അഹമ്മദാബാദ്: വിജയ് ഹസാരെ ട്രോഫി ഏകദിന ക്രിക്കറ്റ് ചാമ്പ്യന്ഷിപ്പില് നിന്ന് കേരളം പുറത്തായി. ഗ്രൂപ്പ് എയില് ഇന്നലെ തമിഴ്നാടിനെതിരെ നടന്ന മത്സരത്തില് പരാജയപ്പെട്ടതോടെയാണ് കേരളത്തിന്റെ മുന്നോട്ടുള്ള സാധ്യതകള് അവസാനിച്ചത്. നിര്ണായക മത്സരത്തില് തമിഴ്നാടിനോട് 77 റണ്സിനായിരുന്നു കേരളത്തിന്റെ തോല്വി.
ആദ്യം ബാറ്റ് ചെയ്ത തമിഴ്നാട് 50 ഓവറില് എട്ട് വിക്കറ്റ് നഷ്ടത്തില് 294 റണ്സെടുത്തു. കേരളത്തിന്റെ മറുപടി 40.2 ഓവറില് 217 റണ്സില് അവസാനിച്ചു. അതിവേഗ ഇന്നിങ്സ് കാഴ്്ചവച്ച കേരള ബാറ്റര്മാരില് ഒരാള് പോലും ഇന്നിങ്സ് കെട്ടിപ്പടുക്കാന് ശ്രമിക്കാതെ വന്നത് കേരളത്തിന് തിരിച്ചടി നേരിടുകയായിരുന്നു.
കേരളത്തിനായി ക്യാപ്റ്റന് രോഹന് കുന്നുമ്മല്(35 പന്തില് 73) മികച്ച പ്രകടനമാണ് കാഴ്ച്ചവച്ചത്. മറ്റ് ബാറ്റര്മാരില് ബാബ അപരാജിത്(35), വിഷ്ണു വിനോദ്(35) സല്മാന് നിസാര്(25) എന്നിവര് പൊരുതിയെങ്കിലും ദൈര്ഘ്യമേറിയ ഇന്നിങ്സ് കളിക്കാന് ആരും ശ്രിമിച്ചില്ല. തമിഴ്നാട് ബൗളര്മാരായ സച്ചിന് രതിയും മുഹമ്മദ് അലിയും നാല് വിതം വിക്കറ്റുകള് വീഴ്ത്തി.
നേരത്തെ തിമിഴ്നാടിനായി ക്യാപ്റ്റന് എന്. ജഗദീശന്(139) കാഴ്ച്ചവച്ച സെഞ്ചുറി പ്രകടനത്തിന്റെ ബലത്തിലാണ് അവര് മികച്ച ടോട്ടല് കണ്ടെത്തിയത്. തമിഴ്നാട് നിരയില് മറ്റ് ബാറ്റര്മാരാരും തന്നെ വമ്പന് ഇന്നിങ്സുകള് കാഴ്ച്ചവച്ചില്ല. കേരളത്തിനായി ഏദെന് ആപ്പിള് ടോം ആറ് വിക്കറ്റ് പ്രകടനം കാഴ്ച്ചവച്ചു.
ഗ്രൂപ്പ് എയില് 16 പോയിന്റുമായി മൂന്നാം സ്ഥാനക്കാരായാണ് കേരളം പുറത്തായത്. ആദ്യ രണ്ട് സ്ഥാനങ്ങളിലെത്തിയ കര്ണാടകയും മധ്യപ്രദേശും നോക്കൗട്ടില് കടന്നു.
