തിരുവനന്തപുരം: തൈക്കാട് സ്ത്രീകളുടെയും കുട്ടികളുടെയും ആശുപത്രിയില് കഴിഞ്ഞവര്ഷം ജൂലൈ 30 ന് പനിക്ക് ചികിത്സ തേടിയെത്തിയ കുഞ്ഞിന് ചികിത്സാപിഴവുണ്ടായതായി ആരോഗ്യവകുപ്പ് ഡയറക്ടര് മനുഷ്യാവകാശ കമ്മീഷനെ അറിയിച്ചു. കമ്മീഷന് ചെയര്പേഴ്സണ് ജസ്റ്റിസ് അലക്സാണ്ടര് തോമസ് പത്രവാര്ത്തയുടെ അടിസ്ഥാനത്തില് സ്വമേധയാ കേസെടുത്ത് അന്വേഷണത്തിന് ഉത്തരവിട്ടതിന്റെ അടിസ്ഥാനത്തിലാണ് ആരോഗ്യവകുപ്പ് ഡയറക്ടര് റിപ്പോര്ട്ട് സമര്പ്പിച്ചത്.
പനിയും ദഹനസംബന്ധമായ പ്രശ്നങ്ങളുമായാണ് റിജാ(11) എന്ന കുട്ടിയെ 2024 ജൂലൈ 30 ന് തൈക്കാട് അത്യാഹിതവിഭാഗത്തിലെത്തിച്ചത്. കുട്ടിക്ക് ഐവി ഫ്ലൂയിഡ് നല്കാനും പ്രാന്റപ്രിസോള് കുത്തിവയ്പ് നല്കാനും ശിശുരോഗ വിദഗ്ദ്ധന് നിര്ദ്ദേശിച്ചു. ഇതിനിടയില് കുട്ടിക്ക് ശുചിമുറിയില് പോകേണ്ടി വന്നു. ഇതേ സമയം മറ്റൊരു കുട്ടിയെ ശ്വാസതടസവുമായി ആശുപത്രിയില് കൊണ്ടു വന്നു. ആ കുട്ടിയ്ക്ക് നെബുലൈസേഷന് നല്കുന്നതിനായി അഡ്രിനാലിന് എന്ന മരുന്ന് സിറിഞ്ചില് ലോഡ് ചെയ്ത ശേഷം ബാക്കി വന്നത് ലേബല് ചെയ്യുന്നതിനായി ജൂനിയര് പബ്ലിക് ഹെല്ത്ത് നഴ്സിംഗ് വിദ്യാര്ത്ഥിനിക്ക് കൈമാറി. അപ്പോള് ശുചിമുറിയില് നിന്നെത്തിയ റിജോക്ക് രണ്ടാമത്തെ കുട്ടിക്ക് നെബുലൈസേഷന് നല്കിയതിന്റെ ബാക്കി വന്ന അഡ്രിനാലിന് ഇഞ്ചക്ഷന് നല്കി. റിജോയുടെ ആരോഗ്യനില മോശമാവുകയും എസ്എറ്റി ആശുപത്രിയിലേക്ക് മാറ്റുകയും ചെയ്തു.
കുട്ടിക്ക് ഇപ്പോള് യാതൊരു ആരോഗ്യപ്രശ്നങ്ങളും ഇല്ലെന്നും പൂര്ണആരോഗ്യവാനാണെന്നും മെഡിക്കല് വിദ്യാഭ്യാസ ഡയറക്ടറുടെ പ്രതിനിധിയായ എസ്എറ്റി ആശുപത്രിയിലെ ശിശുരോഗ വിദഗ്ദ്ധന് കമ്മീഷന് സിറ്റിംഗില് നേരിട്ട് ഹാജരായി അറിയിച്ചതിന്റെ അടിസ്ഥാനത്തില് കേസ് തീര്പ്പാക്കി. സംഭവത്തില് സ്റ്റാഫ് നേഴ്സിനെ സസ്പെന്റ് ചെയ്തെന്നും എന്എച്ച്എം സ്റ്റാഫ് നേഴ്സിനെ പിരിച്ചു വിട്ടെന്നും നഴ്സിംഗ് സൂപ്രണ്ടില് നിന്നും വിശദീകരണം വാങ്ങിയിട്ടുണ്ടെന്നും റിപ്പോര്ട്ടില് പറഞ്ഞു. കുട്ടിയുടെ ഇപ്പോഴത്തെ അവസ്ഥ പരിശോധിച്ച് പിതാവിന്റെ മൊഴിയെടുത്ത് റിപ്പോര്ട്ട് സമര്പ്പിക്കാന് ജസ്റ്റിസ് അലക്സാണ്ടര് തോമസ് നിര്ദ്ദേശിച്ചതിന്റെ അടിസ്ഥാനത്തിലാണ് മെഡിക്കല് വിദ്യാഭ്യാസ ഡയറക്ടര് റിപ്പോര്ട്ട് സമര്പ്പിച്ചത്.
