വീടിനോടു ചേർന്ന് മരമുണ്ടെങ്കിൽ വെട്ടുന്നതിൽ തെറ്റില്ല ,പകരം രണ്ടു മരങ്ങൾ നട്ടുവളർത്തണം.വീടിന്റെ പ്രധാന വാതിലിന്റെ മുൻഭാഗം ഒഴിവാക്കി വേണം വൃക്ഷങ്ങൾ നടാൻ.
വീടിന്റെ വടക്കു ഭാഗത്തു മഹാലക്ഷ്മീ സങ്കല്പത്തിൽ രണ്ടു നെല്ലി വയ്ക്കുക. ‘നാരകം നട്ടിടം, കൂവളം കെട്ടിടം’ എന്ന് കേട്ടിട്ടില്ലേ , ഈ ചൊല്ല് പ്രാസം ഉപയോഗിച്ച് ആരെങ്കിലും പറഞ്ഞുതുടങ്ങിയതാവാം. മുള്ളുള്ള നാരകം വീടിന്റെ മുൻ ഭാഗങ്ങളിൽ നിന്ന് ഒഴിവാക്കി പുറകുവശത്തെ പുരയിടത്തിന്റെ അതിരിലായി നടാവുന്നതാണ്. അതുപോലെ തന്നെ കറിവേപ്പും, മുരിങ്ങയും വീട്ടുമുറ്റത്തുനിന്ന് മാറ്റി പുരയിടത്തിൽ നട്ടുവളർത്തുന്നതിൽ ഒരു ദോഷവുമില്ല. അത്തി, ഇത്തി, അരയാല്, പേരാല് എന്നീ നാൽപാമരങ്ങള് താമസസ്ഥലത്ത് വളര്ത്താൻ പാടില്ല എന്ന് പറയപ്പെടുന്നു
ശിവപാർവതിമാർക്ക് ഏറ്റവും പ്രിയപ്പെട്ട ദൈവികവൃക്ഷമാണ് കൂവളം. വീടിന്റെ തെക്ക് ഭാഗത്തോ പടിഞ്ഞാറു ഭാഗത്തോ കൂവളം നട്ടു പരിപാലിക്കുന്നത് ശുഭകരമാണ്. വസ്തുവില് കൂവളം, നെല്ലി, പ്ലാവ് എന്നിവ ഒന്നിച്ച് വളരുന്നതും നട്ട് വളര്ത്തുന്നതും വളരെ ഐശ്വര്യപ്രദമാണെന്നും പറയുന്നു.
വീടിനു ചുറ്റും തുളസി , വാഴ ,കവുങ്ങ്, മുല്ല , തെങ്ങ് എന്നിവ നടുന്നത് ഐശ്വര്യമാണ്. കിഴക്കു ഭാഗത്തു തുളസിയോടൊപ്പം ലക്ഷ്മീനാരായണ സങ്കൽപത്തിൽ മഞ്ഞൾ കൂടി നട്ടുവളർത്തുക.
കന്നിമൂലയിൽ അതായത് വീടിന്റെ തെക്കുപടിഞ്ഞാറേ മൂലയിൽ ഗണപതി പ്രീതികരമായ കറുക പടർത്തുക . വടക്കുകിഴക്കുമൂലയിൽ സമ്പൽസമൃദ്ധിക്കായി കണിക്കൊന്ന വയ്ക്കുക . തെക്കുകിഴക്കേ മൂലയായ അഗ്നികോണിൽ മുള നട്ടു പരിപാലിക്കുക.
പടിഞ്ഞാറ് ഭാഗത്തു മഞ്ഞൾ നടുന്നത് വാസ്തു ദോഷങ്ങൾ കുറയ്ക്കുമെന്നാണ് വിശ്വാസം.കിഴക്കു ഭാഗത്തു പ്ലാവും വടക്കു ഭാഗത്തു മാവും പടിഞ്ഞാറ് ഭാഗത്തു തെങ്ങും തെക്കു പുളിയും നട്ടുവളർത്തുന്നത് ഉത്തമ ഫലം നൽകും. ഉപയോഗ്യമായ ഫലവൃക്ഷങ്ങൾ വീടിന്റെ ഏതു ഭാഗത്തുവന്നാലും ദോഷമില്ല.
