തിരുവനന്തപുരം: കടയ്ക്കാവൂര് മണ്ണാത്തി മൂലയിലുള്ള ഗുരുവിഹാര് ഗുഹാക്ഷേത്രത്തിലേക്ക് ശിവഗിരി തീര്ത്ഥാടകര് എത്തി തുടങ്ങി. ശ്രീനാരായണ ഗുരുദേവന് ധ്യാനത്തിലിരുന്ന സ്ഥലമെന്നാണ് ഇവടം അറിയപ്പെടുന്നത്. വര്ഷങ്ങള്ക്ക് മുമ്പ് ഈ സ്ഥലം കാടുകയറിയ നിലയിലായിരുന്നു. ഇവിടത്തെ ഗുഹയാണ് ഗുരു ധ്യാനത്തിനായി തെരഞ്ഞെടുത്തത്. പിന്നീട് അദ്ദേഹം വര്ക്കലയിലേക്ക് എത്തിച്ചേരുകയായിരുന്നുവെന്നാണ് പഴമക്കാരുടെ ഭാഷ്യം.
ഗുരുവിന്റെ സമാധി സമയത്ത് ഈ ഗുഹയില് നിന്ന് ഒരു ദീപനാളം ഉയര്ന്നു പൊങ്ങി എന്നും പറയപ്പെടുന്നു. പിന്നെയും ഒരുപാട് നാള് ഇവിടം ആരും തിരിഞ്ഞു നോക്കാതെ കിടന്നു. പില്ക്കാലത്ത് ഈ ഗുഹ സംരക്ഷിക്കുവാന് നാട്ടുകാര് രംഗത്തെത്തുകയും എല്ലാ ദിവസവും വിളക്കുകൊളുത്തുകയും ആരാധന തുടങ്ങുകയും ചെയ്തു.
ഗുരുദേവന് ശിവപ്രതിഷ്ഠ നടത്തിയ കടയ്ക്കാവൂര് ഊട്ട് പറമ്പ് ക്ഷേത്രത്തില് നിന്ന് എല്ലാ വര്ഷവും തീര്ത്ഥാടന പദയാത്രയും നടന്നു വരുന്നു. ഇപ്പോള് ശിവഗിരി തീര്ത്ഥാടന കാലയളവില് ഗുഹാക്ഷേത്രം ഒരു പ്രധാന സന്ദര്ശന കേന്ദ്രമായിരിക്കുന്നു. കഴിഞ്ഞ വര്ഷം നിരവധി തീര്ത്ഥാടകരാണ് ഇവിടെ എത്തിയത്.
ശിവഗിരി മഹാതീര്ത്ഥാടനത്തിന്റെ ഭാഗമായി ലോകം ശിവഗിരിയിലേക്ക് എന്ന പ്രതീതിയില് സംസ്ഥാനത്തെ വീഥികളെല്ലാം പീതവര്ണ്ണമായിക്കഴിഞ്ഞു. തീര്ത്ഥാടനത്തെ വരവേറ്റുകൊണ്ട് നാടാകെ കൊടിതോരണങ്ങളും ഗുരുദേവ ചിത്രവും ശിവഗിരി തീര്ത്ഥാടനാനുമതി വേളയിലെ ചിത്രങ്ങളും സ്വാഗത കമാനങ്ങളും ഉയര്ന്നു.
ശിവഗിരിലേക്ക് എത്തുന്ന തീര്ത്ഥാടകര്ക്ക് ഭക്ഷണ വിതരണവും താമസ സൗകര്യവും ഒരുക്കിയിട്ടുണ്ട്. പദയാത്രകള്ക്കു പുറമെ അനവധി വാഹനങ്ങളിലും ഗുരുദേവ ഭക്തര് ശിവഗിരിയിലേക്ക് എത്തുന്നുണ്ട്.
മഹാസമാധി സന്നിധിയിലും വൈദിക മഠത്തിലും ശാരദാദേവി സന്നിധിയിലും തിരക്കേറിക്കഴിഞ്ഞു. തീര്ത്ഥാടകര്ക്ക് കുറ്റമറ്റ ക്രമീകരണങ്ങളും ഒരുക്കിയിട്ടുണ്ട്. വഴിപാട് കൗണ്ടര്, പുസ്തകശാല, പാര്ക്കിംഗ് എന്നിവിടങ്ങളില് ക്രമീകരണം ഏര്പ്പെടുത്തി. വിദേശരാജ്യങ്ങളില് നിന്നും അയല് സംസ്ഥാനങ്ങളില് നിന്നും മുന്വര്ഷങ്ങളെ അപേക്ഷിച്ച് കൂടുതല് പേര് എത്തുമെന്നാണ് വിവരം.
ഇക്കൊല്ലം 50 ലക്ഷത്തോളം തീര്ത്ഥാടകര് ശിവഗിരിയില് എത്തുമെന്ന് ശിവഗിരിമഠം പ്രസിഡന്റ് സച്ചിദാനന്ദ സ്വാമി, ജനറല് സെക്രട്ടറി സ്വാമി സുഭാംഗാനന്ദ, ട്രഷററും തീര്ത്ഥാടന കമ്മറ്റി സെക്രട്ടറിയുമായ സ്വാമി ശാരദാനന്ദ, ജോയിന്റ് സെക്രട്ടറിമാരായ സ്വാമി അസംഗാനന്ദഗിരി, സ്വാമി വിജാനന്ദ ഗിരി, സ്വാമി വീരേശ്വരാനന്ദ, സംഘാടക കമ്മിറ്റി ചെയര്മാന് ഡോക്ടര് എ.വി.അനൂപ് എന്നിവര് അറിയിച്ചു.
