തിരുവനന്തപുരം: ശബരിമല സ്വര്ണ്ണക്കൊള്ളക്കേസില് കോണ്ഗ്രസ് നേതാവ് സോണിയാഗാന്ധിയും അന്വേഷണപരിധിയിലേക്ക് വന്നേക്കും. സോണിയാഗാന്ധിയെ അവരുടെ വസതിയില്വെച്ച് കൂടിക്കാഴ്ച നടത്തിയത് സംബന്ധിച്ച് മുഴുവന് വിവരങ്ങളും ഉണ്ണികൃഷ്ണന് പോറ്റി എസ് ഐ ടിക്ക് കൈമാറിയതോടെയാണിത്.
സോണിയാഗാന്ധിയുടെ വസതിയില് സോണിയാഗാന്ധിയ്ക്കൊപ്പം പോറ്റി നില്ക്കുന്ന ചില ഫോട്ടോകള് പുറത്തുവന്നതോടെയാണ് സോണിയാഗാന്ധി-പോറ്റി ബന്ധത്തെക്കുറിച്ചുള്ള വിവാദം തുടങ്ങിയത്. പിന്നീടാണ് പോറ്റിയെ സോണിയാഗാന്ധിയ്ക്ക് അടുത്ത് എത്തിച്ച ആന്റോ ആന്റണി, അടൂര്പ്രകാശ് എന്നീ കോണ്ഗ്രസ് നേതാക്കള് രംഗത്തെത്തിയത്. മാത്രമല്ല, ഒരു ഫോട്ടോയില് സോണിയയ്ക്കും പോറ്റിക്കും അടൂര് പ്രകാശിനും ഒപ്പം ശബരിമല സ്വര്ണ്ണക്കൊള്ളക്കേസില് അറസ്റ്റിലായ ബെല്ലാരി ഗോവര്ധനും പങ്കജ് ഭണ്ഡാരിയും ഉണ്ടായിരുന്നു എന്നത് സോണിയയെക്കുറിച്ചുള്ള സംശയം ബലപ്പെടുത്തുന്നു. യുപിഎ അധ്യക്ഷയായിരുന്ന കാലത്ത് ഉന്നത കോണ്ഗ്രസ് നേതാക്കള്ക്ക് പോലും കാണാന് അനുവാദം നല്കാത്ത സോണിയയുടെ മുന്നിലേക്ക് എങ്ങിനെ ഉണ്ണികൃഷ്ണന് പോറ്റിയും ബെല്ലാരി ഗോവര്ധനും പങ്കജ് ഭണ്ഡാരിയും എത്തിപ്പെട്ടു?- സംശയം ബലപ്പെടുത്തുന്ന ചോദ്യമാണിത്. ഇതിനെല്ലാം ഉണ്ണിക്കൃഷ്ണന് പോറ്റി ഉത്തരം നല്കിയിരിക്കാമെന്ന് കരുതുന്നു. അങ്ങിനെയെങ്കില് സോണിയയെയും ചോദ്യം ചെയ്യേണ്ടതായി വരും. സുപ്രീംകോടതിയും ഹൈക്കോടതിയും ശക്തമായി ശബരിമല സ്വര്ണ്ണക്കൊള്ളക്കേസില് ഇടപെടുന്നതിനാല് കേസ് വൈകാതെ ഇഡിയ്ക്കും സിബിഐയ്ക്കും വിട്ടേക്കും. കാരണം എസ് ഐി അന്വേഷണം ശക്തമായി മുന്നേറുമ്പോഴും വമ്പന് സ്രാവുകളിലേക്ക് എത്തുമ്പോള് കേസന്വേഷണം മന്ദഗതിയിലാകുന്നതിനെ പല കുറി സുപ്രീംകോടതിയും ഹൈക്കോടതിയും വിമര്ശിച്ചിരുന്നു. എന്തായാലും അന്വേഷണത്തിലേക്ക് കേന്ദ്ര ഏജന്സികള് കൂടി എത്തുമ്പോള് അവരായിരിക്കും സോണിയയെ ചോദ്യം ചെയ്യുക.
ഇതിനെ പലരീതിയില് ന്യായീകരിക്കാന് അടൂര് പ്രകാശ് ശ്രമിച്ചെങ്കിലും ആ ന്യായവാദങ്ങളെല്ലാം ദുര്ബലമായിരുന്നു. സോണിയാഗാന്ധിയ്ക്ക് രോഗബാധയുണ്ടായപ്പോള് മരുന്നു കഴിയ്ക്കുന്നതോടൊപ്പം മന്ത്രവുമാകട്ടെ എന്നതിനാലാണ് സോണിയഗാന്ധിയുടെ കയ്യില് ചരട് കെട്ടാന് പോറ്റി വന്നതെന്നും അടൂര് പ്രകാശ് വിശദീകരിച്ചിരുന്നു. പോറ്റി സോണിയാഗാന്ധിയുടെ കയ്യില് ചരട് കെട്ടുന്ന ഫോട്ടോയും പുറത്തുവന്നിരുന്നു. ശബരിമല അയ്യപ്പന് മേല് അത്രയ്ക്ക് വിശ്വാസമുള്ള നേതാവായിരുന്നെങ്കില് സോണിയയുടെ കയ്യില് ഉണ്ണിക്കൃഷ്ണന് പോറ്റി ചരട് കെട്ടിയതിനെ ന്യായീകരിക്കാമായിരുന്നു. എന്നാല് സോണിയ ഒരു കാലത്തും ശബരിമല ദര്ശനത്തിന് പോകാത്ത നേതാവാണ്.
അതിനിടെയാണ് ശബരിമലയിലെ സ്വര്ണ്ണക്കൊള്ള നടന്ന സമയത്ത് ദേവസ്വം മന്ത്രിയായിരുന്ന കടകംപിള്ളി സുരേന്ദ്രന് ഇറ്റലി സന്ദര്ശിച്ച വാര്ത്ത പുറത്തുവന്നിരിക്കുന്നത്. എന്ത് ആവശ്യത്തിനാണ് സുരേന്ദ്രന് ഇറ്റലി സന്ദര്ശിച്ചതെന്ന കാര്യം എസ് ഐ ടി അന്വേഷിച്ച് വരികയാണ്. ഇത്രയും വിവാദങ്ങളുണ്ടായിട്ടും സോണിയ ഗാന്ധിയും ഹൈക്കമാന്റും പാലിക്കുന്ന മൗനം സംശയത്തെ കൂടുതല് ബലപ്പെടുത്തുകയാണ്.
