വീടുപണിയുമ്പോൾ വാസ്തു നോക്കുന്ന നിരവധി പേരുണ്ട്. കിടപ്പുമുറിയും അടുക്കളയും ഒരുക്കുന്നത് മുതൽ കട്ടിലും അലമാരയുമൊക്കെ വയ്ക്കുന്നതിൽ വരെ വാസ്തു നോക്കുന്നവരുണ്ട്. ഇല്ലെങ്കിൽ അസുഖം, കടബാദ്ധ്യതയടക്കമുള്ള നിരവധി പ്രശ്നങ്ങൾ ഉണ്ടാകുമെന്നാണ് അവർ വിശ്വസിക്കുന്നത്.
വാസ്തു ശാസ്ത്ര പ്രകാരം ദമ്പതികൾ തെക്ക് പടിഞ്ഞാറ് ഭാഗത്തുള്ള മുറിയിലാണ് കിടക്കേണ്ടത്. ഇത് ഇവർ തമ്മിലുള്ള ബന്ധം ദൃഢമാക്കും. മാസ്റ്റർ ബെഡ് റൂമിന്റെ അളവ് അടുക്കളയുടെ അളവിനേക്കാൾ കുറഞ്ഞുപോകാതിരിക്കാൻ ശ്രദ്ധിക്കണം. അടുക്കളയുടെ അളവ് വലുതായിക്കഴിഞ്ഞാൽ ചെലവ് കൂടുതലായിപ്പോകും.ദമ്പതികളാണ് മാസ്റ്റർ ബെഡ്റൂമിൽ കിടക്കേണ്ടത്. വിവാഹം കഴിയാത്തവർ അല്ലെങ്കിൽ പഠിച്ചുകൊണ്ടിരിക്കുന്ന കുട്ടികളെ ഒരിക്കലും തെക്ക് – പടിഞ്ഞാറ് ഭാഗത്തുള്ള മുറിയിൽ കിടക്കാൻ അനുവദിക്കരുത്. ഇത് കുട്ടികളുടെ വിദ്യാഭ്യാസം വളരെ പിന്നിലായിപ്പോകാൻ ഇടവരുത്തുമത്രേ.
പൂജാമുറിക്കല്ലാതെ വേറെ ഒരു മുറിക്കും സമചതുരം വയ്ക്കാൻ പാടില്ല. തെക്ക് കിഴക്കാണ് പൂജാമുറിക്ക് ഉത്തമം. ക്വാർട്ടേഴ്സിലൊക്കെ താമസിക്കുന്നവർക്ക് വാസ്തു സമ്പൂർണമായ വീടുകളിൽ അവർക്ക് കിടക്കാൻ സാധിക്കില്ല. വേസ്റ്റ് കുഴികൾ വായുകോണിലൊക്കെ കുഴിച്ച് കഴിഞ്ഞാൽ ധനനഷ്ടവും അപകടങ്ങളുമൊക്കെയുണ്ടാകാം.
