ബെംഗളൂരു: ഹുബ്ബള്ളിയിൽ അറസ്റ്റ് നടപടിക്കിടെ ബിജെപി പ്രവർത്തകയെ പോലീസ് വാനിൽ നഗ്നയാക്കി മർദിച്ചെന്ന പരാതി പ്രത്യേക സംഘം അന്വേഷിക്കും. അസിസ്റ്റന്റ് കമ്മീഷണറുടെ നേതൃത്വത്തിലുള്ള സംഘമാണ് അന്വേഷിക്കുക. സംഭവത്തിൽ ദേശീയ വനിതാ കമ്മിഷൻ സ്വമേധയാ കേസെടുത്ത് ഡിജിപിയോടു റിപ്പോർട്ട് തേടിയിരുന്നു. ഇതിനു പിന്നലെയാണ് നടപടി. എസിപി കെ ശിവരാജിന്റെ നേതൃത്വത്തിലുള്ള സംഘത്തെയാണ് അന്വേഷണം ഏൽപ്പിച്ചത്.
ജനുവരി 1ന് കേശവപുര ചാലൂക്യ നഗറിൽ സമഗ്ര വോട്ടർ പട്ടിക പരിഷ്കരണത്തെ (എസ്ഐആർ) ചൊല്ലി ചില പ്രദേശവാസികളും ബിജെപി പ്രവർത്തകരും തമ്മിൽ സംഘർഷമുണ്ടായതിനെ തുടർന്നായിരുന്നു യുവതിയുടെ അറസ്റ്റ്. വസ്ത്രം നഷ്ടപ്പെട്ട് പോലീസ് വാഹനത്തിൽ പ്രതിഷേധിക്കുന്ന ബിജെപി പ്രവർത്തകരുടെ വീഡിയോ കഴിഞ്ഞദിവസം സാമൂഹ്യമാധ്യമങ്ങളിൽ പ്രചരിച്ചിരുന്നു. അതേസമയം ഇവർ പോലീസ് വാഹനത്തിൽ കയറിയ ശേഷം സ്വയം വസ്ത്രം ഊരുകയായിരുന്നു എന്നാണ് ഹുബ്ബള്ളി പോലീസ് ആരോപിക്കുന്നത്. സംഭവത്തില് കേശവപുര സ്റ്റേഷനിലെ ഇൻസ്പെക്ടർ കെ.എസ്. ഹട്ടിയെ കമ്മീഷണർ ഓഫീസിലേക്ക് സ്ഥലം മാറ്റുകയും ചെയ്തിരുന്നു.
