തിരുവനന്തപുരം: ഒരേ നമ്പറില് രണ്ട് ഇരുചക്രവാഹനങ്ങള് ഓടുന്നത് ആര്ടിഒ അധികൃതര്ക്ക് പോലും കണ്ടെത്താനാകുന്നില്ലെന്ന് പരാതി. ഡ്യൂപ്ലിക്കേറ്റ് നമ്പര് വച്ച് ഓടുന്ന വണ്ടിയെയും ഉടമയും പിടികൂടണമെന്നാണ് യഥാര്ത്ഥ ഉടമയുടെ ആവശ്യം. ചെറിയകൊല്ല വടക്കുംകര ഇടവിച്ചല്ക്കോണം വീട്ടില് സെല്വന് ആണ് യഥാര്ത്ഥ നമ്പര് ഉള്ള വാഹനത്തിന്റെ ഉടമ.
ഇയാളുടെ പ്ലഷര് എന്ന സ്കൂട്ടറിന്റെ നമ്പര് കെ.എല്. 19 ഇ. 2025. ആണ്. ഇയാള്ക്ക് ഹെല്മറ്റ് വയ്ക്കാതെ വാഹനം ഓടിച്ചതിന് പെറ്റി ലഭിച്ച തുടങ്ങിയതോടെ നടത്തിയ അന്വേഷണത്തിലാണ് ഇതേ നമ്പറില് തന്നെ ഒരു ആക്ടീവ വാഹനം പ്രദേശമൊട്ടാകെ ഹെല്മറ്റ് ധരിക്കാതെ ഓടുന്നതായി മനസിലാക്കിയത്. തുടര്ന്ന് വെള്ളറട പോലീസിലും പാറശ്ശാല ആര്ടിഒയ്ക്കും പരാതി നല്കി. പാറശാല ആര്ടിഒയുടെ നിര്ദ്ദേശാനുസരണം പാറശ്ശാല പോലീസിലും ഒടുവില് തിരുവനന്തപുരം ആര്ടിഒയ്ക്കും പരാതി നല്കി. വിവിധ സ്ഥലങ്ങളില് പരാതി നല്കിയെങ്കിലും ഡ്യൂപ്ലിക്കേറ്റ് നമ്പര് വച്ച് ഓടുന്ന വാഹനത്തെ പിടികൂടാന് ആര്ടിഒ അധികൃതര്ക്ക് കഴിയുന്നില്ല.
ഇരുപത്തിയെട്ട് പെറ്റിയിലൂടെ 14.500 രൂപയുടെ പിഴയാണ് പരാതിക്കാരന് അടയ്ക്കാനുള്ളത്. ഹെല്മറ്റ് ധരിച്ച് വാഹനമോടുന്ന കൃത്യമായ രേഖകളും പുകപരിശോധന അടക്കം എടുത്തിട്ടുള്ള ഉടമ സെല്വന് പെറ്റിയുടെ പ്രളയം കാരണം മാനസികമായി തകര്ന്ന നിലയിലാണ്. ഡ്യൂപ്ലിക്കേറ്റ് നമ്പര് വച്ച് ഓടുന്ന ആക്ടീവ വാഹനത്തെ കണ്ടെത്തി ശിക്ഷാ നടപടികള് സ്വീകരിക്കുകയും യഥാര്ത്ഥ വാഹന ഉടമയായ സെല്വന് വന്നിട്ടുള്ള പെറ്റികള് ഡ്യൂപ്ലിക്കേറ്റ് നമ്പര് വച്ച് വാഹനമോടിക്കുന്നയാളില് നിന്ന് ഈടാക്കണമെന്നാണ് സെല്വന്റെ ആവശ്യം.
പോലീസിന്റെയും ആര്ടിഒയുടെയും കണ്ണുവെട്ടിച്ചോടുന്ന അപരന് ഇപ്പോഴും കാണാമറയത്താണ്.
