കൊച്ചി: നിര്ദ്ദിഷ്ട അങ്കമാലി-എരുമേലി ശബരി റെയില്പ്പാത തിരുവനന്തപുരത്തേക്ക് നീട്ടുന്നതിന് കേരള സര്ക്കാരിന്റെയും കേന്ദ്ര റെയില്വേ മന്ത്രാലയത്തിന്റെയും സംയുക്ത സംരംഭമായ കേരള റെയില് ഡെവലപ്മെന്റ് കോര്പ്പറേഷന് ശുപാര്ശ ചെയ്തു. സര്ക്കാരിന്റെ നിര്ദേശപ്രകാരമാണ് ഇതു സംബന്ധിച്ച പഠനം നടത്തിയത്.
111 കിലോമീറ്റര് ദൈര്ഘ്യമുള്ളതാണ് നിര്ദ്ദിഷ്ട അങ്കമാലി-എരുമേലി ശബരിപ്പാത. തിരുവനന്തപുരത്തേക്ക് നീട്ടുകയാണെങ്കില് 160 കിലോമീറ്റര് റെയില് കൂടി അധികം വേണ്ടിവരും. ചെലവു പങ്കിടാന് നിവൃത്തിയില്ലെന്ന നിലപാടിയില് സംസ്ഥാന സര്ക്കാര് ഏറെക്കാലമായി പദ്ധതിയോട് മുഖം തിരിച്ചു നില്ക്കുകയായിരുന്നു. എന്നാല് അടുത്തിടെ ഇതുസംബന്ധിച്ച ചില അനുകൂല നീക്കങ്ങള് ആരംഭിച്ചിട്ടുണ്ട്. സ്ഥലമെടുപ്പ് ഓഫീസുകള് വീണ്ടും തുറക്കുമെന്ന സൂചനയാണ് സര്ക്കാര് വൃത്തങ്ങള് നല്കുന്നത്.
