തിരുവനന്തപുരം:ശ്രീലങ്കയ്ക്കെതിരായ വനിത ട്വന്റി 20 പരമ്പര സ്വന്തമാക്കി ഇന്ത്യ.കാര്യവട്ടം ഗ്രീന്ഫീല്ഡ് സ്റ്റേഡിയത്തില് നടന്ന മൂന്നാം മത്സരത്തില് എട്ട് വിക്കറ്റിനാണ് ഇന്ത്യയുടെ ജയം. അഞ്ച് മത്സര പരമ്പരയിലെ ആദ്യ രണ്ട് മത്സരങ്ങളും ഇന്ത്യ വിജയിച്ചിരുന്നു.
വെളളിയാഴ്ച നടന്ന മത്സരത്തില് ശ്രീലങ്ക ഉയര്ത്തിയ 113 റണ്സ് വിജയലക്ഷ്യം 13.2 ഓവറില് രണ്ട് വിക്കറ്റ് നഷ്ടത്തില് ഇന്ത്യ മറികടന്നു. അര്ധ സെഞ്ച്വറി നേടിയ ഷെഫാലി വര്മയുടെ വെടിക്കെട്ട് ബാറ്റിംഗിന്റെ മികവില് ഇന്ത്യ അനായാസമായി ലക്ഷ്യം കണ്ടു.42 പന്തില് 11 ബൗണ്ടറിയും മൂന്ന് സിക്സും ഉള്പ്പെടെ പുറത്താകാതെ 79 റണ്സാണ് ഷെഫാലി എടുത്തത്.
നേരത്തെ, ടോസ് നഷ്ടപ്പെട്ട് ബാറ്റ് ചെയ്ത ശ്രീലങ്കയെ നാല് വിക്കറ്റ് നേടിയ രേണുക സിംഗ്, മൂന്ന് വിക്കറ്റ് നേടിയ ദീപ്തി ശര്മ എന്നിവരാണ് തകര്ത്തത്.
നാലാം ഓവറില് തന്നെ കവിഷ ദില്ഹാരിയുടെ പന്തില് വിക്കറ്റിന് മുന്നില് കുടുങ്ങി സ്മൃതി മന്ദാന (1) പുറത്തായി. തുടര്ന്നെത്തിയ ജമീമ റോഡ്രിഗസ് (9) കവിഷയുടെ തന്നെ പന്തില് ബൗള്ഡായി.
എന്നാല് ഷെഫാലി – ഹര്മന്പ്രീത് കൗര് (21) കൂട്ടുകെട്ട് ഇന്ത്യയെ വിജയത്തിലേക്ക് നയിച്ചു.
27 റണ്സ് നേടിയ ഇമേഷ ദുലനിയാണ് ,ശ്രീലങ്കയുടെ ടോപ് സ്കോറര്. അഞ്ചാം ഓവറിലാണ് ലങ്കയ്ക്ക് ആദ്യ വിക്കറ്റ് നഷ്ടമാകുന്നത്. ലങ്കന് ക്യാപ്റ്റന് ചമാരി അത്തപ്പത്തു ദീപ്തിയുടെ പന്തില് ഹര്മന്പ്രീത് കൗര് പിടിച്ച് പുറത്തായി.പവര് പ്ലേയുടെ അവസാന ഓവറില് രേണുക രണ്ട് വിക്കറ്റുകള് നേടി. ഹര്ഷിത സമരവിക്രമ (2), ഹസിനി പെരേര (25) എന്നിവരെയാണ് രേണുക പുറത്താക്കിയത്. തുടര്ന്ന് നിലക്ഷിക സില്വ (4) കൂടി മടങ്ങിയതോടെ നാലിന് 45 എന്ന നിലയിലായി ലങ്ക. പിന്നീട് ദുലാനി – കവിഷ ദില്ഹാരി സഖ്യം 40 റണ്സ് കൂട്ടിചേര്ത്തു.
കവിഷയെ പുറത്താക്കി ദീപ്തിയാണ് ഇന്ത്യയെ മത്സരത്തിലേക്ക് തിരികെ എത്തിച്ചത്. ദുലാനിയെ രേണുകയും മടക്കി. തുടര്ന്ന് കൗഷിനി നുത്യാഗന പുറത്താവാതെ 19 റണ്സെടുത്തതാണ് ലങ്കയെ 100 കടത്തിയത്. മല്ഷ ഷെഹാനിയാണ് പുറത്തായ മറ്റൊരു താരം. മല്കി മദാര (1) പുറത്താവാതെ നിന്നു.
