തൃശൂര്: വടക്കാഞ്ചേരി ലൈഫ് മിഷന് ഫ്ലാറ്റ് നിര്മാണം നിയമക്കുരുക്കിലാക്കി മുടക്കിയെന്ന ആരോപണത്തില് അടാട്ട് പഞ്ചായത്ത് പ്രസിഡന്റും മുന് എംഎല്എയുമായ അനില് അക്കര മന്ത്രി എം.ബി. രാജേഷിനെതിരെ പരാതി നല്കി.ഫ്ലാറ്റ് നിര്മാണം നിയമക്കുരുക്കിലായത് വടക്കാഞ്ചേരിയിലെ മുന് എംഎല്എ കേസ് നല്കിയതിനാലാണെന്നാണ് മന്ത്രി ആരോപിച്ചത്. ഇതു ഹൈക്കോടതിയെ അപമാനിക്കുന്നതാണെന്ന് അനില് അക്കര പരാതിയില് ചൂണ്ടിക്കാട്ടി.
വടക്കാഞ്ചേരി ചരല്പറമ്പില് ഫ്ലാറ്റ് നിര്മാണ ചുമതലയില്നിന്ന് ഹാബിറ്റാറ്റിനെ മാറ്റിയത് യുഎഇ കോണ്സുലേറ്റ് ജനറല് ,എം. ശിവശങ്കര്, ലൈഫ് മിഷന് ചെയര്മാന് പിണറായി വിജയന്, വൈസ് ചെയര്മാനായിരുന്ന അന്നത്തെ മന്ത്രി എ.സി. മൊയ്തീന് എന്നിവര് ചേര്ന്നാണ്. യൂണിടാക്ക് എന്ന റിയല് എസ്റ്റേറ്റ് കമ്പനിക്കാണ് നിര്മാണ ചുമതല നല്കിയത്.
ഫ്ലാറ്റ് നിര്മാണത്തിലെ അഴിമതി അന്വേഷിക്കാന് വിജിലന്സാണ് കേസ് രജിസ്റ്റര് ചെയ്തത്. തിരുവനന്തപുരം വിജിലന്സ് കോടതിയുടെ പരിഗണനയിലാണ് നിലവില് കേസ്.യുഎഇ കോണ്സുലേറ്റിലെ ഉദ്യോഗസ്ഥര് രാജ്യം വിട്ടതോടെ എഫ്സിആര്എ ലംഘനത്തില് സിബിഐയും കേസെടുത്തു.എന്നാല് അപ്പോഴും നിര്മാണം തുടരുകയായിരുന്നു.
എന്നാല് ,പിന്നീട് സര്ക്കാരോ കോടതിയോ നിര്ദേശം ലഭിക്കാതെ വന്നതോടെ സര്ക്കാരിന് കത്തു നല്കി നിര്മാണം നിര്ത്തി. ഫ്ലാറ്റ് നിര്മാണം പൂര്ത്തിയാക്കണമെന്ന് ആവശ്യപ്പെട്ടാണ് 2020-ല് ഹൈക്കോടതിയില് ഹര്ജി നല്കിയത്. ഈ വിഷയത്തില് താന് ഉള്പ്പെടുന്ന കേസുകള് നിലവിലില്ലെന്ന് അനില് അക്കര പറഞ്ഞു. മന്ത്രി നടത്തിയ പ്രസ്താവന അവാസ്തവമാണെന്നും പരാതിയില് പറയുന്നു.
