ന്യൂദല്ഹി: യുവാക്കളാണ് രാജ്യത്തിന്റെ ചാലകശക്തിയെന്ന് കേന്ദ്രമന്ത്രി ഡോ. മന്സൂഖ് മാണ്ഡവ്യ. ഭാരതമണ്ഡപത്തില് കേന്ദ്രയുവജനകാര്യ, കായിക മന്ത്രാലയം സംഘടിപ്പിക്കുന്ന വികസിത ഭാരതം യങ് ലീഡേഴ്സ് ഡയലോഗ് (വിബിവൈഎല്ഡി 2026) ഉദ്ഘാടനം ചെയ്യുകയായിരുന്നു അദ്ദേഹം.
രാഷ്ട്രീയ പിന്തുണയില്ലാതെ, താഴേത്തട്ടില് നിന്ന് ഉയര്ന്നുവരുന്ന, രാജ്യത്തിന്റെ ഭാവി നേതാക്കളെ വളര്ത്തിയെടുക്കുന്ന നേതൃത്വം കെട്ടിപ്പടുക്കുന്നതിനുള്ള പ്രക്രിയയാണ് വികസിത ഭാരതം യങ് ലീഡേഴ്സ് ഡയലോഗ് എന്ന് അദ്ദേഹം വ്യക്തമാക്കി. രാജ്യത്തെ 140 കോടി പൗരന്മാരുടെ കൂട്ടായ പരിശ്രമത്തിലൂടെ മാത്രമെ വികസിത ഭാരതം എന്ന ലക്ഷ്യം കൈവരിക്കാനാകൂ.
രാഷ്ട്രം ആദ്യം എന്ന മന്ത്രത്തിലൂന്നി അച്ചടക്കത്തോടെയും സമര്പ്പണത്തോടെയും തങ്ങളുടെ കടമകള് നിറവേറ്റാന് അദ്ദേഹം ആഹ്വാനം ചെയ്തു.
ശരിയായ തെരഞ്ഞെടുപ്പുകള് നടത്തുന്നതിലാണ് യുവാക്കളുടെ ഏറ്റവും വലിയ ശക്തിയെന്ന് മുഖ്യപ്രഭാഷണം നടത്തിയ ദേശീയ സുരക്ഷാ ഉപദേഷ്ടാവ് അജിത് ഡോവല് പറഞ്ഞു. കേന്ദ്രമന്ത്രി രക്ഷ നിഖില് ഖഡ്സെ, യുവജനകാര്യ വകുപ്പ് സെക്രട്ടറി ഡോ. പല്ലവി ജെയിന് ഗോവില്, യുവജനകാര്യ അഡീ. സെക്രട്ടറി നിതേഷ് കുമാര് മിശ്ര, മറ്റ് മുതിര്ന്ന ഉദ്യോഗസ്ഥര്, എന്നിവര് പങ്കെടുത്തു.
ദേശീയ യുവജന ദിനമായ നാളെ പ്രധാനമന്ത്രി നരേന്ദ്രമോദി യുവനേതാക്കളുമായി നേരിട്ട് സംവദിക്കുകയും അവരുടെ ആശയങ്ങള് കേള്ക്കുകയും ചെയ്യും. വിവിധ മേഖലകളിലെ പ്രമുഖരുമായുള്ള ചര്ച്ചകള്, സംവാദങ്ങള്, ചരിത്ര സ്മാരകങ്ങളും പ്രധാനസ്ഥലങ്ങളും സന്ദര്ശിക്കല് എന്നിവ പരിപാടിയുടെ ഭാഗമാണ്. സംസ്ഥാനതലത്തില് നിന്ന് തെരഞ്ഞെടുക്കപ്പെട്ട 3,000 പേരാണ് ഭാരതമണ്ഡപത്തില് നടക്കുന്ന പരിപാടിയില് പങ്കെടുക്കുന്നത്. വിബിവൈഎല്ഡി 2026ന്റെ പ്രാരംഭ ക്വിസ് മത്സരത്തില് നിന്ന് 3,000 പേര് അവസാന റൗണ്ടിലേക്ക് തെരഞ്ഞടുക്കപ്പെട്ടു.
