ഫെസ്(മൊറോക്കോ): ആഫ്രിക്കന് കപ്പ് ഓഫ് നേഷന്സ്(അഫ്കോന്) ഫുട്ബോളില് തുടര്ച്ചയായ രണ്ടാം ജയം നേടി നൈജീരിയ പ്രീക്വാര്ട്ടര് ബെര്ത്ത് ഉറപ്പിച്ചു. ഗ്രൂപ്പ് സിയില് നടന്ന പോരാട്ടത്തില് കരുത്തന് ടുണീഷ്യയെ രണ്ടിനെതിരെ മൂന്ന് ഗോളുകള്ക്കാണ് നൈജീരിയ തോല്പ്പിച്ചത്.
ആദ്യ മത്സരത്തില് ടാന്സാനിയയെ 2-1ന് തോല്പ്പിച്ച നൈജീരിയക്ക് നിലവില് ആറ് പോയിന്റായി. പ്രാഥമിക റൗണ്ടില് ഇനി ഉഗാണ്ടയ്ക്കെതിരായ മത്സരം കൂടി ബാക്കിയുള്ളപ്പോഴാണ് പ്രീക്വാര്ട്ടര് ബെര്ത്ത് ഉറപ്പാക്കിയിരിക്കുന്നത്. നൈജീരിയയെ കൂടാതെ ആദ്യ രണ്ട് മത്സരവും ജയിച്ച് ഗ്രൂപ്പ് ബിയില് നിന്ന് ഈജിപ്തും പ്രീക്വാര്ട്ടര് ബര്ത്ത് ഉറപ്പിച്ചുകഴിഞ്ഞു.
ടുണീഷ്യയ്ക്കെതിരായ ഇന്നലത്തെ മത്സരത്തിന്റെ ആദ്യ പകുതിയില് നൈജീരിയ ഏകപക്ഷീയമായ ഒരു ഗോളിന് മുന്നിട്ടു നിന്നു. 44-ാം മിനിറ്റില് വിക്ടര് ഒസിംഹന് നേടിയ ഗോളിലാണ് നൈജീരിയ ലീഡ് ചെയ്തത്. രണ്ടാം പകുതി തുടങ്ങി അധികം വൈകാതെ നൈജീരിയ ലീഡ് ഉയര്ത്തി. 50-ാം മിനിറ്റില് പ്രതിരോധ താരം വില്ഫ്രെഡ് നിഡ്ഡി ആണ് ഗോളടിച്ചത്. 67-ാം മിനിറ്റില് അഡെമോല ലൂക്ക്മാന് നേടിയ ഗോളില് നൈജീരിയ ലീഡ് ഉയര്ത്തി.
നല്ലപോലെ ആധിപത്യം പുലര്ത്തിയ നൈജീരിയയ്ക്കെതിരെ ടുണീഷ്യ പിന്നീട് രണ്ട് ഗോളുകള് നേടിയെങ്കിലും അനിവാര്യമായ പരാജയം ഏറ്റുവാങ്ങി. 74-ാം മിനിറ്റില് മൊണ്ടസ്സാര് ടാല്ബിയും 87-ാം മിനിറ്റില് ലഭിച്ച പെനാല്റ്റിയില് നിന്ന് അലി അല്-അബ്ദി(87)യുമാണ് ടൂണീഷ്യയുടെ ഗോളുകള് നേടിയത്.
ഇന്ന് മുതല് ആഫ്കോണ് പ്രാഥമിക ഘട്ടത്തിലെ മൂന്നാം റൗണ്ട് പോരാട്ടങ്ങള് ആരംഭിക്കും. രാത്രി ഒമ്പതരയ്ക്ക് രണ്ട് മത്സരങ്ങള്- സിംബാബ്വെയും ദക്ഷിണാഫ്രിക്കയും തമ്മില്, രണ്ടാം മത്സരത്തില് അംഗോള ഈജിപ്തിനെ നേരിടും. രാത്രി 12.30ന് നടക്കുന്ന പോരാട്ടങ്ങളില് ഒന്നില് ആതിഥേയരായ മൊറോക്കോ സാംബിയയെ നേരിടും. മറ്റൊരു മത്സരത്തില് കോമോറോസ് മാലിയെ നേരിടും.
