ന്യൂദല്ഹി: നാഷണല് ഫിഷറീസ് ഡെവലപ്മെന്റ് ബോര്ഡ് (എന്എഫ്ഡിബി) പ്രാദേശിക കേന്ദ്രം തിരുവനന്തപുരത്ത് സ്ഥാപിക്കും. കേന്ദ്രമന്ത്രി ജോര്ജ് കുര്യന്റെ പരിശ്രമമാണ് നേട്ടത്തിന് പിന്നില്. ഹൈദരാബാദില് ചേര്ന്ന എന്എഫ്ഡിബി യോഗത്തില് കേന്ദ്ര ഫിഷറീസ്, മൃഗ സംരക്ഷണ, ക്ഷീര വികസന വകുപ്പ് മന്ത്രി രാജീവ് രഞ്ജന് സിങ്ങാണ് പ്രഖ്യാപനം നടത്തിയത്. കേന്ദ്രം സ്ഥാപിക്കാനുള്ള എല്ലാ പ്രാഥമിക നടപടിക്രമങ്ങളും പ്രധാനമന്ത്രിയുടെ തിരുവനന്തപുരം സന്ദര്ശനത്തിനു മുമ്പുണ്ടാകും.
ഇതുവഴി കേരളത്തിന്റെ ഫിഷറീസ് രംഗത്ത് സമഗ്ര വികസനമാണ് ലക്ഷ്യംവയ്ക്കുന്നതെന്ന് കേന്ദ്ര ഫിഷറീസ്, മൃഗ സംരക്ഷണ, ക്ഷീര വികസന വകുപ്പ് സഹമന്ത്രി ജോര്ജ് കുര്യന് പറഞ്ഞു. മത്സ്യ ഉത്പാദനം വര്ദ്ധിപ്പിക്കുക, അടിസ്ഥാന സൗകര്യങ്ങള് മെച്ചപ്പെടുത്തുക, തൊഴില് അവസരങ്ങള് സൃഷ്ടിക്കുക തുടങ്ങിയ പ്രവര്ത്തനങ്ങളെല്ലാം ഈ കേന്ദ്രം ഏകോപിപ്പിക്കും. സമുദ്രമത്സ്യബന്ധനത്തിനുപരി കുളങ്ങള്, തടാകങ്ങള്, ജലാശയങ്ങള് എന്നിവയില് മത്സ്യക്കൃഷി പ്രോത്സാഹിപ്പിക്കും. സമുദ്ര, ഉള്നാടന്, തീരദേശ മത്സ്യക്കൃഷി മേഖലകളെ ഏകോപിപ്പിച്ച് തുല്യവളര്ച്ച ഉറപ്പാക്കും. മത്സ്യത്തൊഴിലാളികള്ക്കായി ലാന്ഡിങ് സെന്ററുകള്, മത്സ്യസംഭരണ യൂണിറ്റുകള്, ഡ്രൈയിങ് യൂണിറ്റുകള് എന്നിവ സ്ഥാപിക്കും. പരിസ്ഥിതി സൗഹൃദ മത്സ്യക്കൃഷി, കടല്പ്പായല് കൃഷി, മറൈന് കള്ച്ചര് എന്നിവ പ്രോത്സാഹിപ്പിക്കും. മത്സ്യത്തൊഴിലാളികള്ക്കും സംരംഭകര്ക്കും ആവശ്യമായ പരിശീലനവും നല്കും.
ജോര്ജ് കുര്യന് മന്ത്രിസ്ഥാനം ഏറ്റെടുത്തശേഷം അദ്ദേഹത്തിന്റെ കീഴിലുള്ള മന്ത്രാലയങ്ങളില് നിന്നായി ആയിരത്തിലധികം കോടി രൂപയുടെ പദ്ധതികളാണ് കേരളത്തില് നടപ്പാക്കിക്കൊണ്ടിരിക്കുന്നത്. അതില് കൂടുതലും ഫിഷറീസ് മേഖലയുടെ അടിസ്ഥാന സൗകര്യ വികസനത്തിനാണ്.
