വാഷിങ്ടണ്: റഷ്യയില് നിന്ന് എണ്ണ വാങ്ങുന്നതിന് ഭാരതം, ചൈന ഉള്പ്പെടെയുള്ള രാജ്യങ്ങളെ ശിക്ഷിക്കാനായുള്ള റഷ്യന് ഉപരോധ ബില്ലിന് യുഎസ് പ്രസിഡന്റ് ഡൊണാള്ഡ് ട്രംപ് പച്ചക്കൊടി വീശിയെന്ന് പ്രമുഖ പ്രതിരോധ വിദഗ്ധനും റിപബ്ലിക്കന് സെനറ്ററുമായ ലിന്ഡ്സെ ഗ്രഹാം. ഗ്രഹാമും ഡെമോക്രാറ്റിക് സെനറ്ററുമായ റിച്ചാര്ഡ് ബ്ലൂമെന്റലുമാണ് ബില് തയാറാക്കിയത്.
ഗ്രഹാം-ബ്ലൂമെന്റല് ബില് പാസായാല് റഷ്യന് എണ്ണയോ യുറേനിയമോ വാങ്ങുന്ന രാജ്യങ്ങള്ക്ക് 500 ശതമാനം വരെ തീരുവ ചുമത്താനാണ് ട്രംപിന്റെ തീരുമാനം. ബുധനാഴ്ച്ച വൈറ്റ് ഹൗസില് വച്ച് ട്രംപുമായി കൂടിക്കാഴ്ച്ച നടത്തിയെന്നും മാസങ്ങളായി ചര്ച്ചയിലിരുന്ന ബില്ലിന് ട്രംപ് പിന്തുണ പ്രഖ്യാപിച്ചുവെന്നും ഗ്രഹാം പറഞ്ഞു. റഷ്യയുടെ സമ്പദ്വ്യവസ്ഥയെ നിലനിര്ത്തുന്ന രാജ്യങ്ങള്ക്കെതിരെ സാമ്പത്തിക ബല പ്രയോഗമാണ് ട്രംപ് ഈ ബില്ലിലൂടെ സുചിപ്പിക്കുന്നത്.
ഭാരതത്തിനുമേല് ഇത് രണ്ടാം തവണയാണ് ട്രംപ് റഷ്യയില് നിന്ന് എണ്ണ വാങ്ങലുമായി ബന്ധപ്പെട്ട ഭീഷണി മുഴക്കുന്നത്. എന്നാല് ഭാരതം റഷ്യയില് നിന്ന് എണ്ണ വാങ്ങുന്നത് നിര്ത്താം എന്നു പറഞ്ഞു എന്ന ട്രംപിന്റെ വാദത്തെ തള്ളികളയുകയും അത് അടിസ്ഥാനരഹിതമാണെന്നും പ്രധാനമന്ത്രി നരേന്ദ്രമോദി മറുപടി പറഞ്ഞിരുന്നു.
