തുന്നു.
ന്യൂദല്ഹിയിലെ നാഷണല് അഗ്രികള്ച്ചറല് സയന്സ് കോംപ്ലക്സില് വെച്ച് നടന്ന വിവിധ ഇനങ്ങളുടെ സംരക്ഷണത്തിനായുള്ള അവാര്ഡ് ദാനച്ചടങ്ങിലാണ് സര്ട്ടിഫിക്കറ്റ് വിതരണം ചെയ്തത്. വെറ്ററിനറി യൂണിവേഴ്സിറ്റിയുടെ മണ്ണുത്തിയിലെ സെന്റര് ഫോര് അഡ്വാന്സ്ഡ് സ്റ്റഡീസ് ഇന് പൗള്ട്രി സയന്സ് ഡയറക്ടര് ഡോ. ബിനോജ് ചാക്കോ അംഗീകാരം ഏറ്റുവാങ്ങി. കേന്ദ്രമന്ത്രി ശിവരാജ് സിംഗ് ചൗഹാന് ചടങ്ങില് മുഖ്യാതിഥിയായിരുന്നു.
