ഗീതുമോഹൻ ദാസ് ചിത്രം ‘ടോക്സിക്കി’നെതിരെ കർണാടക വനിതാ കമ്മീഷന് പരാതി . ഈ സിനിമയിലെ ഉള്ളടക്കം അങ്ങേയറ്റം അശ്ലീലമാണ് എന്ന് ആരോപിച്ച് ആം ആദ്മി പാർട്ടി (AAP) വനിതാ വിഭാഗം രംഗത്തെത്തി. പാർട്ടി പ്രതിനിധികൾ കർണാടക വനിതാ കമ്മീഷന് ഔദ്യോഗികമായി പരാതി നൽകി. ചിത്രത്തിനെതിരെ കർണാടകയിൽ പ്രതിഷേധം ശക്തമാകുന്നുമുണ്ട്.
ആം ആദ്മി പാർട്ടിയുടെ കർണാടക ഘടകത്തിലെ വനിതാ വിഭാഗം നേതാക്കളാണ് ഈ പരാതിക്ക് പിന്നിൽ. ചിത്രത്തിലെ ചില രംഗങ്ങൾ അമിതമായ അശ്ലീലത നിറഞ്ഞതാണെന്നാണ് എഎപി ഉന്നയിക്കുന്ന പ്രധാന ആരോപണം.അവർ കർണാടക സംസ്ഥാന വനിതാ കമ്മീഷൻ ഉദ്യോഗസ്ഥരെ നേരിൽ കാണുകയും ഈ വിഷയത്തിൽ ഉചിതമായ നടപടി സ്വീകരിക്കണമെന്ന് ആവശ്യപ്പെട്ട് പരാതി സമർപ്പിക്കുകയും ചെയ്തു.
‘ടോക്സിക്കി’ന്റെ ടീസറിലെ രംഗങ്ങൾ ചൂണ്ടിക്കാട്ടി സംവിധായിക ഗീതു മോഹൻദാസിനെതിരേ വിമർശനങ്ങൾ ഉയർന്നിരുന്നു. ഈ സിനിമയിലെ ഉള്ളടക്കം പൊതുസമൂഹത്തിന് അനുയോജ്യമാണോ എന്ന ചോദ്യം ഉന്നയിച്ചുകൊണ്ടാണ് വനിതാ കമ്മീഷന്റെ ഇടപെടൽ പാർട്ടി ആവശ്യപ്പെട്ടിരിക്കുന്നത്.
