തിരുവനന്തപുരം:മലയാള ഭാഷ ബില്ലിനോടുള്ള എതിര്പ്പ് വസ്തുതകള്ക്ക് നിരക്കുന്നതല്ലെന്ന് മുഖ്യമന്ത്രി പിണറായി വിജയന്. ബില്ല് ഭാഷാന്യൂനപക്ഷങ്ങളുടെ അവകാശങ്ങള് ഇല്ലാതാക്കുന്നില്ല.മലയാള ഭാഷ ബില്ലിനെ എതിര്ത്ത് കത്തയച്ച കര്ണാടക മുഖ്യമന്ത്രി സിദ്ധരാമയ്യയ്ക്ക് മറുപടിയായാണ് മുഖ്യമന്ത്രി ഇക്കാര്യം പറഞ്ഞത്.
കന്നട, തമിഴ് ഭാഷാന്യൂനപക്ഷങ്ങള്ക്ക് ഔദ്യോഗിക ആവശ്യങ്ങള്ക്ക് മാതൃഭാഷ ഉപയോഗിക്കാം. ഒരു ഭാഗത്തിനും ബുദ്ധിമുട്ടുണ്ടാക്കുന്ന കാര്യങ്ങള് കേരളം ചെയ്യില്ലെന്നും എല്ലാവര്ക്കും ജോലി ചെയ്യാന് പറ്റുന്ന സംസ്ഥാനമാണ് കേരളമെന്നുമാണ് ഭാഷാ ബില്ലില് ധനമന്ത്രി കെ.എന്. ബാലഗോപാലും പ്രതികരിച്ചത്.
അതിനിടെ, മലയാള ഭാഷ ബില്ലുമായി ബന്ധപ്പെട്ട് കേരളത്തിലെ ഭാഷാ ന്യൂനപക്ഷങ്ങളുടെ ആശങ്ക കൂടി പരിഗണിക്കണമെന്ന് കെപിസിസി അധ്യക്ഷന് സണ്ണി ജോസഫ് പ്രതികരിച്ചു.
സ്കൂള് തലം മുതല് ഭരണഭാഷ വരെ മലയാളത്തിലാക്കാന് വ്യവസ്ഥ ചെയ്യുന്ന മലയാള ഭാഷാ ബില് 2025 നെതിരെയാണ് കര്ണാടകം തര്ക്കം ഉന്നയിച്ചിരിക്കുന്നത്. ബില് കാസര്കോട്ടെ ഭാഷാ ന്യൂനപക്ഷ മേഖലയിലേക്കുള്ള കടന്നുകയറ്റമാണെന്നാണ് കര്ണാടകം കുറ്റപ്പെടുത്തുന്നത്.ട്വീറ്റിലൂടെ കഴിഞ്ഞ ദിവസംകേരളത്തെ പ്രതിഷേധം അറിയിച്ച മുഖ്യമന്ത്രി സിദ്ധരാമയ്യ പിന്നാലെ കേരള മുഖ്യമന്ത്രിക്ക് കത്തയക്കുകയായിരുന്നു.
ബില്ലുമായി മുന്നോട്ട് പോയാല് നിയമപരമായി നേരിടുമെന്നാണ് സിദ്ധരാമയ്യയുടെ മുന്നറിയിപ്പ്. എന്നാല് കര്ണാടകത്തിന്റെ എതിര്പ്പ് രാഷ്ട്രീയപ്രേരിതം എന്നാണ് കേരളം പറയുന്നത്.
