ഓരോ ദിവസവും സ്വർണവില ചരിത്രത്തിലെ ഏറ്റവും ഉയർന്ന നിരക്കുകൾ പുതുക്കി മുന്നേറുകയാണ്. ഡിസംബർ 23-ന് സ്വർണവില ഒരു പവന് ഒരു ലക്ഷം രൂപ എന്ന നാഴികക്കല്ല് പിന്നിട്ടതിന് ശേഷം വിപണി ഇതുവരെ താഴോട്ട് ഇറങ്ങിയിട്ടില്ല. കഴിഞ്ഞ അഞ്ച് ദിവസത്തിനിടെ മാത്രം 2000 രൂപയുടെ വർദ്ധനവാണ് ഉണ്ടായത്.ഇന്ന് മാത്രം പവന്റെ വിലയിൽ 880 രൂപയുടെ വർദ്ധനവ് രേഖപ്പെടുത്തി. ഇതോടെ ഒരു പവൻ സ്വർണത്തിന്റെ വില 1,03,560 രൂപ കടന്നു.
കഴിഞ്ഞ ഒരാഴ്ചയ്ക്കിടെ മാത്രം പവൻ വിലയിൽ 5000 രൂപയുടെ വർദ്ധനവുണ്ടായി എന്നത് വിപണിയിലെ അസാധാരണമായ കുതിപ്പിനെയാണ് സൂചിപ്പിക്കുന്നത്.ഇന്നത്തെ വിപണി നിലവാരം അനുസരിച്ച് ഒരു ഗ്രാം സ്വർണത്തിന് 12,945 രൂപയാണ് വില. ഇതിന് പുറമെ പണിക്കൂലി, അഞ്ച് ശതമാനം ജിഎസ്ടി (GST), ഹോൾമാർക്കിംഗ് ഫീസ് എന്നിവ കൂടി ചേരുമ്പോൾ ഉപഭോക്താക്കൾ വലിയൊരു തുക നൽകേണ്ടി വരും.
ആഭരണത്തിന്റെ ഡിസൈൻ മാറുന്നതിനനുസരിച്ച് പണിക്കൂലി ഇനിയും വർദ്ധിക്കും. ക്രിസ്മസ്, പുതുവത്സര വിപണികളിൽ സ്വർണത്തിന് വലിയ ഡിമാൻഡ് ഉള്ള സമയത്താണ് ഈ വിലക്കയറ്റം എന്നതും ശ്രദ്ധേയമാണ്.
