പത്തനംതിട്ട :ശബരിമല സ്വര്ണക്കൊള്ള കേസില് തന്ത്രി കണ്ഠരര് രാജീവരുടെ ചെങ്ങന്നൂരിലെ വീട്ടില് പ്രത്യേക അന്വേഷണ സംഘം നടത്തിയ പരിശോധന പൂര്ത്തിയായി. എട്ട് മണിക്കൂറോളമാണ് പരിശോധന നീണ്ടത്. ബാങ്ക് അക്കൗണ്ട് വിവരങ്ങളും ഒന്നാം പ്രതി ഉണ്ണികൃഷ്ണന് പോറ്റിയുമായുള്ള ബന്ധം സംബന്ധിച്ചുമാണ് പരിശോധന നടത്തിയത്. സ്വര്ണാഭരണങ്ങള് പരിശോധിക്കാനായി സ്വര്ണപ്പണിക്കാരനെയും എത്തിച്ചു.
വീട്ടില് നിന്ന് രേഖകള് ഉദ്യോഗസ്ഥര് എടുത്തിട്ടുണ്ട്. കുടുംബംഗങ്ങളുടെ മൊഴിയും ശേഖരിച്ചിട്ടുണ്ട്. വീട്ടില് നിന്ന് കണ്ടെടുത്ത സ്വര്ണാഭരണങ്ങളുടെ പഴക്കം, മൂല്യം, അളവ് എന്നിവയാണ് സ്വര്ണപ്പണിക്കാരനെ എത്തിച്ച് പരിശോധിച്ചത്.
അതിനിടെ, ശബരിമല സ്വര്ണക്കൊള്ള കേസില് റിമാന്ഡിലായ തന്ത്രി കണ്ഠരര് രാജീവരെ കസ്റ്റഡിയില് ചോദ്യം ചെയ്യാനാണ് പ്രത്യേക അന്വേഷണ സംഘത്തിന്റെ തീരുമാനം. അന്വേഷണസംഘം തിങ്കളാഴ്ച കോടതിയില് അപേക്ഷ നല്കുമെന്നാണ് സൂചന.
കോടതി റിമാന്ഡ് ചെയ്ത തന്ത്രി ദേഹാസ്വാസ്ഥ്യത്തെ തുടര്ന്ന് തിരുവനന്തപുരം മെഡിക്കല് കോളേജ് ആശുപത്രിയില് ചികിത്സയിലാണ്.
