തിരുവനന്തപുരം: രാഹുല് മാങ്കൂട്ടത്തില് എംഎല്എക്ക് എതിരായ സ്ത്രീ പീഡന പരാതികള് കൂടുന്നതിനിടെ ഇനിയും അതിജീവിതകള് ഉണ്ടെന്ന പരാമര്ശം നടത്തിയ നടി റിനി ആന് ജോര്ജിനെ ചോദ്യം ചെയ്യണമെന്ന് ആവശ്യം. ഹൈക്കോടതി അഭിഭാഷകനും പൊതു പ്രവര്ത്തകനുമായ അഡ്വ. കുളത്തൂര് ജയ്സിങ് ആണ് ഇതുസംബന്ധിച്ച് മുഖ്യമന്ത്രി പിണറായി വിജയന് പരാതി നല്കിയത്.
സര്ക്കാരിന് റിനി സൂചിപ്പിച്ച അതിജീവിതകളെ കണ്ടെത്തുവാനും നിയമ സഹായവും നീതിയും ഉറപ്പാക്കുവാനും സാധിക്കണം. അതിന് അവര് ആരൊക്കെയാണെന്ന് അറിയണം. അത് അറിയാനായി റിനി ആന് ജോര്ജിനെ ചോദ്യം ചെയ്യണമെന്നാണ് പരാതിയില് പറയുന്നത്. രാഹുൽ മാങ്കൂട്ടത്തിലിനെതിരെ ആദ്യമായി ആരോപണം ഉന്നയിച്ചത് റിനിയായിരുന്നു.
ഇനിയും അതിജീവിതകള് ഉണ്ടെന്ന് പറയുന്നതല്ലാതെ അവരുടെ വിവരം സര്ക്കാരിനോ പോലീസിനോ നല്കിയതായി റിനി ജോര്ജ് വ്യക്തമാക്കുന്നില്ല. അതിജീവതമാരെ കണ്ടെത്തി നീതിയും നിയമസഹായവും ഉറപ്പാക്കാന് റിനിയെ ചോദ്യം ചെയ്ത് മൊഴിയെടുത്ത് തുടര്നടപടി സ്വീകരിക്കണമെന്നും പരാതിയില് അഡ്വ. കുളത്തൂര് ജയ്സിങ് പരാതിയില് ആവശ്യപ്പെട്ടു.
രാഹുല് മാങ്കൂട്ടത്തില് എംഎല്എയെ ലൈംഗിക പീഡന കേസില് പോലീസ് കസ്റ്റഡിയില് എടുത്ത ശേഷം മാധ്യമങ്ങളോട് സംസാരിക്കവെയാണ് രാഹുലിന്റെ പീഡനത്തിനിരയായ അതിജീവിതമാര് ഇനിയുമുണ്ടെന്ന റിനി ആന് ജോര്ജ് പറഞ്ഞത്. സ്ത്രീകള്ക്ക് നേരെയുള്ള ലൈംഗിക അതിക്രമങ്ങള് ശ്രദ്ധയില്പെട്ടാല് അത് മറച്ചുവെക്കുന്ന നടപടി കുറ്റകരമാണ്.
“സത്യത്തിന്റെ വിജയമാണിത്. വ്യാജ പ്രചാരണങ്ങൾ നടത്തി സത്യം എത്ര മറച്ചുവെക്കാൻ ശ്രമിച്ചാലും സത്യം പുറത്തുവരും എന്നതിന്റെ ഒരു ചെറിയ തുടക്കം മാത്രമാണിത്. സ്ത്രീകളുടെ വിജയം എന്ന് ഇതിനെ വിളിക്കാം. ക്രൂരമായ പീഡനങ്ങളിലൂടെ കടന്നുപോയ അതിജീവിച്ചവർക്ക് നീതി ലഭിക്കുന്നതിന്റെ തുടക്കമാണിത്.
അവരുടെ സന്തോഷത്തിൽ ഞാനും പങ്കുചേരുന്നു. ഇനിയും നിരവധി അതിജീവിച്ചവരുണ്ടെന്ന് ഞാൻ മനസ്സിലാക്കുന്നു. ഇതിൽ പങ്കാളികളാകാനും നീതി കണ്ടെത്താനും ഞാൻ അവരോട് അഭ്യർത്ഥിക്കുന്നു. കോൺഗ്രസ് പാർട്ടിയോട് പറയാൻ ഞാൻ ആഗ്രഹിക്കുന്നു, ഇപ്പോഴെങ്കിലും നിങ്ങൾ സ്ത്രീകൾക്കൊപ്പം നിൽക്കാനും ശരിയായ നടപടി സ്വീകരിക്കാനും തീരുമാനിച്ചതിൽ ഞാൻ നന്ദിയുള്ളവനാണ്. ശരിക്കും നന്ദിയുള്ളവനാണ്” – റിനി ആൻ ജോർജ്ജ് വ്യക്തമാക്കിയിരുന്നു.
