വാഷിംഗ്ടണ് : ഏത് പാപത്തിന്റെ വഴി സ്വീകരിച്ചായാലും അമേരിക്കയെ പുനരുജ്ജീവിപ്പിക്കുക, തളരുന്ന ഡോളറിനെ വീണ്ടും പ്രതാപകാലത്തിലേക്ക് നയിക്കുക എന്നിവയാണ് ട്രംപിന്റെ അടിയന്തരലക്ഷ്യങ്ങള്. അതിന് വേണ്ടി തന്നെയാണ് വെനസ്വേല എന്ന ലോകത്തിലെ ഏറ്റവും സമ്പന്നമായ എണ്ണശേഖരമുള്ള രാജ്യത്തെ പ്രസിഡന്റിനെ ബന്ദിയാക്കി പിടിച്ചുകൊണ്ടുപോയത്.
സൗദിയില് 26700 കോടി ബാരല് എണ്ണയാണ് ശേഖരമായി ബാക്കിയുള്ളതെങ്കില് വെനസ്വേലയുടെ കയ്യില് 30300 കോടി ബാരല് എണ്ണശേഖരം ബാക്കിയുണ്ട്. ഒരു ബാരല് എന്നാല് 159 ലിറ്റര് എണ്ണയാണ്. ലോകത്ത് ഏറ്റവും കൂടുതല് എണ്ണ ഉല്പാദിപ്പിക്കുന്ന രാജ്യം അമേരിക്കയാണ്. പക്ഷെ അമേരിക്കയുടേത് സ്വീറ്റ് ഓയില് ആണ്. ഇത് അധികവും ഗ്യാസോലിന് ഉണ്ടാക്കാനാണ് ഉപയോഗിക്കുന്നത്. കാറുകളിലും ട്രക്കുകളിലും മോട്ടോര്സൈക്കിളുകളിലും എല്ലാം ഈ ഗ്യാസോലിന് ആണ് ഉപയോഗിക്കുന്നത്.
പക്ഷെ വെനസ്വേലയില് നിന്നും കുഴിച്ചെടുക്കുന്ന അസംസ്കൃത എണ്ണ നല്ല കട്ടിയുള്ളതാണ്. ഇതിനെ റിഫൈനറികളില് ശുദ്ധീകരിച്ചാല് ഡീസല്, ടാര്, വ്യവസായങ്ങള്ക്കും വലിയ വാഹനങ്ങള്ക്കുമുള്ള ഇന്ധനം എന്നിവ ലഭിക്കും. ലോകമാകെ ഡീസല് ക്ഷാമത്താല് വലയുകയാണ്. വെനസ്വേലയില് എണ്ണകുഴിച്ചെടുക്കല് കുറഞ്ഞതും വെനസ്വേലയുടെ ഡീസല്വില്പന ഉപരോധം മൂലം നിരോധിച്ചതിനാലും ലോകത്ത് ഈ ഡീസല് ലഭ്യമല്ല. ആ വരുമാനക്കലവറയാണ് അമേരിക്കന് എണ്ണഖനന, ശുദ്ധീകരണക്കമ്പനികള് വന്ന് തുറക്കാന് പോകുന്നത്.
അമേരിക്കയിലെ നിരവധി എണ്ണശുദ്ധീകരണശാലകള് പ്രധാനമായും വെനസ്വേലയുടെ അസംസ്കൃത എണ്ണ ശുദ്ധീകരിക്കാന് വേണ്ടി നിര്മ്മിച്ചവയാണ്. എന്നാല് വെനസ്വേല അമേരിക്കയുമായി അകന്നതോടെ ഈ ശുദ്ധീകരണശാലകളില് പലതും അടുച്ചൂപൂട്ടി. ഇതെല്ലാം ഇനി തുറക്കും. ഇവിടെയെല്ലാം അമേരിക്കക്കാര്ക്ക് തന്നെ ജോലിയും ലഭിയ്ക്കും. മറ്റ് ലോകരാഷ്ട്രങ്ങളിലെ സമ്പത്ത് കൊള്ളയടിച്ചാലും അമേരിക്കയെ പുനരുജ്ജീവിപ്പിക്കുക എന്നത് തന്നെയാണ് ട്രംപിന്റെ ലക്ഷ്യം. മാത്രമല്ല, ലോകരാഷ്ട്രങ്ങള് മുഴുവന് ഇനി ഡീസല് വാങ്ങാന് പോകുന്നത് അമേരിക്കയുടെ കയ്യില് നിന്നാണ്. ഈ ഇടപാടുകള് എല്ലാം ഡോളറില് ആണ് നടക്കുക. ഇതോടെ ഡോളര് വീണ്ടും ലോകത്തിന്റെ കരുത്തുറ്റ കറന്സിയാകും.
വെനസ്വേലയുടെ എണ്ണയൊഴുക്കാനുള്ള പൈപ്പ് ലൈനുകള് എല്ലാം കാലപ്പഴക്കമുള്ളവയാണ്. ഇതെല്ലാം പുതുക്കാന് 5800 കോടി ഡോളര് ആവശ്യമാണ്. ഈ പണമെല്ലാം അമേരിക്കയിലെ എണ്ണക്കമ്പനികള് മുടക്കും. വെനസ്വേലയില് എണ്ണയുണ്ടെങ്കിലും ഖനനം ശക്തമായി നടന്നിരുന്നില്ല. അതിനായി അമേരിക്കയിലെ എണ്ണക്കമ്പനികള് വന്തോതില് പണം മുടക്കും.
