ന്യൂദൽഹി: രാജ്യത്തെ ഇടത് ഭീകരത അവസാനിപ്പിക്കുന്നതിനായി സുപ്രധാന നടപടികളുമായി കേന്ദ്ര സുരക്ഷാ ഏജൻസികൾ. കഴിഞ്ഞ നവംബർ 21 ന് ഛത്തീസ്ഗഡിൽ ഉന്നത നക്സലൈറ്റ് കമാൻഡർമാരിൽ ഒരാളായ ബസ്വരൻ, നവംബർ 18 ന് ആന്ധ്രാപ്രദേശിൽ മാഹിം, ഡിസംബർ 25 ന് ഒഡീഷയിൽ നടന്ന ഏറ്റുമുട്ടലിൽ ഗണേഷ് ഉയ്കെ എന്നിവരുടെ വധത്തിന് ശേഷം സംസ്ഥാന പോലീസും സുരക്ഷ ഏജൻസികളും രാജ്യത്ത് ശേഷിക്കുന്ന ഇടത് തീവ്രവാദി കമാൻഡൻമാരുടെ ഒരു ഹിറ്റ് ലിസ്റ്റ് തയ്യാറാക്കിയിട്ടുണ്ട്.
ഒരു സ്ത്രീ ഉൾപ്പെടെ 11 നക്സലൈറ്റുകളുടെ പേരുകൾ ഇതിൽ ഉൾപ്പെടുത്തിയിട്ടുണ്ട്. നക്സലൈറ്റുകളുടെ ഉന്നത പോളിറ്റ് ബ്യൂറോയിലെ ഏറ്റവും അപകടകാരികളായ മൂന്ന് തലവന്മാരുടെ പേരുകളും ഇതിൽ ഉൾപ്പെടുന്നു. ഈ പട്ടിക കേന്ദ്ര ആഭ്യന്തര മന്ത്രാലയവുമായി പങ്കിട്ടിട്ടുണ്ട്. അന്വേഷണ ഏജൻസി ഉദ്യോഗസ്ഥരുടെ അഭിപ്രായത്തിൽ നക്സലൈറ്റ് സംഘടനയുടെ താഴ്ന്ന തലങ്ങളിൽ 250-ലധികം നക്സലൈറ്റുകൾ അവശേഷിക്കുന്നുണ്ടെങ്കിലും രാജ്യത്തുടനീളമുള്ള നക്സലൈറ്റ് പ്രവർത്തനങ്ങൾ തന്ത്രപരമായി പ്രവർത്തിക്കുകയും നിയന്ത്രിക്കുകയും ചെയ്യുന്ന ഈ 11 ഉന്നത നക്സലൈറ്റുകൾ മാത്രമേ അവശേഷിക്കുന്നുള്ളൂവെന്നാണ്.
ഏറ്റവും ഉയർന്ന സ്ഥാനത്ത് ദേവ്ജി എന്ന ചിപ്പാരി തിരുപ്പതി
ഹിറ്റ് ലിസ്റ്റിൽ ഏറ്റവും മുകളിൽ നിൽക്കുന്ന പേര് ദേവ്ജി എന്ന ചിപ്പാരി തിരുപ്പതിയുടേതാണ്. 62 കാരനായ ദേവ്ജി ഒരു ഉന്നത പോളിറ്റ് ബ്യൂറോ കമാൻഡർ മാത്രമല്ല കേന്ദ്ര കമ്മിറ്റി കമ്മീഷന്റെ തലവനുമാണ്. ഇയാൾ സിപിഐ (മാവോയിസ്റ്റ്) ജനറൽ സെക്രട്ടറിയാണ്. മറ്റൊരു നക്സലൈറ്റ് നേതാവായ ഹിഡ്മയുടെ കൊലപാതകത്തിന് ശേഷം കേന്ദ്ര കമ്മിറ്റിയിലെ ഏറ്റവും അപകടകാരിയായ അംഗവുമാണ് ഇയാൾ. തെലങ്കാനയിലെ കരിംനഗർ ജില്ലയിൽ നിന്നുള്ള ഇയാൾ നക്സലൈറ്റ് തന്ത്രങ്ങൾ രൂപപ്പെടുത്തുന്നതിൽ വിദഗ്ദ്ധനാണ്. ഇയാളുടെ തലയ്ക്ക് ഒരു കോടി രൂപ പാരിതോഷികം പ്രഖ്യാപിച്ചിട്ടുണ്ട്.
കൂടാതെ നൂറിലധികം സുരക്ഷാ ഉദ്യോഗസ്ഥരെ കൊലപ്പെടുത്താൻ ഗൂഢാലോചന നടത്തിയതായി ഇയാൾക്കെതിരെ ആരോപിക്കപ്പെടുന്നുണ്ട്. ഏജൻസികൾ പറയുന്നതനുസരിച്ച് നിലവിൽ ഇയാൾ നക്സലൈറ്റുകളിലെ മോസ്റ്റ് വാണ്ടഡ് ഭീകരനാണ്.
