കൊല്ക്കൊത്ത: ബംഗാള് നിമയസഭാ തെരഞ്ഞെടുപ്പിന് തൊട്ടുമുന്പായി നന്ദിഗ്രാമില് സഹകരണ കാര്ഷിക വികസന സമിതി തെരഞ്ഞെടുപ്പില് ആകെയുള്ള ഒമ്പത് സീറ്റുകളില് ഒമ്പതും നേടി ബിജെപി. ഒരൊറ്റ സീറ്റുപോലും തൃണമൂലിന് വിട്ടുകൊടുക്കാതെ മുഴുവന് സീറ്റുകളും നേടിയ ബിജെപിയുടെ വിജയം വരാനിരിക്കുന്ന നിയമസഭാ തെരഞ്ഞെടുപ്പിന് മുന്പുള്ള സാമ്പിള് വെടിക്കെട്ടായി കണക്കാക്കുന്നു.
തെരഞ്ഞെടുപ്പ് വിജയം ബിജെപി പ്രവര്ത്തകര് വന്വിജയാഹ്ളാദപ്രകടനത്തോടെ ആഘോഷിച്ചു. നന്ദിഗ്രാം നിയമസഭാ മണ്ഡലത്തില് ബിജെപിനേതാവും ബംഗാളിലെ ഇപ്പോഴത്തെ പ്രതിപക്ഷനേതാവുമായ സുവേന്ദു അധികാരി 2021ലെ നിയമസഭാ തെരഞ്ഞെടുപ്പില് തോല്പിച്ചത് മമത ബാനര്ജിയെയാണ്.
നന്ദിഗ്രാമിന് ബംഗാള് രാഷ്ട്രീയത്തില് ഏറെ പ്രാധാന്യമുണ്ട്. നന്ദിഗ്രാമിലും സിംഗൂരിലും ടാറ്റയുടെ നാനോ കാര് ഫാക്ടറിക്കായി കര്ഷകഭൂമി നല്കിയതിനെതിരെ മമതയുടെ നേതൃത്വത്തില് നടന്ന ജനകീയ സമരമാണ് അവിടുത്തെ ഇടത്പക്ഷഭരണത്തിന്റെ അന്ത്യം കുറിച്ചത്. എന്നാല് അന്ന് മമതയ്ക്കൊപ്പം നിന്ന കര്ഷകര് ഇപ്പോള് മമത ബാനര്ജിയെയും തൃണമൂല് കോണ്ഗ്രസിനെയും കൈവിട്ടിരിക്കുകയാണ് എന്നതിന്റെ സൂചനയാണ് നന്ദിഗ്രാമിലെ സഹകരണമേഖലയിലെ കാര്ഷിക വികസനസമിതി തെരഞ്ഞെടുപ്പിലെ ബിജെപിയുടെ സമ്പൂര്ണ്ണ വിജയം. ഒമ്പതില് ഒമ്പത് സീറ്റും നേടുക എന്നത് മമതയ്ക്കെതിരായ കര്ഷകരുടെ വികാരം തന്നെയാണ് കാണിക്കുന്നത്. തൃണമൂലിന് മാത്രമല്ല, ഈ തെരഞ്ഞെടുപ്പില് കോണ്ഗ്രസിനും ഇടത്പക്ഷത്തിനും ഒരു സീറ്റുപോലും ലഭിച്ചില്ല എന്നതും ബിജെപിയുടെ അപ്രമാദിത്വമാണ് തെളിയിക്കുന്നത്.
