‘കുട്ടികള് നമ്മുടെ രാജ്യത്തിന്റെ ഭാവിയാണ്’ എല്ലാ വര്ഷവും ശിശുദിനത്തില് ആവര്ത്തിക്കുന്ന വാക്കുകളാണിവ. എന്നാല് ഒരു രാജ്യത്തിന്റെ ഭാവി വെറും പ്രതീക്ഷകളാല് മാത്രമല്ല നിര്മിക്കപ്പെടുന്നത്. പുസ്തകങ്ങളുടെ ഗന്ധവും, കരിപ്പലകയുടെ പൊടിയും, ഇരിക്കാന് ഒരു പൈമരപ്പീഠത്തിന്റെ മൃദുതാപവുമാണ് ആ ഭാവിയുടെ നിര്മാണ വസ്തുക്കള്. ഓരോ കുഞ്ഞിനും പഠിക്കാനും, വളരാനും, സ്വപ്നം കാണാനും അവകാശമുള്ള ഒരു അവസരം ലഭിക്കണം. അത് കരുണയല്ല, അവരുടെ ജന്മാവകാശമാണ്.
ഈ സത്യം ഏറ്റവും ആഴത്തില് മനസിലാക്കിയ നേതാവായിരുന്നു അടല് ബിഹാരി വാജ്പേയി. കവി, പ്രാസംഗികന്, രാഷ്ട്രനേതാവ് എന്നീ നിലകളില് തിളങ്ങി നിന്നപ്പോഴും, ഭാരതത്തിലെ കുഞ്ഞുങ്ങള്ക്കായി അദ്ദേഹം ഹൃദയത്തില് എന്നും ഒരു പ്രത്യേക ഇടം നിലനിര്ത്തിയിരുന്നു. കുട്ടികള് അദ്ദേഹത്തിനു ജനസംഖ്യാ കണക്കിലെ അക്കങ്ങള് മാത്രമായിരുന്നില്ല. രാജ്യത്തിന്റെ ജീവവായുവും, പുതുവൈഭവത്തിന്റെ പ്രതീക്ഷയുമായിരുന്നു.
അദ്ദേഹത്തിന്റെ വിശ്വാസം ലളിതവും ശക്തവുമായിരുന്നു: ‘ഭാരതത്തെ ശക്തമാക്കണമെങ്കില്, കുഞ്ഞുങ്ങളെ വിദ്യാഭ്യാസത്തിലൂടെ ശക്തരാക്കണം.’ അടല്ജിയുടെ കാലത്തിനു മുന്പ്, ഗ്രാമങ്ങളിലോ സാമ്പത്തികമായി പിന്നാക്കമായ കുടുംബങ്ങളിലോപെട്ട നിരവധി കുട്ടികള്ക്കു ‘സ്കൂള്’ എന്നത് കയ്യെത്താ സ്വപ്നം മാത്രമായിരുന്നു. ദൂരം, ദാരിദ്ര്യം, കുടുംബ ബാധ്യതകള് ഇവയൊക്കെ പഠനത്തിന്റെ വാതിലുകള് അടച്ചിടുകയായിരുന്നു.
ഇന്നത്തെ ഭാരതത്തിന്റെ വിദ്യാഭ്യാസ ചരിത്രത്തില് വഴിത്തിരിവ് സൃഷ്ടിച്ച നടപടിയാണ് അടല്ജിയുടെ കേന്ദ്ര സര്ക്കാര് ആരംഭിച്ച ‘സര്വ ശിക്ഷാ അഭിയാന്.’ ഇത് ഒരു പദ്ധതി മാത്രമല്ല; രാജ്യത്തെ ഓരോ കുട്ടിയോടും ഭാരതം എടുത്ത ദൃഢപ്രതിജ്ഞയാണ്. രാജ്യത്തിന്റെ എല്ലാ കോണുകളിലും പുതിയ സ്കൂളുകള് ഉയര്ന്നു. ആയിരക്കണക്കിന് അധ്യാപകരെ നിയമിച്ചു. പരിശീലനം നല്കി. തലമുറകളായി അക്ഷരത്തെക്കുറിച്ച് അറിവില്ലാതിരുന്ന കുടുംബങ്ങളില്പ്പോലും, ആദ്യമായി സ്വന്തം പേരെഴുതിയ ചെറിയ കൈകളുടെ അഭിമാനം ഈ ദൗത്യത്തിന്റെ യഥാര്ത്ഥ വിജയചിഹ്നമായി.
പക്ഷേ, ഒരു കുട്ടിയുടെ വയറു വിശന്നിരിക്കുമ്പോള് അക്ഷരങ്ങള് മനസില് ഇടംപിടിക്കില്ലെന്ന്് അടല്ജി മനസിലാക്കി. അതിനാലാണ് ഉച്ചഭക്ഷണ പദ്ധതി അദ്ദേഹം ആധികാരികമായി ശക്തിപ്പെടുത്തിയത്. ‘സ്കൂളില് വരൂ, ചൂടുള്ള ഭക്ഷണം നിങ്ങളെ കാത്തിരിക്കുന്നു’ എന്ന ഹൃദയത്തില് നിന്നുള്ള ക്ഷണം ആയിരങ്ങള്ക്കു വിദ്യാഭ്യാസത്തിനും പോഷണത്തിനും
പുതിയ വാതിലുകള് തുറന്നു. ഇന്ന് ഭാരതത്തില് വീടുകളില് നിന്ന് നടക്കാവുന്ന ദൂരത്തില് പ്രാഥമിക സ്കൂള് കാണുന്നുണ്ടെങ്കില്, അത് ഒരു നേതാവിന്റെ ദീര്ഘദര്ശനവും, കുട്ടികളുടെ ഭാവിക്കു നല്കിയ മഹത്തായ ഉത്തരവാദിത്തബോധവും ചേര്ന്നതാണ്.
എല്ലാ ശിശുദിനത്തിലും, കുട്ടികളുടെ ആനന്ദവും സ്വപ്നങ്ങളുടെ അതിരില്ലാത്ത ശക്തിയും നാം ആഘോഷിക്കുമ്പോള്, അവരുടെ വിജയപാതകള്ക്ക് ശബ്ദശൂന്യമായി കല്ലുവെച്ച ഒരു മഹാനേതാവിനെ നാം സ്മരിക്കേണ്ട സമയമാണിത്. അടല് ബിഹാരി വാജ്പേയിയുടെ സ്വപ്നം ഒരോ കുഞ്ഞിനും തന്റെ വീട്ടുമുറ്റത്ത് നിന്ന് വിദ്യാലയത്തിന്റെ കവാടത്തിലേക്കുള്ള പാത സുരക്ഷിതവും സാധ്യതകളും നിറഞ്ഞതാക്കുക എന്നതായിരുന്നു. കുട്ടികള്ക്കായി രാജ്യത്തിന് നല്കാന് കഴിയുന്ന ഏറ്റവും വലിയ സമ്മാനവും അതുതന്നെ. ഈ ജന്മദിനത്തില് ആ നേതാവിന്, അടല്ജിക്ക് ശതകോടി പ്രണാമം.
ജന്മഭൂമി ഓണ്ലൈന്