ന്യൂദല്ഹി: കശ്മീരിലെ റിയാസി ജില്ലയിലെ കത്രയിലെ ത്രികുട കുന്നിന് മുകളില് സ്ഥിതി ചെയ്യുന്ന മാതാ വൈഷ്ണോദേവി ക്ഷേത്രം വിശ്വപ്രസിദ്ധമാണ്. ഈ ക്ഷേത്രത്തിലെ ഭക്തര് നല്കുന്ന സംഭാവനകള് സ്വീകരിച്ചാണ് മാതാ വൈഷ്ണോദേവിയുടെ പേരില് ഇവിടെ ഒരു മെഡിക്കല് കോളെജ് സ്ഥാപിച്ചത്. പക്ഷെ ഇവിടെ പ്രവേശനം ലഭിച്ച 50ല് 44 പേരും കശ്മീര് മുസ്ലിം വിദ്യാര്ത്ഥികളായതോടെ വലിയ വിവാദം പൊട്ടിപ്പുറപ്പെട്ടു. ഹരിയാനയിലെ അല് ഫലാ മെഡിക്കല് കോളെജിലെ ഡോക്ടറായ കശ്മീര് മുസ്ലിമായ ഉമര് നബി ഉള്പ്പെടെയുള്ളവര് ദല്ഹിയില് കാര് ബോംബ് സ്ഫോടനം നടത്തിയ പശ്ചാത്തലത്തില് ഇത്രയ്ക്കധികം കശ്മീരി മുസ്ലിം വിദ്യാര്ത്ഥികള് ഒരു കോളെജില് എത്തിയാല് ഭീകരവാദം ഉണ്ടാകുമോ എന്ന ആശങ്കകളും പരാതികളും വ്യാപകമായി. മാത്രമല്ല, മാതാ വൈഷ്ണോവി ദേവിക്ക് ഭക്തര് നല്കിയ സംഭാവനകള് കൊണ്ട് അന്യവിഭാഗത്തില്പ്പെട്ടവരെ എന്തിന് പഠിപ്പിക്കുന്നു എന്ന വിമര്ശനങ്ങളും ഉയര്ന്നു.
ശ്രീമാതാ വൈഷ്ണോദേവി മെഡിക്കല് കോളെജില് ആകെയുള്ള 50 സീറ്റുകളില് 44 പേരും കശ്മീര് മുസ്ലിം വിദ്യാര്ത്ഥികളായതിനാല് കുട്ടികളെ തെരഞ്ഞെടുത്തതില് അട്ടിമറി നടന്നുവെന്നും ആരോപണമുയര്ന്നിരുന്നു. പല രീതികളിലും പരാതികള് ഉയര്ന്ന സാഹചര്യത്തില് ഇക്കാര്യം പരിശോധിക്കാന് നാഷണല് മെഡിക്കല് കമ്മീഷനിന്റെ ഭാഗമായ മെഡിക്കല് അസെസ്മെന്റ് ആന്റ് റേറ്റിംഗ് ബോര്ഡ് (എംഎആര്ബി) ഇവിടെ സന്ദര്ശനം നടത്തിയിരുന്നു. അവരുടെ റിപ്പോര്ട്ടിന്റെ അടിസ്ഥാനത്തില് ശ്രീ മാതാ വൈഷ്ണോദേവി ഇന്സ്റ്റിറ്റ്യൂട്ട് ഓഫ് മെഡിക്കല് സയന്സിനുള്ള (എസ് എം വിഡി ഐ എംഇ) മെഡിക്കല് കോഴ്സ് നടത്തുന്നതിനുള്ള അംഗീകാരം റദ്ദാക്കുകയായിരുന്നു.
അംഗീകാരം റദ്ദാക്കിയത് മതം കാരണമല്ല, അടിസ്ഥാനസൗകര്യക്കുറവ് കൊണ്ട്
അടിസ്ഥാനസൗകര്യവിസകനങ്ങള് കുറവാണ്, ക്ലിനിക്കല് ഉപകരണങ്ങളുടെ കുറവ്, ഫാക്കല്റ്റിയുടെയും റസിഡന്റ് ഡോക്ടര്മാരുടെയും പോരായ്മകള് എന്നിങ്ങനെ പലതരത്തിലുള്ള പരാതികളും ഉയര്ന്നിരുന്നു. പരാതികള് കുമിഞ്ഞുകൂടിയതോടെ ഈയിടെയാണ് ദേശീയ മെഡിക്കല് കമ്മീഷനന്റെ ഭാഗമായ മെഡിക്കല് അസെസ്മെന്റ് ആന്റ് റേറ്റിംഗ് ബോര്ഡ് (എംഎആര്ബി) ഇവിടെ സന്ദര്ശനം നടത്തിയത്. നേരിട്ടുള്ള സന്ദര്ശനത്തില് കോളെജിന്റെ അടിസ്ഥാനസൗകര്യങ്ങള് പോരെന്ന് ബോധ്യപ്പെടുകയായിരുന്നു. ഇതിന്റെ അടിസ്ഥാനത്തില് കോളെജില് നല്കിയ അംഗീകാരം റദ്ദാക്കാന് സമിതി ആവശ്യപ്പെടുകയായിരുന്നു. ഇതിന്റെ അടിസ്ഥാനത്തിലാണ് ദേശീയ മെഡിക്കല് കമ്മീഷന് ഇവിടുത്തെ എംബിബിഎസ് കോഴ്സിനുള്ള അംഗീകാരം റദ്ദാക്കിയത്.
നേരത്തെ കോളെജില് അഡ്മീഷന് നടത്തരുതെന്ന് ആവശ്യപ്പെട്ട് രാഷ്ട്രീയ ബജ്റംഗ് ദള് ഉള്പ്പെടെ നിരവധി സംഘടനകള് പ്രതിഷേധങ്ങള് സംഘടിപ്പിച്ചിരുന്നു. ഇത് കോളെജ് മാനേജ് മെന്റിന് തീരാത്തലവേദനയാവുകയും ക്രമസമാധാനപ്രശ്നം ഉണ്ടാകുമോ എന്ന ആശങ്കയും ഉയര്ന്നിരുന്നു.
