നോട്ടിങ്ങാം: പ്രീമിയര് ലീഗ് ഫുട്ബോളില് വമ്പന്മാരായ മാഞ്ചസ്റ്റര് യുണൈറ്റഡിനും മാഞ്ചസ്റ്റര് സിറ്റിക്കും വിജയം. നോട്ടിങ്ങാം ഫോറസ്റ്റിനെതിരായ പോരാട്ടത്തില് മാഞ്ചസ്റ്റര് സിറ്റി വിജയം 2-1നായിരുന്നു. സ്വന്തം തട്ടകത്തില് ഇറങ്ങിയ മാഞ്ചസ്റ്റര് യുണൈറ്റഡ് ന്യൂകാസിലിനെ 1-0നാണ് പരാജയപ്പെടുത്തിയത്.
എവേ പോരാട്ടത്തിലായിരുന്നു സിറ്റിയുടെ വിജയം. നോട്ടിങ്ങാമിനെതിരായ മത്സരത്തിന്റെ ആദ്യ പകുതി ഗോള്രഹിതമായി പിരിഞ്ഞു. രണ്ടാം പകുതിയുടെ തുടക്കത്തിലേ സിറ്റി സ്കോര് ചെയ്തു. 48-ാം മിനിറ്റില് ടിജാനി റെജിന്ഡേഴ്സ് ആണ് സിറ്റിക്കായി മത്സരത്തിലെ ആദ്യ ഗോള് നേടിയത്. ആറ് മിനിറ്റിനകം നോട്ടിങ്ങാം ഓപ്പമെത്തി. മത്സരം സമനിലയിലായതോടെ വാശിയേറി. മത്സരം 83-ാം മിനിറ്റെത്തിയപ്പോള് റയാന് ചെര്ക്കി സിറ്റിക്കായി വിജയഗോള് കണ്ടെത്തി. ജയത്തെ തുടര്ന്ന് സീസണില് 13 വിജയം സ്വന്തമാക്കിയ സിറ്റിക്ക് 40 പോയിന്റായി.
ന്യൂകാസിലിനെതിരെ ആദ്യ പകുതിയില് നേടിയ ഏക ഗോളിലാണ് യുണൈറ്റഡ് വിജയിച്ചത്. മത്സരത്തിന്റെ 24-ാം മിനിറ്റില് പാട്രിക് ഡോര്ഗു ആണ് ഗോള് നേടിയത്.
