തിരുവനന്തപുരം: മാനേജ്മെന്റ് പ്രതിനിധികളുടെ ഭാഗത്ത് നിന്നുള്ള കടുത്ത എതിര്പ്പ് നിലനില്ക്കെ, സംസ്ഥാനത്തെ സ്വകാര്യ ആശുപത്രികളിലെ ജീവനക്കാരുടെ മിനിമം വേതനം പരിഷ്കരിക്കുന്നതിനുള്ള കരട് വിജ്ഞാപനം ഒരു മാസത്തിനുള്ളില് പുറപ്പെടുവിക്കുമെന്നും ഇതിന് തൊഴില് വകുപ്പ് ഉദ്യോഗസ്ഥര്ക്ക് നിര്ദ്ദേശം നല്കിയെന്നും മന്ത്രി വി ശിവന്കുട്ടി അറിയിച്ചു.
തൊഴില് വകുപ്പ് 60 ശതമാനം വര്ദ്ധനയാണ് നിര്ദേശിക്കുന്നത് . ഇത് മാനേജ്മെന്റ് പ്രതിനിധികള് തള്ളുകയായിരുന്നു. 2013 ലെ വിജ്ഞാപനം അനുസരിച്ചുള്ള നിരക്ക് അടിസ്ഥാനമാക്കി നേരിയ വര്ദ്ധനയാണ് മാനേജ്മെന്റുകള് നിര്ദ്ദേശിച്ചത്. വിഷയം ചര്ച്ച ചെയ്യാന് വിളിച്ച വ്യവസായ ബന്ധസമിതി യോഗത്തില് മാനേജ്മെന്റ് പ്രതിനിധികള് പങ്കെടുത്തുമില്ല.
2200 ഓളം വരുന്ന സംസ്ഥാനത്തെ സ്വകാര്യ ആശുപത്രികളിലായി 1.13 ലക്ഷം പേര് ജോലി ചെയ്യുന്നുണ്ട്. വേതനം പരിഷ്കരിച്ചുള്ള 2018 ലെ വിജ്ഞാപനം ഹൈക്കോടതി റദ്ദാക്കിയതോടെ 2013 ലെ വിജ്ഞാപനം അനുസരിച്ചുള്ള വേതനമാണ് ഇപ്പോള് ആശുപത്രികളില് നല്കുന്നത്.
















