വിജ്ഞാനപ്രദമായ നിരവധി ഗ്രന്ഥങ്ങളുടെ കര്ത്താവും, കവിയും വാഗ്മിയും സര്വോപരി മികച്ച സംഘാടകനുമായിരുന്ന പി. പരമേശ്വര്ജിയുടെ മനസില് വിരിഞ്ഞ ആശയത്തില്നിന്നുയര്ന്നുവന്നതാണ് രാഷ്ട്ര പുനര്നിര്മ്മാണത്തിനായി തിരുവനന്തപുരത്ത് ഒരു പഠനഗവേഷണ കേന്ദ്രമെന്ന നിലയില് ഭാരതീയ വിചാരകേന്ദ്രം. 1982 ലാണ് യാഥാര്ത്ഥ്യമായത്. ഭാരതീയ തത്വചിന്തയുടെയും വിചാരധാരയുടെയും ജ്ഞാനമാര്ഗം പിന്തുടരുന്നവരുടെയും കൂട്ടായ്മയായ ഭാരതീയ വിചാരകേന്ദ്രം ഉദ്ഘാടനം ചെയ്തത് മുതിര്ന്ന സംഘപ്രചാരകനും ഭാരതീയ മസ്ദൂര് സംഘിന്റെ അഖിലേന്ത്യാ അധ്യക്ഷനുമായിരുന്ന സ്വര്ഗ്ഗീയ ദത്തോപാന്ത് ഠേംഗ്ഡിജിയായിരുന്നു. പില്ക്കാലത്ത് സാമൂഹ്യ പരിഷ്കര്ത്താവും, സത്യാന്വേഷിയുമായ പരമേശ്വര്ജിയുടെ ഗഹനമായ പഠനങ്ങള്ക്കും, പ്രസിദ്ധീകരണത്തിനും പ്രഭാഷണങ്ങള്ക്കുമുള്ള വേദിയായി മാറുകയായിരുന്നു ഭാരതീയ വിചാര കേന്ദ്രം. സ്വ ജീവിതത്തിന്റെ അവിഭാജ്യഘടകമായി മാറിയ വിചാര കേന്ദ്രത്തില് മരണം വരെ കര്മനിരതനായ ഡയറക്ടറായിരുന്നു പരമേശ്വര്ജി. അമ്പതോളം പുസ്തകങ്ങളും നിരവധി പഠനാര്ഹങ്ങളായ ലേഖനങ്ങളും, കവിതകളും, ഗണഗീതങ്ങളും പ്രബന്ധങ്ങളും പ്രഭാഷണങ്ങളും അദ്ദേഹത്തിന്റെ പരന്ന വായനയുടെയും ആഴമേറിയ ചിന്തകളുടെയും ഉത്പന്നങ്ങളാണ്. നിരവധി അപൂര്വഗ്രന്ഥങ്ങളുടെ കലവറയായ ജ്ഞാനേശ്വരി എന്ന ഗ്രന്ഥശാല പരമേശ്വര്ജിയുടെ പരന്ന വായനയെ അടയാളപ്പെടുത്തുന്നു. നവതിയുടെ നിറവിലും നിറഞ്ഞ് പ്രകാശിച്ച ജ്ഞാനസൂര്യനായ പരമേശ്വര്ജി എഴുത്തിന്റെ തമ്പുരാനായിരുന്നു. പ്രവര്ത്തകരെ തന്റെ ചുറ്റിലും പ്രകാശിക്കുന്ന നക്ഷത്രങ്ങളായിത്തീരാന് അദ്ദേഹം പ്രചോദിപ്പിച്ചിരുന്നു. നിരവധി പ്രവര്ത്തകരെ അങ്ങിനെ പ്രകാശിപ്പിച്ചതിന്റെ പരിണിതഫലമാണ് കേരളത്തിന്റെ ബൗദ്ധിക മണ്ഡലത്തില് അവഗണിക്കാന് പറ്റാത്ത ഒരു ശക്തിയായി ഉയര്ന്നു വന്ന ഭാരതീയ വിചാരകേന്ദ്രത്തിന്റെ 43 വര്ഷം.
കുതിപ്പിന്റെ ഒരു പുതുവര്ഷം
വികസിത ഭാരതം എന്ന രാജ്യത്തിന്റെ വീക്ഷണത്തിന് കരുത്തു പകരുന്ന നിരവധി സംഭവങ്ങള്ക്ക് സാക്ഷ്യം വഹിച്ചാണ് 2025 കടന്നു പോകുന്നത്. 21-ാം നൂറ്റാണ്ടിന്റെ 25 വര്ഷം കടന്നു പോയിരിക്കുന്നു, കാല് നൂറ്റാണ്ട് എന്നത് ഒരു കാലഘട്ടമാണ്. പുതു വര്ഷം ഭാരതത്തെ സംബന്ധിച്ചിടത്തോളം പ്രതീക്ഷയുടെയും സാധ്യതകളുടെയുമാണ്. ഈ പുതിയ വര്ഷത്തിലാണ് ഭാരതീയ വിചാരകേന്ദ്രത്തിന്റെ 43-ാം വര്ഷികം നടക്കുന്നത് എന്നത് ആകസ്മികമാകാം. എന്നാല് സംഘത്തിന്റെ നൂറാം വാര്ഷികവേളയിലും ഭാരതം മുഴുവന് ശ്രദ്ധിക്കപ്പെട്ട ഒരു ഭഗവദ്ഗീതാ സെമിനാറിന്റെ രജതജൂബിലി വേളയിലും നടത്തപ്പെടുന്ന ഭാരതീയ വിചാരകേന്ദ്രത്തിന്റെ വാര്ഷിക സമ്മേളനത്തിന് വര്ദ്ധിച്ച പ്രാധാന്യമാണുള്ളത്. വിചാര കേന്ദ്രത്തിന്റെ സ്ഥാപകനായ സ്വര്ഗ്ഗീയ പരമേശ്വര്ജിയുടെ ശതാബ്ദി വര്ഷം കൂടിയാണ്.
ഭാരതം കൂടുതല് കുതിപ്പിനായി കാത്തിരിക്കുന്ന ഈ വര്ഷം അതിവേഗം വളരുന്ന മൂന്നാമത്തെ സാമ്പത്തിക ശക്തിയാകാനുള്ള ലക്ഷ്യമാണ് നമ്മുടെ മുന്നിലുള്ളത്. പത്ത് വര്ഷം പ്രവര്ത്തിച്ചതിന്റെ ഫലം പതിന്മടങ്ങു ശക്തിയില് മുന്നോട്ട് കൊണ്ടുപോയാലെ അഞ്ച് ട്രില്യന് ഡോളര് മൂല്യമുള്ള സാമ്പത്തിക ശക്തിയായി ഭാരതത്തിന് വളരാന് സാധിക്കുകയുള്ളു. മെയ്ക് ഇന് ഇന്ത്യയും ആത്മനിര്ഭര് ഭാരത് പദ്ധതിയും വേഗത്തിലും മികവിലും നടപ്പിലാക്കിയെങ്കില് മാത്രമെ Make in India and Make for the world എന്ന ലക്ഷ്യത്തിലേക്ക് നമുക്കെത്താന് സാധിക്കുകയുള്ളു. അതിനുള്ള സംവിധാനമൊരുക്കാന് ഇന്നത്തെ ഭരണത്തിന് സാധിക്കുന്നതാണ്. ഒരു നല്ല ഭരണത്തിനുള്ള ബൗദ്ധിക പിന്തുണ നല്കുക എന്നതാണ് ഭാരതീയ വിചാരകേന്ദ്രത്തിന്റെ ദൗത്യം. വാര്ഷിക സമ്മേളനത്തില് അത്തരം വിഷയങ്ങളാണ് ചര്ച്ച ചെയ്യപ്പെടുന്നത്. വിവിധമേഖലകളില് കഴിവ് തെളിയിച്ചവരും കര്മ മണ്ഡലത്തില് കാര്യക്ഷമമായി പ്രവര്ത്തിക്കുന്നവരുമായ ഉയര്ന്ന ബൗദ്ധികശക്തിയുള്ള ഒരു പറ്റം ആളുകളുടെ കൂട്ടായ്മയായ ഭാരതീയ വിചാരകേന്ദ്രം കേരളത്തിലങ്ങോളമിങ്ങോളം പ്രവര്ത്തനമുള്ള സംഘടനയാണ്. അതില് വൈസ് ചാന്സലര്മാരും പ്രൊഫസര്മാരും, ഉന്നത ഉദ്വോഗസ്ഥന്മാരും സാധാരണക്കാരും ഉള്പ്പെടുന്നു. 14 ജില്ലകളിലുമായി നൂറ് സ്ഥാനീയ സമിതികളില് പ്രവര്ത്തനം വ്യാപിപ്പിക്കാനുള്ള ശ്രമത്തിലാണ് ഭാരതീയ വിചാര കേന്ദ്രം.
സംവാദത്തിന്റെ സവിശേഷ സംസ്കാരം
വാദേവാദേ വര്ദ്ധിത തത്വബോധ എന്നത് ഒരു പഴമൊഴിയാണ്. സത്യാന്വേഷണത്തിനും ജ്ഞാനസമ്പാദനത്തിനും ചര്ച്ചയുടെയും സംവാദത്തിന്റെയും പ്രാധാന്യമാണ് ഇത് സൂചിപ്പിക്കുന്നത്. വാദങ്ങളും എതിര്വാദങ്ങളുമാണ് ഒരു ദര്ശനത്തിന്റെ ആവിര്ഭാവത്തിനും വികാസത്തിനും കാരണമാകുന്നത്. ചര്ച്ചകളിലൂടെയും സംവാദത്തിലൂടെയുമാണ് ജ്ഞാനസമ്പന്നരായി തീരേണ്ടതെന്ന് പരമേശ്വര്ജി ഉറച്ചു വിശ്വസിച്ചു. പ്രവര്ത്തകരെ സംവാദത്തില് ഏര്പ്പെടാന് അദ്ദേഹം പ്രോത്സാഹിപ്പിക്കുകയും സ്വയം നവീകരിക്കാനുള്ള മാര്ഗം തുറന്നു കൊടുക്കുകയും ചെയ്തു’. ലളിതജീവിതം കൊണ്ട് മാതൃകാപുരുഷനായ പരമേശ്വര്ജി സ്വന്തം ജീവിതത്തിലൂടെ വികസിപ്പിച്ചെടുത്ത ജ്ഞാന മാതൃകയാണ് കേന്ദ്രത്തിലെ മറ്റു പ്രവര്ത്തകരും അനുകരിച്ച് മുന്നോട്ട് പോകുന്നത്.
രാഷ്ട്രീയ വേര്തിരിവുകള്ക്കപ്പുറമായിരുന്നു പരമേശ്വര്ജി വികസിപ്പിച്ചെടുത്ത സൗഹൃദ വലയം. വിദ്വേഷ വിഷം ചീറ്റലും വിഴുപ്പലക്കലും നിത്യസംഭവമായി മാറുന്ന വര്ത്തമാനകാല ചാനല് ചര്ച്ചകളില് നിന്നും സംവാദങ്ങളില് നിന്നും വേറിട്ട് നില്ക്കുന്ന വിചാരകേന്ദ്രം വേദികളിലെ ചര്ച്ചകള് പരമേശ്വര്ജിയുടെ മഹിതമായ പാരമ്പര്യം ഉള്ക്കൊണ്ടുള്ളതാണ്. അത്തരം സംവാദ സംസ്കാരമാണ് ഒരു പരിഷ്കൃത സമൂഹത്തിന് ആവശ്യം. അത്തരം സംവാദങ്ങളായിരുന്നു ഇഎംഎസ്സും പരമേശ്വര്ജിയും തമ്മില് നടന്നത്. അത്തരം സൗഹൃദങ്ങളായിരുന്നു പി. ഗോവിന്ദ പിള്ളയും പരമേശ്വര്ജിയും തമ്മില് ഉണ്ടായിരുന്നത്. അത്തരം സംവാദങ്ങളും സൗഹൃദങ്ങളുമാണ് വിചാരകേന്ദ്രത്തിന്റെ മുഖമുദ്ര.
ഭഗവദ്ഗീതയുടെ കാലിക പ്രസക്തി
വര്ത്തമാന കാല ജീവിതത്തിലും വികസനകാര്യത്തിലും നാമനുഭവിക്കുന്ന പ്രയാസങ്ങള്ക്ക് ഭഗവദ്ഗീത പരിഹാരമാണെന്ന് പരമേശ്വര്ജി വിശ്വസിച്ചിരുന്നു. ഗീതാ സെമിനാറിന്റെ 25-ാം വര്ഷികം ആഘോഷിക്കുന്ന ഈ വേളയില് സാമൂഹികജീവിതത്തിലും വികസിത ഭാരതത്തിനും ഗീതയുടെ പങ്ക് എന്നത് കാലിക പ്രാധാന്യമുള്ള വിഷയമാണ്. സ്വന്തം കര്മമണ്ഡലത്തില് ഗീതയുടെ സന്ദേശം എങ്ങനെ പ്രയോജനപ്പെടുത്താം എന്നതിനെക്കുറിച്ച് ഗഹനമായി പഠിക്കാനാണ് പരമേശ്വര്ജി പ്രവര്ത്തകരെ പ്രേരിപ്പിച്ചത്. അത്തരത്തിലുള്ള ധാരാളം പഠനങ്ങള് നാടിന്റെ നാനാ ഭാഗത്തും നടക്കുന്നുണ്ട്.
വികസിത ഭാരതത്തിന് ഭഗവദ് ഗീതാദര്ശനത്തിന്റെ പങ്ക് എന്നത് കാലിക പ്രാധാന്യമുള്ള ഒരു വിഷയമാണ്. ഗാന്ധിജിയുടെ ജീവിതവും സ്വാതന്ത്ര്യസമരവുമായി ഗീതാദര്ശനങ്ങള്ക്കുള്ള സ്വാധീനം പോലെ ഈ അടുത്തു നടന്ന ജി 20 ഉച്ചകോടിയില് എടുത്ത തീരുമാനങ്ങളില് അറിഞ്ഞോ അറിയാതെയോ കടന്നുവന്ന ഭാരതീയ മൂല്യങ്ങളുടെ സ്വാധീനം നമുക്ക് അന്വേഷിച്ചു കണ്ടെത്താവുന്നതാണ്.
കാലികപ്രാധാന്യമുള്ള വിഷയങ്ങള് കൊണ്ടും വിശിഷ്ട വ്യക്തികളുടെ സാന്നിധ്യത്താലും സമ്പന്നമാകാറുണ്ട് ഭാരതീയ വിചാരകേന്ദ്രത്തിന്റെ സമ്മേളനങ്ങള്. സര്ക്കാര് ഗ്രാന്റുകളോ വലിയ സംഭാവനകളോ പ്രതീക്ഷിക്കാതെ പ്രവര്ത്തകരുടെ പ്രവര്ത്തന മികവിലും സഹായ സഹകരണത്തിലും നടത്തപ്പെടുന്ന സമ്മേളനങ്ങള് നിസ്വാര്ത്ഥ സേവനങ്ങളുടെ ഉത്തമ ഉദാഹരണങ്ങള് കൂടിയാണ്. 43-ാംവര്ഷിക സമ്മേളനവും ഇതിനൊരു അപവാദമല്ല. മാറി വരുന്ന സാഹചര്യങ്ങളില് പൊതു സമൂഹം ചര്ച്ച ചെയ്യേണ്ട വിഷയങ്ങളെ കുറിച്ച് സംസാരിക്കുന്നത് ആ വിഷയങ്ങളെ ആധികാരികമായി കൈകാര്യം ചെയ്യാന് കഴിവുള്ളവരാണ്. അതില് വൈസ് ചാന്സലര്മാരും സര്വകലാശാല പ്രൊഫസര്മാരും സാധാരണ പ്രവര്ത്തകരും ഉള്പ്പെടുന്നു. സ്ഥാനമാനങ്ങള് ആഗ്രഹിക്കാതെ, സ്വര്ഗീയ പരമേശ്വര്ജിയുടെ പാത പിന്തുടരുന്ന പ്രവര്ത്തകരാണ് ഈ പ്രസ്ഥാനത്തെ മുന്നോട്ട് നയിക്കുന്നത്.
ജന്മഭൂമി ഓണ്ലൈന്