തിരുവനന്തപുരം: ഉണ്ണികൃഷ്ണന് പോറ്റി സോണിയയെ കണ്ടപ്പോള് ബെല്ലാരി ഗോവര്ധനും പങ്കജ് ഭണ്ഡാരിയും അടൂര് പ്രകാശും ഒപ്പമുണ്ടായിരുന്നുവെന്നും ഇവര് എങ്ങിനെ സോണിയയുടെ അടുത്ത് എത്തിയതെന്നതിന് കോണ്ഗ്രസ് ഹൈക്കമാന്റോ അടൂര് പ്രകാശോ മറുപടി പറയുമെന്നും ജോണ് ബ്രിട്ടാസ് എംപി. ഇവരുടെ ഫോട്ടോയും ജോണ് ബ്രിട്ടാസ് മാധ്യമങ്ങളെ കാണിച്ചു. ഇതോടെ ശബരിമലയിലെ സ്വര്ണ്ണക്കൊള്ളയില് ഇടത്പക്ഷവും കോണ്ഗ്രസും തമ്മിലുള്ള ഏറ്റുമുട്ടല് ശക്തമാവുകയാണ്.
യാദൃച്ഛികമായി സോണിയയുടെ വീട്ടില് പോയപ്പോള് പോറ്റിയെ കണ്ടു എന്ന അടൂര് പ്രകാശിന്റെ പ്രസ്താവന പച്ചക്കള്ളമാണ്. തന്നെ കണ്ടപ്പോള് പോറ്റിയാണ് ഒരു പടമെടുക്കണമെന്നും തന്നോട് ചേര്ന്ന് നില്ക്കണമെന്നും പറയുകയായിരുന്നെന്നും അടൂര് പ്രകാശ് വാദിക്കുന്നു.. പോറ്റി ദല്ഹിയില് വന്നു സോണിയാഗാന്ധിക്ക് അപ്പോയിന്റ് മെന്റ് എടുത്ത കാര്യം തലേദിവസം തന്നോട് പറഞ്ഞുവെന്നും താനും വേണമെന്ന് പോറ്റി നിര്ബന്ധം പിടിച്ചുവെന്നും അതുകൊണ്ട് പോയതാണെന്നും പിന്നീട് പറഞ്ഞ് അടൂര് പ്രകാശ് ന്യായീകരിക്കാന് ശ്രമിച്ചു. ഇതെല്ലാം പരസ്പരം കടകവിരുദ്ധമായ പ്രസ്താവനകളാണെന്നും ജോണ് ബ്രിട്ടാസ് പറഞ്ഞു. .അപ്പോഴും സോണിയയ്ക്കൊപ്പം ബെല്ലാരി ഗോവര്ധനും പങ്കജ് ഭണ്ഡാരിയും എങ്ങിനെ അവിടെ വന്നു എന്ന കാര്യം അടൂര് പ്രകാശ് മറുപടി പറയണം.
ഇപ്പോള് അടൂര് പ്രകാശ് പറയുന്നത് സോണിയാഗാന്ധി അസുഖബാധിതയായിരുന്നു. അതിന് പരിഹാരമായി മരുന്ന് കഴിക്കുന്നതോടൊപ്പം മന്ത്രവും വേണമെന്ന് പറഞ്ഞതുകൊണ്ടാണ് പോറ്റി പൂജിച്ച ചരട് കെട്ടാന് എത്തിയതെന്നാണ് ഇപ്പോള് അടൂര് പ്രകാശ് പറയുന്നത്. അത്രയും വലിയ ഭക്തയാണെങ്കില് എന്തുകൊണ്ട് സോണിയ ഇതുവരെയും ശബരിമലയില് പോയില്ല?- ജോണ് ബ്രിട്ടാസ് പറഞ്ഞു.
യുപിഎ പ്രസിഡന്റായിരിക്കുമ്പോള് സോണിയാഗാന്ധിയുടെ അപ്പോയിന്റ് മെന്റ് മുതിര്ന്ന കോണ്ഗ്രസ് നേതാക്കള്ക്ക് പോലും കിട്ടില്ലെന്നിരിക്കെ പോററിയും ഗോവര്ധനും ഭണ്ഡാരിയും എങ്ങിനെ അവിടെ എത്തിയെന്നകിന് മറുപടി കിട്ടണം. ഇതുവരെയും കോണ്ഗ്രസ് ഹൈക്കമാന്റോ സോണിയാഗാന്ധിയോ ഈ വിഷയത്തില് പ്രതികരിച്ചിട്ടില്ലെന്നും ബ്രിട്ടാസ് വിമര്ശിച്ചു.
