ആലപ്പുഴ: ശബരിമല സ്വര്ണക്കൊള്ള കേസില് റിമാന്ഡിലായ തന്ത്രി കണ്ഠര് രാജീവരുടെ ചെങ്ങന്നൂരിലെ വീട്ടില് പ്രത്യേക അന്വേഷണ സംഘം നടത്തുന്ന പരിശോധന തുടരുന്നു.ഡിവൈഎസ്പി സുരേഷ് ബാബുവിന്റെ നേതൃത്വത്തിലുള്ള സംഘമാണ് പരിശോധന നടത്തുന്നത്.ശനിയാഴ്ച ഉച്ചതിരിഞ്ഞ് മൂന്ന് മണിയോടെയാണ് എസ്ഐടി സംഘം പൊലീസ് അകമ്പടിയോടെ തന്ത്രിയുടെ വീട്ടിലേക്ക് എത്തിയത്.
സാമ്പത്തിക ഇടപാടുകളുടെ രേഖകളുണ്ടോ എന്നതാണ് പ്രധാനമായും പരിശോധിക്കുന്നത്.വീട്ടിലുണ്ടായിരുന്ന അകന്ന ബന്ധുക്കളെയും പ്രത്യേക അന്വേഷണ സംഘം പുറത്താക്കി. എന്നാല് തന്ത്രിയുടെ ഭാര്യയുടെയും അഭിഭാഷകയായ മരുമകളുടെയും സാന്നിധ്യത്തിലാണ് പരിശോധന എന്നാണ് വിവരം.
അതിനിടെ, പ്രാദേശിക സ്വര്ണപ്പണിക്കാരനെയും പരിശോധനയില് സഹായിക്കാനായി എത്തിച്ചു എന്ന് റിപ്പോര്ട്ടുണ്ട്. സ്വര്ണത്തിന്റെ വിശദാംശങ്ങള് മനസിലാക്കാനാണിത്.
ശബരിമലയിലേക്ക് ഉണ്ണികൃഷ്ണന് പോറ്റിക്ക് വഴിയൊരുക്കിയത് തന്ത്രിയാണെന്നാണ് പ്രത്യേക അന്വേഷണ സംഘത്തിന്റെ കണ്ടെത്തല്. ക്ഷേത്രത്തിലെ സ്വര്ണപ്പാളികള് പുറത്തുകൊണ്ടു പോകാന് ഒത്താശ ചെയ്തു, ആചാര ലംഘനത്തിന് മൗനാനുവാദം നല്കി, ഗൂഢാലോചനയില് പങ്കാളിയായി എന്നിങ്ങനെയാണ് റിമാന്ഡ് റിപ്പോര്ട്ടിലുള്ളത്. കേസിലെ പതിമൂന്നാം പ്രതിയാണ് തന്ത്രി കണ്ഠര് രാജീവര്.
