ന്യൂദല്ഹി: നിലമ്പൂരില് പുതിയ മുസ്ലിം പള്ളിക്ക് അനുമതി നിഷേധിച്ച കേരള ഹൈക്കോടതിയോട് ചോദ്യവുമായി സുപ്രീം കോടതി. നൂറ് മുസ്ലിം പള്ളികള് ഉണ്ടെന്ന് കാട്ടി പുതിയൊരു പള്ളിക്ക് അനുമതി നിഷേധിക്കാന് എങ്ങനെ ആകുമെന്നാണ് ചോദ്യം.
കേരള ഹൈക്കോടതി ഉത്തരവിനെ ചോദ്യം ചെയ്തു സമര്പ്പിച്ച ഹര്ജി പരിഗണിക്കവെയാണ് ജസ്റ്റിസ് ജെ ബി പര്ഡിവാല അധ്യക്ഷനായ ബെഞ്ച് ഈ ചോദ്യം ഉന്നയിച്ചത്.
നിലമ്പൂരില് വാണിജ്യ കെട്ടിടം പള്ളിയാക്കി മാറ്റാന് അനുമതിക്കായി നൂറുല് ഇസ്ലാം സാംസ്കാരിക സംഘം നല്കിയ ഹര്ജി പരിഗണിക്കവെയാണ് സുപ്രീം കോടതി ചോദ്യം ഉന്നയിച്ചത്. കേരള ഹൈക്കോടതി വിധിക്ക് എതിരെ നൂറുല് ഇസ്ലാം സാംസ്കാരിക സംഘം എന്ന സംഘടന നല്കിയ ഹര്ജിയില് സുപ്രീം കോടതി നോട്ടീസ് അയച്ചു.
മലപ്പുറം ജില്ലയിലെ നിലമ്പൂരില് വാണിജ്യ കെട്ടിടം പള്ളിയാക്കി മാറ്റാന് നൂറുല് ഇസ്ലാം സാംസ്കാരിക സംഘം നല്കിയ അപേക്ഷ ജില്ലാ കളക്ടര് അംഗീകരിച്ചില്ല.കെട്ടിടം ഇരിക്കുന്ന പ്രദേശത്ത് അഞ്ച് കിലോമീറ്റര് ചുറ്റളവില് 36 മുസ്ലിം പള്ളികള് ഉണ്ടെന്ന് ചൂണ്ടിക്കാട്ടി ആയിരുന്നു അപേക്ഷ നിരസിച്ചത്.നൂറുല് ഇസ്ലാം ഹൈക്കോടതിയെ സമീപിച്ചെങ്കിലും, കളക്ടറുടെ നിലപാട് ഹൈക്കോടതി ശരിവച്ചു. ഇതിന് എതിരെയാണ് സുപ്രീം കോടതിയെ സമീപിച്ചത്.
