ഹൈദരാബാദ് : നടി ഗീതുമോഹന്ദാസ് സംവിധായികയുടെ കുപ്പായമിട്ടശേഷം സംവിധാനം ചെയ്ത ബിഗ് ബജറ്റ് സിനിമയാണ് യാഷിനെ നായകനാക്കിയുള്ള ടോക്സിക് എന്ന സിനിമ. ഈ സിനിമയുടെ ട്രെയിലര് കണ്ട് ഞെട്ടിയിരിക്കുകയാണ് സംവിധായകന് രാം ഗോപാല് വര്മ്മ. ഇതുപോലെ ഒരു സിനിമ ഇന്ത്യയിലെ പുരുഷസംവിധായകര്ക്ക് പോലും ഒരുക്കാന് കഴിയില്ലെന്ന വിധമുള്ള അഭിനന്ദനമാണ് രാംഗോപാല് വര്മ്മ ഗീതു മോഹന്ദാസിന് നല്കിയിരിക്കുന്നത്. എങ്ങിനെ ഇത്ര വയലന്സുള്ള ഒരു സിനിമ സ്ത്രീസംവിധായികയായ ഗീതു മോഹന്ദാസ് എടുത്തതെന്ന് അമ്പരക്കുകയാണ് രാം ഗോപാല് വര്മ്മ.
After seeing the @TheNameIsYash starring trailer of #Toxic I have no doubt that @GeethuMohandas_ is the ultimate symbol of Women Empowerment ..No Male director is Man enough in comparison to this Woman .. I still can’t believe she shot this 👇🏻 😳 https://t.co/ZxyxU8Da40 pic.twitter.com/qzFUcv9JIb
— Ram Gopal Varma (@RGVzoomin) January 8, 2026
മുതിര്ന്നവരെക്കുറിച്ചുള്ള യക്ഷിക്കഥ എന്നാണ് ഈ സിനിമയെ വിശേഷിപ്പിക്കുന്നത്. വിദേശികള് ഉള്പ്പെടെയുള്ളവര് അടങ്ങിയ പഴയകാല ഗോവ കേന്ദ്രമായി നടക്കുന്ന അധോലോക ജീവിതത്തിന്റെ കഥയാണ് ഈ സിനിമ പറയുന്നത്. 1980കളിലെ ഗോവയിലെ ഒരു ശക്തമായ മയക്കമരുന്ന് മാഫിയയുടെ കഥയാണിത്.
ഒരു ഹോളിവുഡ് സിനിമയുടെ കെട്ടും മട്ടും ഈ സിനിമയ്ക്കുണ്ടെന്ന് ട്രെയിലര് കണ്ടവര് മുഴുവന് അഭിപ്രായപ്പെടുന്നു. രണ്ട് മിനിറ്റ് 51 സെക്കന്റുള്ള ട്രെയിലര് അടിമുടി ഉദ്വേഗജനകമാണ്. ചുണ്ടില് ചുരുട്ടും കയ്യില് മെഷീന് ഗണ്ണുമായുള്ള യാഷിന്റെ എന്ട്രിയും കിടിലന്. കിയാര അദ്വാനി, നയന്താര മുതല് രുക്മിണി വസന്ത് വരെ നടിമാരുടെ നീണ്ട താരനിരയും ഉണ്ട്. മലയാളത്തില് ചെറിയ റോളുകളില് തിളങ്ങിയ നടന് സുര്ജിത് വേറിട്ട റോളില് പ്രത്യക്ഷപ്പെടുന്നത് ട്രെയിലറില് കാണാം.
കെജിഎഫിന് ശേഷം യാഷ് എന്ന നായകന്റെ വമ്പന് തിരിച്ചുവരവായി ടോക്സികിനെ വിശേഷിപ്പിക്കുന്നുണ്ട്. ട്രെയിലര് കാണുമ്പോള് ഈ അവകാശവാദം നേരാകുമെന്ന തോന്നലുണ്ട്. ഗെയിം ചേഞ്ചര്, വാര് 2 എന്നീ ഫ്ലോപ് സിനിമകള്ക്ക് ശേഷം ഒരു ഹിറ്റിനായി കൊതിയ്ക്കുന്ന കിയാര അദ്വാനിയും ടോക്സിക്കില് ഏറെ പ്രതീക്ഷപുലര്ത്തുന്നു. യാഷിന്റെ സഹോദരി ഗംഗ എന്ന കഥാപാത്രത്തെയാണ് നയന്താര അവതരിപ്പിക്കുന്നത്. വീണ്ടും നയന്താര തോക്കെടുക്കുന്നു എന്ന പ്രത്യേകതയും ടോക്സിക്കിനുണ്ട്.
200 കോടി മുതല് 600 കോടി വരെ ചെലവഴിച്ചാണ് ടോക്സിക് നിര്മ്മിച്ചിരിക്കുന്നതെന്ന് പറയുന്നു. നിര്മ്മാണചെലവിനെപ്പറ്റി ഔദ്യോഗിക കണക്ക് ഗീതുമോഹന്ദാസോ നിര്മ്മാതാക്കളോ പുറത്ത് വിട്ടിട്ടില്ല. ഒരു പാന് ഇന്ത്യന് സിനിമ എന്ന നിലയിലാണ് ടോക്സിക് ആസൂത്രണം ചെയ്തിരിക്കുന്നത്.
