ഇസ്ലാമാബാദ് : കഴിഞ്ഞ വർഷം സായുധ സംഘങ്ങൾ പാകിസ്ഥാന് സമ്മാനിച്ചത് നിരവധി കയ്പേറിയ ഓർമ്മകൾ. കഴിഞ്ഞ വർഷം പാകിസ്ഥാനിൽ സംഘർഷ മരണങ്ങളിൽ 74 ശതമാനം വർധനവുണ്ടായതായി കണക്കുകൾ സൂചിപ്പിക്കുന്നു. 2025 ലെ 3,413 മരണങ്ങൾ കഴിഞ്ഞ ദശകത്തിലെ ഏറ്റവും ഉയർന്ന നിരക്കാണ്. ഇസ്ലാമാബാദ് ആസ്ഥാനമായുള്ള അന്വേഷണ പഠന സംഘടനയായ പാകിസ്ഥാൻ ഇൻസ്റ്റിറ്റ്യൂട്ട് ഫോർ കോൺഫ്ലിക്റ്റ് ആൻഡ് സെക്യൂരിറ്റി സ്റ്റഡീസ് (പിഐസിഎസ്എസ്) നടത്തിയ പഠനത്തിൽ അഫ്ഗാനിസ്ഥാനിൽ നിന്ന് ലഭിച്ച യുഎസ് ആയുധങ്ങൾ ഉപയോഗിച്ച് പാകിസ്ഥാൻ സൈന്യത്തിനെതിരെ സായുധ സംഘങ്ങൾ ആക്രമണം നടത്തിയതായി റിപ്പോർട്ട് ചെയ്തു.
പിഐസിഎസ്എസ് ഡാറ്റ പ്രകാരം ബി എൽ എ , ടി ടി പി വിമത ഗ്രൂപ്പുകൾ അഫ്ഗാനിസ്ഥാനിൽ നിന്ന് നേടിയെടുത്ത യുഎസ് നിർമ്മിത ആയുധങ്ങൾ ഉപയോഗിക്കുന്നത് പാകിസ്ഥാൻ സൈന്യത്തിന് ഗണ്യമായ നഷ്ടം വരുത്തി വച്ചിട്ടുണ്ടെന്നും പഠനങ്ങൾ പറയുന്നു. കൂടാതെ തീവ്രവാദ അക്രമങ്ങളിലും ഭീകരവിരുദ്ധ പ്രവർത്തനങ്ങളിലും മരണസംഖ്യ 3,413 ആയി ഉയർന്നുവെന്നും 2024 ൽ ഇത് 1,950 ആയിരുന്നെന്നും പഠന ഏജൻസി പറഞ്ഞു. അഫ്ഗാനിസ്ഥാനിൽ നിന്ന് യുഎസ് പിൻവാങ്ങുമ്പോൾ ഉപേക്ഷിക്കപ്പെട്ട ആയുധങ്ങൾ പാകിസ്ഥാൻ വിരുദ്ധ ഗ്രൂപ്പുകൾക്ക് ഒരു പ്രധാന ശക്തിയായി മാറിയിട്ടുണ്ടെന്ന് റിപ്പോർട്ട് പറയുന്നു. ഖൈബർ പഖ്തൂൺഖ്വയിലും ബലൂചിസ്ഥാനിലും പാകിസ്ഥാൻ സൈന്യം പ്രത്യേകിച്ച് ദുർബലമാണ്.
2021-ൽ അഫ്ഗാനിസ്ഥാനിൽ നിന്ന് യുഎസ് പിൻവാങ്ങിയതിനുശേഷം ഉപേക്ഷിക്കപ്പെട്ട ആയുധങ്ങളും സൈനിക ഉപകരണങ്ങളും ക്രമേണ അഫ്ഗാൻ താലിബാനിൽ നിന്ന് കടത്തിക്കൊണ്ടുവന്ന ടിടിപി പോലുള്ള സായുധ ഗ്രൂപ്പുകളുടെ കൈകളിലേക്ക് എത്തിയതായി പിഐസിഎസ്എസ് മാനേജിംഗ് ഡയറക്ടർ അബ്ദുള്ള ഖാൻ പറയുന്നു. 2021-ൽ അധികാരത്തിൽ തിരിച്ചെത്തിയ ശേഷം താലിബാൻ ഒരു ദശലക്ഷം യുഎസ് ആയുധങ്ങളും സൈനിക ഉപകരണങ്ങളും പിടിച്ചെടുത്തിരുന്നു.
അതേ സമയം 2025-ൽ പാകിസ്ഥാനിൽ ചാവേർ ബോംബാക്രമണങ്ങളിൽ വർദ്ധനവുണ്ടായി. കഴിഞ്ഞ വർഷം 26 ചാവേർ ആക്രമണങ്ങൾ രേഖപ്പെടുത്തി, 2024-നെ അപേക്ഷിച്ച് 53% വർധനവാണുണ്ടായത്. ഈ ആക്രമണങ്ങൾ പ്രധാനമായും സുരക്ഷാ സേനകളെയും, സൈനികരെയും, ചൈനയുമായി ബന്ധപ്പെട്ട ബലൂചിസ്ഥാൻ പ്രവിശ്യയിലെ സെൻസിറ്റീവ് സംഘങ്ങളെയും ലക്ഷ്യം വച്ചായിരുന്നു നടന്നത്.
കൂടാതെ 2025-ൽ 667 സുരക്ഷാ ഉദ്യോഗസ്ഥർ കൊല്ലപ്പെട്ടു, മുൻ വർഷത്തേക്കാൾ 26% വർധനവാണ് ഇത്. 2011-ന് ശേഷമുള്ള ഏറ്റവും ഉയർന്ന വാർഷിക കണക്കുമാണിത്. 2025-ൽ 580 സാധാരണക്കാർ കൊല്ലപ്പെട്ടു, 2015-ന് ശേഷമുള്ള ഏറ്റവും ഉയർന്ന കണക്കാണിത്.
