കളമശേരി: കൊച്ചി ശാസ്ത്ര സാങ്കേതിക സര്വകലാശാലയിലെ ഗവേഷകര് കേന്ദ്ര ഭരണ പ്രദേശമായ ലക്ഷദ്വീപിലെ കവരത്തി ലഗൂണില് നിന്ന് ക്രസ്റ്റേഷ്യ വിഭാഗത്തില്പ്പെട്ട അതീവ പ്രാധാന്യമുള്ള പുതിയ സൂക്ഷ്മ സമുദ്രജീവിയെ കണ്ടെത്തി. ഹാര്പാക്ടികോയിഡ് കോപിപോഡ് എന്ന ഈ ജീവിയെ ഇന്ത്യഫോന്റെ ബിജോയി എന്ന് നാമകരണം ചെയ്തു. ഇത് ഒരേസമയം പുതിയ ജനുസും പുതിയ സ്പീഷീസുമാണ്.
ഇന്ത്യഫോന്റെ എന്ന ജനുസ് നാമം ഭാരതത്തെ ആദരിച്ചാണ് നല്കിയിരിക്കുന്നത്. സ്പീഷീസ് നാമമായ ബിജോയി കുസാറ്റിലെ ഫാക്കല്ട്ടി ഓഫ് മറൈന് സയന്സസ് ഡീനും കണ്ണൂര് സര്വകലാശാലയുടെ മുന് വിസിയുമായ സീനിയര് പ്രൊഫ. ഡോ. എസ്. ബിജോയ് നന്ദനോടുള്ള ആദരസൂചകമായാണ് നല്കിയിരിക്കുന്നത്. പുതുതായി സ്ഥാപിച്ച ഇന്ത്യഫോന്റെ ജനുസ് ലാഫോന്റിടെ സ്കോട്ട് ടി 1905 എന്ന കുടുംബത്തിലാണ് ഉള്പ്പെടുന്നത്. നീന്തല് കാലുകളുടെ വിഭജന രീതി, വാല് ഭാഗമായ കൗഡല് റാമിയിലെ പ്രത്യേക ഘടന, ശരീരഘടനയിലെ വ്യത്യാസങ്ങള്, സ്പര്ശികളുടെ രൂപവ്യത്യാസങ്ങള് എന്നിവയാണ് ഇന്ത്യഫോന്റെ ബിജോയിയുടെ പ്രധാന പ്രത്യേകതകള്.
ഏറ്റവും ശ്രദ്ധേയമായ സവിശേഷത ലൈംഗിക ദ്വിരൂപത ഇല്ല എന്നതാണ്. സാധാരണയായി ഹാര്പാക്ടികോയിഡ് കോപിപോഡുകളില് ആണ് ജീവികള്ക്ക്, നീന്തല് കാലുകളില്, പ്രത്യേക മാറ്റങ്ങള് കാണാറുണ്ട്. എന്നാല് പുതുതായി കണ്ടെത്തിയ സ്പീഷീസില് ആണും പെണ്ണും ഒരേ ഘടനയാണ് കാണിക്കുന്നത്. ലാഫോന്റിടെ കുടുംബത്തിനുള്ളില് അപൂര്വമായ ഈ സവിശേഷത ജീവിയുടെ വര്ഗീയ സ്ഥാനത്തെ വ്യക്തമാക്കുന്ന ഒരു പ്രധാന സൂചനയായും വിലയിരുത്തുന്നു.
പുതിയ ജനുസും സ്പീഷീസും കുസാറ്റിലെ മറൈന് ബയോളജി വിഭാഗത്തിലെ ഗവേഷകയായ കെ. നീലിമ വാസുവും, മെക്സിക്കോയിലെ നാഷണല് ഓട്ടോണമസ് യൂണിവേഴ്സിറ്റി ഓഫ് മെക്സിക്കോയിലെ കോപിപോഡ് ടാക്സോണമിസ്റ്റ് ഡോ. സാമുവല് ഇ. ഗോമസ്- നോഗുറയും ചേര്ന്നാണ് ശാസ്ത്രീയമായി വിവരണം നടത്തിയത്. ഈ നേട്ടം തന്റെ അച്ഛന് കെ.സി. വാസുവിന്റെ സ്നേഹസ്മരണക്ക് നീലിമ വാസു സമര്പ്പിച്ചിട്ടുണ്ട്.
